Jerimaya 23:1-40
23 “Okpetu rode kẹ isuigodẹ re ghwọrọ je hra igodẹ mẹ re me vwẹrote na!” ọtiọyen Jihova tare.
2 Ọtiọyena ọnana yen oborẹ Jihova Ọghẹnẹ rẹ Izrẹl ta kpahen isuigodẹ re vwẹrote ihwo rọyen: “Ovwan hra igodẹ mẹ; ovwan dje ayen ẹhrẹhra, ovwan je rhe davwerhọ rayeen.”
“Ọtiọyena mi che hirharoku ovwan fikirẹ umiovwo rẹ ovwan,” ọtiọyen Jihova tare.
3 “Ọyena da wan nu ke me cha ghwẹ igodẹ mẹ ri chekọ vwo nẹ otọ eje re me hra ayen ra rhe, me cha reyọ ayen rhivwin rhe asan rẹ ayen da ria odin, kẹ ayen che vwiẹ ji bunphiyọ.
4 Me cha vwẹ isuigodẹ re cha ghene vwẹrote ayen vwo mu vwẹ enu rayen. Ayen rha cha djoshọ je phariẹ ọfaa, ọvuọvo rayen ji che ghwruu,” ọtiọyen Jihova tare.
5 “Nighere! Ọke cha,” ọtiọyen Jihova tare, “re me cha vwọ kpare oghọn rẹ ọvwata* ọvo vwọ kẹ Devid. Ovie ọvo che sun, o che dje ẹruọ phia ji titi orhiẹn ọsoso vẹ ophiọnphiọn vwẹ otọ na.
6 E che sivwin Juda vwẹ ọke rọyen, Izrẹl je cha dia vwẹ ofuvwegbe. Ọnana yen odẹ re che se: Jihova Yen Ophiọnphiọn rẹ Avwanre.”
7 “Ẹkẹvuọvo ọke cha,” ọtiọyen Jihova tare, “rẹ ayen che vwo jẹ tanẹ, ‘Rẹ Jihova rọ reyọ ihwo rẹ Izrẹl nẹ otọ rẹ Ijipt rhe vwọ herọ na!’
8 ukperẹ ọyena kẹ ayen cha ta: ‘Rẹ Jihova rọ reyọ emọ rẹ uwevwin rẹ Izrẹl phia, je reyọ ayen rhivwin vwo nẹ otọ rẹ obohwẹre ọnre na, kugbe vwo nẹ etọ eje rọ hra ayen ra rhe vwọ herọ na,’ ayen cha dia otọ robọ rayen.”
9 Vwọ kpahen emraro na:
Ubiudu mẹ hra totọ vwẹ evun mẹ.
Ibeku mẹ eje kpogho.
Me pha kerẹ ohwo rẹ udi muẹKerẹ ohwo rẹ iwaini muẹ,Fikirẹ Jihova kugbe eta efuanfon rọyen.
10 Kidie otọ na vọnre vẹ ihwo ri gbe igberadja;Fikirẹ iyorin re duvwun kẹ otọ na, otọ na ko vwerẹOdin rẹ aton na yare.
Uruemu rayen pha brabra, ayen je reyọ ẹgba rayen vwo ruiruo vwẹ idjerhe rọ chọre.
11 “Te emraro na te irherẹn na gbe oma rayen ẹgua.*
Vwevunrẹ uwevwin mẹ dede me mrẹ umwemwu rayen,” ọtiọyen Jihova tare.
12 “Ọtiọyena idjerhe rayen cha ghworiẹ ji muebri;E che genre ayen, ayen mi she.
Kidie me cha reyọ okpetu rhe enu rayenVwẹ ukpe rẹ ẹdjọeguo na,” ọtiọyen Jihova tare.
13 “Me mrẹ obo ri tuẹn ohwo oma vwẹ oma rẹ emraro ri Sameria.
Bel yen muẹ ayen vwọ mraro,Ayen ji sun ihwo mẹ Izrẹl ghwru.
14 Me je mrẹ emu ebrabra vwẹ oma rẹ emraro ri Jerusalẹm.
Ayen gbe igberadja je vwọrọ efian;Ayen titi ihwo ri ruẹ umiovwo,Ayen kuomarhẹriẹ nẹ umiovwo rayeen.
Vwọ kẹ vwẹ, ayen eje pha kerẹ Sọdọm,Ihwo re dia evun rọyen pha kerẹ Gomora.”
15 Ọtiọyena ọnana yen oborẹ Jihova rẹ otuofovwin na ta kpahen emraro na:
“Nighere, me nẹrhẹ ayen ria okankọn rọ yaraJe vwẹ ame ra ruanre vwọ kẹ ayen da.
Kidie uruemu re vwo chukokuẹ Ọghẹnẹ hra nene otọ na fikirẹ emraro ri Jerusalẹm.”
16 Ọnana yen oborẹ Jihova rẹ otuofovwin na tare:
“Ovwan kerhọ rẹ eta rẹ emraro re mraro kẹ ovwan naa.
Ayen phiẹn ovwan.*
Ubiudu rayen yen emramrẹ na nẹ cha,Ọ dia unu ri Jihovaa.
17 Ayen dje ẹtẹta vwọ kẹ ihwo ri muọghọ kẹ vwẹẹ nẹ,‘Jihova tare nẹ: “Ovwan che vwo ufuoma.”’
Je ta kẹ kohwo kohwo ro ruẹ nene ubiudu ọgangan rọyen nẹ,‘Okpetu vuọvo che te ovwan omaa.’
18 Ono yen mudia ohri rẹ ihwo re kẹrẹ JihovaRọ vwọ mrẹ ji nyo ota rọyen?
Ono yen davwerhọ rẹ ota rọyen rere o se vwo nyo?
19 Nighere! Odju ọgangan ri Jihova che dju vẹ ophu;Kerẹ odju ro djuẹ riariẹ, o che dju vwẹ enu rẹ uyovwin rẹ irumwemwu na.
20 Ophu ri Jihova che fueenBẹsiẹ ro vwo ru obo rehẹ ẹwẹn rọyen gba.
Ovwan cha nabọ vwo ẹruọ rẹ ọnana vwẹ ẹbẹre rọ koba rẹ ẹdẹ na.
21 Dede nẹ mi ji emraro naa, jẹ ayen djẹ yanran.
Dede nẹ me ta ota kẹ ayeen, jẹ ayen mraro.
22 Ẹkẹvuọvo ọ da dianẹ ayen mudia ohri rẹ ihwo re kẹrẹ ovwẹ jovwo,Manẹ ayen nẹrhẹ ihwo mẹ nyo eta mẹJe nẹrhẹ ayen kuomarhẹriẹ vwo nẹ idjerhe ọbrabra rayen vẹ umiovwo rayen.”
23 “Ọghẹnẹ rọ kẹrẹre ọvo yen mi ruẹ,” ọtiọyen Jihova tare, “me rha je dia Ọghẹnẹ vwo nẹ asan oshesheri rhe?”
24 “Kẹ ohwo se siomanu vwẹ asan rọ djahenre mi de jẹ mrẹ?” ọtiọyen Jihova tare.
“Me gbe sa mrẹ erọnvwọn eje rehẹ idjuvwu vẹ otọrakpọ na?” ọtiọyen Jihova tare.
25 “Mi nyo emraro na re vwẹ odẹ mẹ vwọ mraro rẹ efian nẹ, ‘Me vwerhẹn evwerhẹn! Me vwerhẹn evwerhẹn!’
26 Brọke yen ọnana cha dia kri te vwẹ ubiudu rẹ emraro na rẹ ayen vwọ mraro rẹ efian? Ayen emraro re mraro rẹ ophiẹnvwe vwẹ ubiudu rayen.
27 Ayen guọnọre nẹ odẹ mẹ chọrọ ihwo mẹ ẹro womarẹ evwerhẹn rẹ ayen gbe kẹ ohwohwo, kirobo rẹ odẹ mẹ chọrọ esẹ rayen ẹro fikirẹ Bel.
28 E jẹ ọmraro rọ vwerhẹn evwerhẹn gbikun rẹ evwerhẹn na, ẹkẹvuọvo ohwo ro vwo ota mẹ fuevun ta.”
“Die yen ugbẹn rẹ okankọn vẹ iwiti vwo kugbe?” ọtiọyen Jihova tare.
29 “Ota mẹ rha dia kerẹ erhanre,” ọtiọyen Jihova tare, “kerẹ ihama re vwo kporon oragha?”
30 “Ọtiọyena nighere, me vwọsua emraro na,” ọtiọyen Jihova tare, “ri cho eta mẹ mie ohwohwo na.”
31 “Nighere, me vwọsua emraro na,” ọtiọyen Jihova tare, “ihwo re reyọ ẹrẹnvwe rayen vwọ tanẹ, ‘Ọ tare!’”
32 “Nighere, me vwọsua emraro re vwerhẹn evwerhẹn rẹ efian na,” ọtiọyen Jihova tare, “ri gbikun rayen je phiẹn ihwo mẹ fikirẹ efian vẹ omaẹyan rayen.”
“Ẹkẹvuọvo mi ji ayen yẹrẹ ji iji kẹ ayeen. Ọtiọyena ayen cha nẹrhẹ ihwo nana mrẹ erere vuọvoo,” ọtiọyen Jihova tare.
33 “Ọke rẹ ihwo nana yẹrẹ ọmraro yẹrẹ orherẹn da nọ wẹ nẹ, ‘Die yen oghwa* ri Jihova?’ wọ me kpahen kẹ ayen nẹ, ‘“Ovwan yen oghwa na! Mi che do ovwan kufia,” ọtiọyen Jihova tare.’
34 Vwọ kpahen ọmraro yẹrẹ orherẹn yẹrẹ ihwo re tanẹ, ‘Ọnana oghwa* ri Jihova!’ Mi che hirharoku ohwo yena vẹ evwruwevwin rọyen.
35 Ọnana yen oborẹ ovwan ọvuọvo ta kẹ ọrivẹ rọyen vẹ oniọvo rọyen, ‘Ọrhọ yen ẹkpahọnphiyọ ri Jihova? Die yen Jihova tare?’
36 Ẹkẹvuọvo ovwan rhe djunute oghwa* ri Jihova ọfaa, kidie oghwa* na yen ota rẹ ohwo ọvuọvo, ovwan wene ota rẹ Ọghẹnẹ ro jeghwo na, Jihova rẹ otuofovwin, Ọghẹnẹ rẹ avwanre re.
37 “Ọnana yen oborẹ wọ cha ta kẹ ọmraro na, ‘Die yen Jihova kpahen kẹ wẹ? Die yen Jihova tare?
38 Ovwan de dje ẹtẹta nẹ, “Oghwa* ri Jihova!” ọnana yen oborẹ Jihova tare: “Kidie nẹ ovwan tanẹ, ‘Ota nana oghwa* ri Jihova,’ je me vuẹ ovwan jovwo re nẹ, ‘Ovwan gbe tanẹ, “Oghwa* ri Jihovaa!”’
39 nighere! me cha kpare ovwan kpenu ji do ovwan kufia nẹ obaro mẹ, te ovwan te orere re me vwọ kẹ ovwan vẹ esẹ rẹ ovwan ride na.
40 Me cha nẹrhẹ ovwan mrẹ ophọphọvwe ri bẹdẹ, ophọphọvwe rọ cha sa chọrọ ohwo ẹro bẹdẹẹ.”’”
Eta rehẹ obotọ na
^ Vwẹ Hibru, “kpare ọmọ rẹ ọvwata.”
^ Yẹrẹ “irherẹn na yanjẹ Ọghẹnẹ vwo.”
^ Yẹrẹ “Iphiẹrophiyọ ifefe yen ayen vwọ kẹ ovwan.”
^ Yẹrẹ “ovuẹ ọhọhọhọ.” Ota ri Hibru na vwo ọhọ ivẹ: “ovuẹ ro vwo ọnyẹ ro nẹ obọ rẹ Ọghẹnẹ rhe” yẹrẹ “orọnvwọn ọhọhọhọ.”
^ Yẹrẹ “Ọnana ovuẹ ọhọhọhọ.”
^ Yẹrẹ “djunute ovuẹ ọhọhọhọ.”
^ Yẹrẹ “kidie ovuẹ ọhọhọhọ.”
^ Yẹrẹ “Ovuẹ ọhọhọhọ.”
^ Yẹrẹ “nana ovuẹ ọhọhọhọ.”
^ Yẹrẹ “Ovuẹ ọhọhọhọ.”
