Jerimaya 24:1-10
-
Ifigi ri yovwirin vẹ i ri miovwirin (1-10)
24 Ọyena vwọ wan nu, Jihova de dje obere ivẹ rẹ ifigi hepha re mu phiyọ obaro rẹ uwevwin rẹ ẹga ri Jihova na kẹ vwẹ, ọke rẹ Ovie Nẹbukadnẹza* ri Babilọn vwo mu Jẹkonaya* ọmọ ri Jehoyakim ovie ri Juda, vẹ isun ri Juda, ewena na, kugbe idjogun* na kpo ighuvwu nu; o mu ayen nẹ Jerusalẹm kpo Babilọn.
2 Ifigi ri yovwirin mamọ kerẹ ifigi re ka vware yehẹ evunrẹ obere ọvo, ẹkẹvuọvo ifigi ri miovwirin mamọ te ẹdia rẹ a rha cha sa re ayeen kọyen rha hẹ obere ro chekọ.
3 Etiyin Jihova da nọ vwẹ: “Die yen wọ mrẹ, Jerimaya?” Ọtiọyena me da ta: “Ifigi; omamọ ifigi na yovwirin mamọ, ẹkẹvuọvo erharhe na miovwirin mamọ te ẹdia rẹ a rha cha sa re ayeen.”
4 Ota ri Jihova de bru vwe rhe, nẹ,
5 “Ọnana yen oborẹ Jihova Ọghẹnẹ rẹ Izrẹl tare, ‘Kerẹ omamọ ifigi nana ọtiọyen me je cha vwẹ omamọ rẹ ẹro vwo ni ihwo ri Juda re mu kpo ighuvwu, ri mi ji nẹ etinẹ na kpo otọ rẹ ihwo ri Kaldia na.
6 Ẹro mẹ cha dia enu rayen ọkieje fikirẹ erhuvwu rayen, me cha nẹrhẹ ayen rhivwin rhe otọ nana. Me cha bọn ayen, jẹ me cha guọghọ ayeen; me cha kọn ayen, jẹ mi che ghwie ayeen.
7 Me cha vwẹ ubiudu rẹ ayen cha vwọ riẹn nẹ mẹvwẹ yen Jihova vwọ kẹ ayen. Ayen cha dia ihwo mẹ, ke me cha dia Ọghẹnẹ rayen, kidie ayen cha vwẹ ubiudu rayen eje rhivwin bru vwe rhe.
8 “‘Ẹkẹvuọvo vwọ kpahen erharhe ifigi ri miovwirin te ẹdia rẹ a rha cha sa re ayeen na, ọnana yen oborẹ Jihova tare: “Ọtiọyen me je cha vwẹ orharhe rẹ ẹro vwo ni Ovie Zẹdikaya ri Juda, isun rọyen, ihwo ri Jerusalẹm ri chekọ ra yan jovwo vwẹ otọ nana, kugbe ihwo re dia otọ rẹ Ijipt.
9 Me cha nẹrhẹ ayen dia obo ri muẹ ohwo oshọ vẹ okpetu vwọ kẹ uvie sansan rẹ akpọ na eje, ehwẹjẹ, obo re vwo bru isẹ, obo ra vwọ jehwẹ, kugbe ekan vwẹ asan eje re me hra ayen ra.
10 Mi che ji ọlọkọ, owẹnvwe, kugbe ọga vwọso ayen, bẹsiẹ ayen vwọ ghwọrọ vwo nẹ otọ re me vwọ kẹ ayen vẹ esẹ rayen ride na.”’”
