Jerimaya 34:1-22
34 Ota ro nẹ obọ ri Jihova bru Jerimaya rhe, ọke rẹ Ovie Nẹbukadnẹza* ri Babilọn vẹ ituofovwin rọyen eje kugbe uvie sansan rẹ akpọ na eje rehẹ otọ rẹ usuon rọyen vẹ ihwo na eje vwo nene Jerusalẹm vẹ irere rọyen eje họnra:
2 “Ọnana yen oborẹ Jihova Ọghẹnẹ rẹ Izrẹl tare, ‘Yanran ra ta ota kẹ Ovie Zẹdikaya ri Juda rere wọ vuẹ: “Ọnana yen oborẹ Jihova tare, ‘Nighere, mi phiẹ orere nana phiyọ obọ rẹ ovie ri Babilọn, kọ cha vwẹ erhanre vwọ torhẹ.
3 Wọ cha sa djẹ va abọọ, kidie e che mu we ji phi we phiyọ obọ rọyen. Wo che rhiẹromrẹ ovie ri Babilọn, wẹ vẹ ọyen che hirharoku ohwohwo ta ota, e ji che mu we kpo Babilọn.’
4 Ẹkẹvuọvo nyo ota ri Jihova, E Ovie Zẹdikaya ri Juda, ‘Ọnana yen oborẹ Jihova ta kpahen owẹ: “A cha vwẹ ọlọkọ vwọ teyen owẹ hwee.
5 Wo che ghwu vwọrẹ ufuoma, ayen cha torhẹ ẹtorhẹ rẹ orivwin esho vwọ kẹ wẹ kirobo rẹ ayen ruru vwọ kẹ esẹ wẹn, ivie re kobaro kẹ wẹ, ayen che vwere uwe nẹ, ‘E, onini!’ kidie ‘me ta ota na nure,’ ọtiọyen Jihova tare.”’”’”
6 Etiyin Jerimaya ọmraro na da ta eta nana eje kẹ Ovie Zẹdikaya ri Juda vwẹ Jerusalẹm,
7 ọke rẹ ituofovwin rẹ ovie ri Babilọn vwo nene Jerusalẹm vẹ irere ri Juda eje ri chekọ, kọyen Lekish kugbe Azika họnra; kidie ayen ọvo yen irere ra gbogba riariẹ ri chekọ vwẹ usun rẹ irere ri Juda.
8 Ota ro nẹ obọ ri Jihova bru Jerimaya rhe ọke rẹ Ovie Zẹdikaya vwo nene ihwo eje rehẹ Jerusalẹm re ọphọ nu, ro vwo ghwoghwo obọesiono kẹ ayen,
9 nẹ kohwo kohwo siobọnu eviẹn rọyen re dia ihwo ri Hibru, te ọshare te aye, rere ohwo vuọvo vwo jẹ ọrivẹ rọyen rọ dia ohwo ri Ju evwo ruẹ ọviẹn.
10 Ọtiọyena isun na eje vẹ ihwo na eje de ru ọtiọyen. Ayen re ọphọ nẹ kohwo kohwo siobọnu ọviẹn rọyen rẹ ọshare vẹ ọ rẹ aye nẹ ayen rha vwẹ ayen vwo ruẹ eviẹn ọfaa. Ayen ru ọtiọyen, ayen de siobọnu ayen kpo.
11 Ẹkẹvuọvo ọke vwọ yanran na, ayen da rhoma reyọ eviẹn rẹ eya vẹ e rẹ eshare rẹ ayen siobọnu jovwo na rhivwin, ayen da rhoma gba ayen vwo ru eviẹn.
12 Ọtiọyena ota ri Jihova de bru Jerimaya rhe, Jihova da ta:
13 “Ọnana yen oborẹ Jihova Ọghẹnẹ rẹ Izrẹl tare, ‘Mi nene esẹ rẹ ovwan ride re ọphọ vwẹ ẹdẹ re me reyọ ayen vwo nẹ otọ rẹ Ijipt, vwo nẹ uwevwin rẹ ọviẹn rhe, tanẹ:
14 “Vwẹ oba rẹ ẹgbukpe ighwrẹn, ovwan ọvuọvo siobọnu oniọvo rẹ ovwan rọ dia ohwo ri Hibru ra shẹ vwọ kẹ ovwan, rọ je ga ovwan ẹgbukpe esan re; kẹ ovwan siobọno.” Ẹkẹvuọvo esẹ rẹ ovwan ride kerhọ mẹ yẹrẹ davwerhọọ.
15 O krinọọ na,* ovwan komobọ de kuomarhẹriẹ ru obo ri shephiyọ vwẹ ẹro mẹ, rẹ ovwan vwo ghwoghwo obọesiono vwọ kẹ irivẹ rẹ ovwan, ovwan da je re ọphọ vwẹ obaro mẹ vwevunrẹ uwevwin nana ra vwẹ odẹ mẹ se na.
16 Ẹkẹvuọvo ovwan vwo ru ọyena nu, ovwan da rhoma kuomarhẹriẹ ji gbe odẹ mẹ ku rẹ ovwan vwọ rhoma reyọ eviẹn rẹ eshare vẹ eviẹn rẹ eya rẹ ovwan siobọnu kirobo rẹ ayen guọnọre* na rhivwin, je rhoma gba ayen vwo ru eviẹn.’
17 “Ọtiọyena ọnana yen oborẹ Jihova tare: ‘Ovwan nyẹme mẹ vwẹ obọesiono rẹ ovwan ọvuọvo ghwoghwo kẹ oniọvo rọyen vẹ ọrivẹ rọyeen. Ọtiọyena mi che ghwoghwo obọesiono kẹ ovwan asaọkiephana,’ ọtiọyen Jihova tare, ‘re me cha vwọ vwẹ ovwan kpahotọ kẹ ọlọkọ, ọga, kugbe owẹnvwe, ki mi che ru ovwan phiyọ obo ri muẹ ohwo oshọ vwọ kẹ uvie sansan rẹ akpọ na ejobi.
18 Ọnana yen obo re cha phia kẹ ihwo ri gbe ọphọ mẹ ku rẹ ayen vwo jẹ eta rẹ ọphọ na enene, ọphọ rẹ ayen rere vwẹ obaro mẹ vwẹ ọke rẹ ayen vwo bru ọmọ rẹ erhuẹn kpo ẹkẹn ivẹ je wan uherevie rẹ ibro ivẹ na,
19 kọyen isun ri Juda, isun ri Jerusalẹm, ediaguare* na, irherẹn na, kugbe ihwo rẹ otọ na eje re wan uherevie rẹ ibro ivẹ rẹ ọmọ rẹ erhuẹn na:
20 Mi che phi ayen phiyọ obọ rẹ ivwighrẹn rayen kugbe ihwo re guọnọ arhọ* rayen reyọ, irivwin rayen cha dia emuọre vwọ kẹ ephran rẹ idjuvwu na kugbe eranvwe rẹ otọrakpọ na.
21 Ki mi che phi Ovie Zẹdikaya ri Juda vẹ isun rọyen phiyọ obọ rẹ ivwighrẹn rayen kugbe obọ rẹ ihwo re guọnọ arhọ* rayen reyọ, phiyọ obọ rẹ ituofovwin rẹ ovie ri Babilọn ri siomareyọ vwo nẹ ovwan na.’
22 “‘Nighere, me cha vwẹ iji phia,’ ọtiọyen Jihova tare, ‘me cha reyọ ayen rhivwin rhe orere nana, kẹ ayen che nene họnre, reyọ, je vwẹ erhanre torhẹ; mi che ru irere ri Juda phiyọ ofefe, ohwo vuọvo gbe cha diaa.’”
