Jerimaya 19:1-15
19 Ọnana yen oborẹ Jihova tare: “Yanran ra dẹ omochẹ ra vwẹ ọphiẹn ru vwo mie ọmechẹ. Reyọ evo vwẹ usun rẹ ekpako rẹ ihwo na kugbe evo vwẹ usun rẹ ekpako rẹ irherẹn na nene oma,
2 rere ovwan yanran kpo Iyara rẹ Ọmọ ri Hinọm vwẹ asan Anurhoro rẹ Echẹ ri Ghwuru na. Wo mi ghwoghwo eta re me ta kẹ wẹ na vwẹ etiyin.
3 Ku wọ cha tanẹ, ‘Ovwan nyo ota ri Jihova, ovwan ivie ri Juda kugbe ihwo re dia Jerusalẹm. Ọnana yen oborẹ Jihova rẹ otuofovwin, Ọghẹnẹ rẹ Izrẹl tare:
“‘“Me guọnọ ghwa okpetu cha etinẹ na, erhọ cha ghẹnghẹn kohwo kohwo ro nyo kpahọn.
4 Kidie ayen kpairoro vrẹ vwẹ ji ru asan nana phiyọ asan re je vughe. Ayen ze izobo vwọ kẹ eghẹnẹ efa vwẹ evun rọyen, eghẹnẹ rẹ ayen vẹ esẹ rayen ride kugbe ivie ri Juda riẹnree, ayen ji ku ọbara rẹ ihwo rẹ abọ rayen fonro ku etinẹ na.
5 Ayen bọn asan ri kpenu ri Bel rere ayen vwọ torhẹ emọ rayen vwevunrẹ erhanre kerẹ izobo rẹ ẹtorhẹ vwọ kẹ Bel, orọnvwọn ri mi ji iji rọyen yẹrẹ ta ota kpaheen, orọnvwọn rọ je rhe tobọ rhe ẹwẹn* mẹ dẹvoo.”’
6 “‘“Ọtiọyena nighere! ọke cha,” ọtiọyen Jihova tare, “re che vwo jẹ etinẹ na e se Tofẹt yẹrẹ Iyara rẹ Ọmọ ri Hinọm ẹkẹvuọvo Iyara rẹ Ihwehwe.
7 Me cha yanghan iroro ri Juda kugbe Jerusalẹm vwẹ etinẹ na, me cha nẹrhẹ ivwighrẹn rayen re guọnọ arhọ* rayen reyọ na vwẹ ọlọkọ teyen ayen hwe. Ke me cha vwẹ irivwin rayen vwọ ghẹrẹ ephran rẹ idjuvwu na kugbe eranvwe rẹ otọrakpọ na.
8 Ki mi che ru orere nana phiyọ obo ri muẹ ohwo oshọ kugbe orọnvwọn re che gbe ophiọrọ phiyọ. Kohwo kohwo rọ wanvrẹ che no vẹ oshọ ji gbe ophiọrọ fikirẹ etiekọ rọyen eje.
9 Me cha nẹrhẹ ayen re uvwo rẹ emeshare rayen kugbe emetẹ rayen, ayen ọvuọvo je cha re uvwo rẹ ọrivẹ rọyen, fikirẹ ekedje re ke ayen dje kugbe oja rẹ ayen ria vwẹ ọke rẹ ivwighrẹn rayen kugbe ihwo re guọnọ arhọ* rayen reyọ vwọ gba riariẹ ayen phiyọ.”’
10 “Ọtiọyena gbe hwe omochẹ na vwẹ irharo rẹ ihwo ri nene uwe na,
11 rere wọ ta kẹ ayen nẹ, ‘Ọnana yen oborẹ Jihova rẹ otuofovwin tare: “Ọtiọna yen me cha ghwọrọ ihwo nana kugbe orere nana, kerẹ ohwo rọ guọghọ ochẹ rẹ ọmechẹ te ẹdia rẹ a rha cha sa rhuẹrẹ ọfaa; kẹ ayen che shi ihwo ri ghwuru na phiyọ Tofẹt te ẹdia rẹ o rhe che vwo asan vuọvo re che shi ayen phiyọọ.”’
12 “‘Ọtiọyen yen mi che ru etinẹ na,’ ọtiọyen Jihova tare, ‘kugbe ihwo re dia evun rọyen, ri mi vwo ru orere nana kerẹ Tofẹt.
13 Iwevwin ri Jerusalẹm kugbe iwevwin rẹ ivie ri Juda che hirhephiyọ obo ri jẹfuọn kerẹ etinẹ na, Tofẹt, e, iwevwin eje ra dia enu rayen de ze izobo vwọ kẹ ọnre, emeranvwe, kugbe isio eje rehẹ idjuvwu na vẹ asan rẹ ayen de ku izobo rẹ udi kẹ eghẹnẹ efa na.’”
14 Ọke rẹ Jerimaya vwo rhivwin nẹ Tofẹt asan rẹ Jihova jiro ra ra mraro rhe, o de mudia otegodo rẹ uwevwin ri Jihova, ọ da ta kẹ ihwo na eje nẹ,
15 “Ọnana yen oborẹ Jihova rẹ otuofovwin, Ọghẹnẹ rẹ Izrẹl tare, ‘Nighere, me reyọ okpetu eje re me tare nẹ me cha reyọ rhe enu rẹ orere nana kugbe irho rọyen eje cha enu rọyen, kidie ayen ru uyovwin gangan,* ayen rhọnvwe nyo ota mẹẹ.’”
