Jerimaya 33:1-26
33 Ota ri Jihova de bru Jerimaya rhe vwẹ obọ rivẹ rọ je vwọ hẹ asan ra kanrerọ dje vwẹ Otegodo rẹ Ihwo re Rhẹrẹ na, rọ vwọ ta:
2 “Ọnana yen oborẹ Jihova Ọmemama rẹ akpọ na tare, Jihova rọ marọ je reyọ vwo vi kokoroko; Jihova yen odẹ rọyen,
3 ‘Se vwe, ke me cha kpahen kẹ wẹ je vuẹ wẹ erọnvwọn ride ru wo che se vwo ẹruọ rọyeen, ru wọ je rhe riẹn jovwoo.’”
4 “Kidie ọnana yen oborẹ Jihova Ọghẹnẹ rẹ Izrẹl ta kpahen iwevwin rehẹ orere nana kugbe iwevwin rẹ ivie ri Juda re kporon totọ fikirẹ ogba ra gba riariẹ vẹ ọlọkọ,
5 kpahen ihwo re cha che rhi nene ihwo ri Kaldia na họnre, re nẹrhẹ irivwin rẹ ihwo re me teyen hwe fikirẹ ophu mẹ kugbe ophu ọgangan mẹ vọn asan nana, ihwo rẹ umiovwo rayen nẹrhẹ mi si opharo mẹ nu vwọ kẹ orere nana:
6 ‘Nighere me cha nẹrhẹ oma rọyen gan je kẹ omakpokpọ, mi che sivwin ayen je kẹ ayen ufuoma buebun vẹ uyota.
7 Me cha reyọ ihwo ri Juda vẹ ihwo rẹ Izrẹl re mu yanran rhivwin rhe, ke me cha bọn ayen gan kirobo ri mi ruru vwẹ ọtonphiyọ.
8 Mi che ru ayen fon vwo nẹ abe rẹ umwemwu eje rẹ ayen ru vwọso ovwẹ, me cha vwẹ urhiẹchọ rayen vẹ abe rẹ umwemwu eje rẹ ayen ru vwọso ovwẹ vwo ghovwo ayen.
9 Odẹ rẹ orere nana cha nẹrhẹ me ghọghọ, orere nana cha nẹrhẹ ihwo vwẹ ejiro vẹ urinrin vwọ kẹ vwẹ vwẹ obaro rẹ ẹgborho rẹ akpọ na eje ri che nyo vwọ kpahen uyoyovwin eje ri mi ru kẹ ayen. Oshọ ko che mu ayen, kẹ ayen cha phariẹ fikirẹ uyoyovwin eje vẹ ufuoma re me cha vwọ kẹ.’”
10 “Ọnana yen oborẹ Jihova tare: ‘Vwẹ asan nana rẹ ovwan cha ta kpahen nẹ otọ fefe rẹ ohwo yẹrẹ eranvwe hephaa na, kugbe irere ri Juda vẹ irhuvwun ri Jerusalẹm re dia ofefe rẹ ohwo yẹrẹ eranvwe hephaa na, ka cha rhoma nyo
11 edo rẹ omavwerhovwẹn kugbe edo rẹ aghọghọ, urhuru rẹ ọshare ọpha kugbe urhuru rẹ ọpha, urhuru rẹ ihwo re tanẹ: “Vwẹ akpẹvwẹ kẹ Jihova rẹ otuofovwin, kidie Jihova ọyen ohwo esiri; ẹguọnọ rọyen ro jẹ rhẹriẹ na herọ bẹdẹ!”’
“‘Ayen cha vwẹ izobo rẹ akpẹvwẹ rhe uwevwin ri Jihova, kidie me cha reyọ ihwo re mu nẹ otọ na yanran rhivwin rhe kirobo rọ hepha vwẹ ọtonphiyọ,’ ọtiọyen Jihova tare.”
12 “Ọnana yen oborẹ Jihova rẹ otuofovwin tare: ‘Asan rẹ ichuru da sa re odin, rẹ ichuru rẹ isuigodẹ de se rovwoma cha rhoma dia otọ fefe nana rẹ ohwo yẹrẹ eranvwe hephaa na, kugbe irere rọyen eje.’
13 “‘Isuigodẹ cha rhoma kere igodẹ rayen vwẹ irere rẹ ekogho rẹ igbenu na, vwẹ irere rẹ ushekpotọ na, vwẹ irere rẹ obọrhen ọnre na, vwẹ otọ ri Bẹnjamin, vwẹ ekogho re riariẹ Jerusalẹm phiyọ, kugbe irere ri Juda,’ ọtiọyen Jihova tare.”
14 “‘Nighere! Ọke cha,’ ọtiọyen Jihova tare, ‘ri mi che vwo ru ive esiri ri mi ve kpahen uwevwin Izrẹl kugbe uwevwin ri Juda gba.
15 Vwẹ ọke yena, me cha nẹrhẹ oghọn rẹ ọvwata ọvo yoro phia vwọ kẹ Devid, o che brorhiẹn ọsoso vẹ ophiọnphiọn vwẹ otọ na.
16 Vwẹ ọke yena, e che sivwin Juda, Jerusalẹm je cha dia vwẹ ofuvwegbe. Ọnana yen obo re che se: Jihova yen Ophiọnphiọn rẹ Avwanre.’”
17 “Kidie ọnana yen oborẹ Jihova tare: ‘O rhe vwo ọke vuọvo rẹ ohwo rẹ urhiẹ ri Devid che vwo jẹ ekete rẹ uwevwin rẹ Izrẹl echidiaa,
18 o vwo ọke vuọvo re che vwo jẹ orherẹn rọ dia ohwo ri Livae ro che mudia obaro mẹ ro vwo ze izobo rẹ ẹtorhẹ, torhẹ izobo rẹ eka, kugbe izobo efa ẹmrẹẹ.’”
19 Ota ri Jihova da rhoma bru Jerimaya rhe:
20 “Ọnana yen oborẹ Jihova tare, ‘Ọ da dianẹ ovwan se miovwo ọphọ mẹ kpahen aruphẹn kugbe ọphọ mẹ kpahen ason, rẹ ovwan da dobọ rẹ aruphẹn kugbe ason ji ri vwo jẹ omaẹvwọphia vwẹ ọke rayen,
21 ọke yena ọvo yen e se vwo miovwo ọphọ re me vẹ Devid odibo mẹ rere, ro de jẹ ọmọ ro che sun kerẹ ovie vwẹ ekete rọyen evwo, ọtiọyen ji te ọphọ mẹ vẹ irherẹn re dia ihwo ri Livae na, idibo mẹ.
22 Kirobo re che se kere isio rẹ idjuvwu* naa, ra je cha sa vwanvwe ekpẹn rẹ abadi naa na, ọtiọyen mi che ru emọ* rẹ odibo mẹ Devid kugbe ihwo ri Livae ri gbodibo kẹ vwẹ na bunphiyọ.’”
23 Ota ri Jihova da rhoma bru Jerimaya rhe:
24 “Wo ji rhi vwo oniso rẹ oborẹ ihwo nana ta, nẹ, ‘Jihova cha sen erua ivẹ rọ jẹre na’? Ayen rhe muọghọ kẹ ihwo mẹẹ, ayen rhe ji nẹ ayen kerẹ ẹgborhoo.
25 “Ọnana yen oborẹ Jihova tare: ‘Kirobo re me nabọ re ọphọ rẹ aruphẹn kugbe ason na je vwẹ irhi rẹ idjuvwu vẹ akpọ na vwo mu na,
26 o ji vwo ọke vuọvo me cha vwọ sen emọ* ri Jekọp kugbe e rẹ odibo mẹ Devid, ri mi de jẹ isun ri che sun vwẹ enu rẹ emọ* rẹ Ebraham, Aizik, kugbe Jekọp ẹreyọ vwẹ ohri rayeen. Kidie mi che koko ihwo rayen re mu yanran na rhivwin rhe ji gbe arodọnvwẹ kẹ ayen.’”
