Jerimaya 48:1-47
-
Aroẹmrẹ vwọ kpahen Moab (1-47)
48 Vwọ kpahen Moab, ọnana yen oborẹ Jihova rẹ otuofovwin, Ọghẹnẹ rẹ Izrẹl tare:
“Okpetu rode kẹ Nibo kidie a ghwọrerọ nure!
A nẹrhẹ oma vo Kiriateim, a da je reyọ.
A nẹrhẹ oma vo adjarhọ ro fuoma na* je guọghọ totọ.
2 Ayen rhe jiri Moab ọfaa.
Vwẹ Hẹshbọn ayen jiroro rẹ eshe rọyen nẹ,
‘Yanrhe, e jẹ avwanre phioba phiyọ kerẹ ẹgborho.’
Wẹ, E Madmẹn, fotovwin,Kidie ọlọkọ na nene uwe.
3 E nyo edo rẹ ukperi rẹ oviẹ vwẹ Horoneim,Edo rẹ oghwọrọ kugbe eshe rode.
4 A ghwọrọ Moab nure.
Imitete rọyen viẹ.
5 Ayen viẹ rẹ ayen vwo yerẹn ugbenu ri Luhit na.
Ayen nyo edo rẹ oviẹ fikirẹ oghwọrọ na rẹ ayen vwo wontọ nẹ Horoneim cha.
6 Ovwan djẹ, ovwan djẹ fikirẹ arhọ* rẹ ovwan!
Ovwan dia kerẹ urhe ri junipa vwevunrẹ aton na.
7 Kidie nẹ wọ vwẹroso iruo vẹ efe wẹn,E ji che phi we kparobọ.
E che mu Kimọsh kugbe irherẹn rọyen,Vẹ isun rọyen kpo ighuvwu.
8 Ọ rọ ghwọrọ na cha ro korere korere,O vwo orere vuọvo rọ cha vabọọ.
A cha ghwọrọ iyara* na,Kugbe otọ ọriẹriẹriẹ na kirobo rẹ Jihova tare.
9 Vwẹ oka vwo vi kẹ Moab,Kidie ọ cha djẹ ra vwọ ghwọrọ na,Irere rọyen che hirhephiyọ obo ri muẹ ohwo oshọ,Ohwo vuọvo cha dia evun rayeen.
10 Ekan kẹ ohwo rọ nabọ jomaotọ ru oborẹ Jihova guọnọree!
Ekan kẹ ohwo ro siomauko rọ vwọ reyọ ọlọkọ rọyen vwo ku ọbara kuotọ!
11 E ji rhi kpokpo ihwo ri Moab rhanvwẹ ọke rẹ eghene rayeen,Kerẹ iwaini rọ nabọ djidji kpotọ.
E ji rhi ku ayen nẹ ochẹ ọvo kpo ọfaa,Ayen ji rhi kpo ighuvwu dẹvoo.
Ọyensorọ avwerhen rayen je vwọ hẹ obo rọ hepha jovwo,Rẹ ọnrhe rayen ji rhi wenee na.
12 “‘Ọtiọyena nighere! ọke cha,’ ọtiọyen Jihova tare, ‘ri mi che vwo ji ihwo nẹ i re ku ayen. Kẹ ayen che ku ayen vwo nẹ echẹ rayen je guọghọ echẹ ride rayen na chẹghẹchẹghẹ.
13 Oma ri Kimọsh cha vo ihwo ri Moab kirobo rẹ oma ri Bẹtẹl rẹ ayen vwẹroso vo uwevwin rẹ Izrẹl.
14 Diesorọ ovwan vwọ gbaudu tanẹ, “Avwanre egba ofovwin re choma kẹ ofovwin”?’
15 ‘A ghwọrọ Moab nure,Ivwighrẹn kpare rhe irere rọyen,A teyen ighene eshare rọyen ri me yovwin hwe,’
Ọtiọyen Ovie na rẹ odẹ rọyen dia Jihova rẹ otuofovwin na tare.
16 Okpetu cha kẹ ihwo ri Moab kẹrẹkpẹ,Eshe rayen rhe siẹkẹrẹ kpakpata.
17 Ihwo eje re riariẹ ayen phiyọ che vweri vwọ kẹ ayen,Ihwo eje re riẹn odẹ rayen.
Ta kẹ ayen nẹ, ‘E vwirhin ọkpọ rode na, ọkpọ rẹ erhuvwu na!’
18 Wontọ nẹ urinrin wẹn,Rere wo chidia totọ vẹ urhuru rẹ ame ro si we na,* E ọmọtẹ rọ dia Daibọn,Kidie ọ rọ ghwọrọ Moab na kpare rhe rhe vwọso owẹ,Ọ cha ghwọrọ asan wẹn sansan ra gbogba riariẹ na totọ.
19 Ovwan mudia vwẹ orhoma rẹ idjerhe na rere ovwan ni, ovwan ihwo re dia Aroa.
Ovwan nọ ọshare rọ djẹ vẹ aye rọ djẹ nẹ, ‘Die yen phiare?’
20 A nẹrhẹ oma vo Moab je vwẹ uguegue vwọ ghwiẹ.
Ovwan vwerhe oma je viẹ.
Ovwan ghwoghwo vwẹ Anọn nẹ a ghwọrọ Moab re.
21 “Ọghẹnẹ guẹdjọ rẹ otọ ọriẹriẹriẹ na re, o guẹdjọ ri Holọn, Jehaz, Mẹfahat;
22 o guẹdjọ ri Daibọn, Nibo, kugbe Bẹt-diblateim;
23 o guẹdjọ ri Kiriateim, Bẹt-gemọl, kugbe Bẹt-miọn;
24 o guẹdjọ ri Kiriọt kugbe Bọzra; o ji guẹdjọ rẹ irere rẹ otọ ri Moab eje, te i ri shereri te e re kẹrẹre.
25 ‘A reyọ ẹgba* ri Moab mie re;E vwirhin ugbobọ rọyen re,’ ọtiọyen Jihova tare.
26 ‘Jẹ udi muo, kidie ọ kparoma rọyen kpenu vwọso Jihova.
Moab gbune vwẹ enu rẹ obo rọ kpare,O rhi hirhephiyọ oborẹ ihwo vwọ jehwẹ re.
27 Ọ dia obo ra vwọ jehwẹ yen wo nẹ Izrẹl phiyọ?
Kẹ ohri rẹ iji yen a da mrẹ,Rọ nẹrhẹ wo kpogho uyovwin wẹn je ta ota kpahọn?
28 Ovwan vrẹn nẹ irere na rere ovwan ra dia enu rẹ oragha na, ovwan ihwo re dia Moab,Ovwan dia kerẹ erurẹ rọ bọn ẹho rọyen vwẹ orhoma rẹ inu rẹ igbenu na.’”
29 “Avwanre nyo kpahen omaẹkparọ ri Moab—o phuoma mamọ—Avwanre nyo kpahen aroeyinvwo rọyen, omaẹkparọ rọyen, omaephuo rọyen, kugbe omaẹkparọ rẹ ubiudu rọyen.”
30 “‘Me riẹnre nẹ ophu muo mamọ,’ ọtiọyen Jihova tare,‘Ẹkẹvuọvo eta ifefe rọyen na che vwo otọọ.
Ayen che ru emu vuọvoo.
31 Kọyensorọ mi che vwo vwerhe oma fikirẹ Moab,Rẹ me cha vwọ viẹ fikirẹ Moab ejeJi dirhivwẹn fikirẹ eshare ri Kiẹ-hirẹs.
32 Oviẹ re me cha viẹ fiki wẹn, E ivaini ri Sibma,Cha vrẹ oviẹ re me viẹ kẹ Jeza.
Eghọn boba wẹn re pha wọnwọnwọn na te abadi na re.
Ayen wan abadi na vrẹ, ayen te Jeza re.
Ọ rọ ghwọrọ na wontọ rhe enu rẹ emamọ rẹ ọke uvo wẹnVẹ orhọ rẹ igrepu wẹn nure.
33 E si omavwerhovwẹn kugbe aghọghọ vwo nẹ ogba ra kọn irhe re mọ emamọ phiyọKugbe otọ ri Moab.
Me dobọ rẹ iwaini rọ djẹ nẹ asan re de mie iwaini cha na ji.
O vwo ohwo vuọvo ro che chiyin vẹ ukperi rẹ aghọghọọ.
Ukperi na cha dia oka rẹ ukperi ọfa.’”
34 “‘Edo rẹ ukperi ọvo nẹ Hẹshbọn re te Ẹliela.
Ayen kpare upho rayen kpenu, e de nyo vwẹ Jehaz,Vwo nẹ Zoa re te Horoneim re te Ẹglat-shẹlaishiya.
Ame ri Nimrim dede cha kpọ yamu.
35 Mi che ruo, a rha cha mrẹ ohwo rọ cha reyọ okẹ rhe enu rẹ asan ri kpenu naa,’‘A rha je cha mrẹ ohwo ro che ze izobo vwọ kẹ ọghẹnẹ rọyen vwẹ Moabuu,Ọtiọyen Jihova tare.
36 Ọyena yen sorọ ubiudu mẹ che vwo dirhivwẹn* fikirẹ Moab kerẹ iflutu,*Rẹ ubiudu mẹ che vwo dirhivwẹn* fikirẹ ihwo ri Kiẹ-hirẹs kerẹ iflutu.*
Kidie efe ro kokori na cha ghwọrọ.
37 A wanre kuyovwin kuyovwin,Ji bru kẹtuegban kẹtuegban.
E bru era phiyọ kobọ kobọ,Ewun rẹ esiso jehẹ ehun rayen!’”
38 “‘O vwo emu vuọvo vwẹ enu rẹ uwevwin ri Moab ejeVẹ ọsuorere rọyen ejee,Jokparẹ omaevwerhe.
Kidie me ghwọrọ MoabKerẹ ochẹ re do kufia,’ ọtiọyen Jihova tare.
39 ‘Nighe oborẹ oshọ muo! Ovwan vwerhe oma!
Nighe oborẹ Moab kuomarhẹriẹ vẹ omavovwẹ!
Moab rhi hirhephiyọ obo ra vwọ jehwẹ,Orọnvwọn ro muẹ ihwo eje re riarierẹ oshọ.’”
40 “Kidie ọnana yen oborẹ Jihova tare:
‘Nighere! Kerẹ ugo rọ rhan cha otọ,Ọ cha riẹn ibekpe rọyen vwọso Moab.
41 E che phi irho na kparobọJe reyọ asan egangan rọyen.
Vwẹ ẹdẹ yena ubiudu rẹ egba ofovwin ri MoabCha dia kerẹ ubiudu rẹ aye rọ chuvwiẹ.’”
42 “‘A cha ghwọrọ Moab, ọ rha cha dia ẹgborhoo,Kidie ọ kpare oma rọyen kpenu vwọso Jihova.
43 Uguegue, ukpotọ, kugbe ufi hẹ obaro wẹn,E owẹ rọ dia Moab,’ ọtiọyen Jihova tare.
44 ‘Kohwo kohwo rọ djẹ fikirẹ uguegue che she ro ukpotọ na,Kohwo kohwo ro nẹ evunrẹ ukpotọ na cha, ufi che muo.’
‘Kidie me cha reyọ ukpe rẹ ojaẹriọ rayen vwọ rhe enu ri Moab,’ ọtiọyen Jihova tare.
45 ‘Ihwo re djẹ rẹ oma rhọ cha domaji vwevunrẹ uhoho ri Hẹshbọn.
Kidie erhanre che nẹ Hẹshbọn rheẸkuerhanre che nẹ evunrẹ Saihọn rhe.
Ọ cha torhẹ arhare ri MoabKugbe ekpehruyovwin rẹ emọ rẹ ozighi na.’
46 ‘Okpetu rode kẹ wẹ, E Moab!
Ihwo ri Kimọsh ghwọrọ kufia.
Kidie e mu emeshare wẹn yanran,E ji mu emetẹ wẹn kpo ighuvwu.
47 Ẹkẹvuọvo mi che koko ihwo ri Moab re mu reyọ vwẹ ẹbẹre rọ koba rẹ ẹdẹ na,’ ọtiọyen Jihova tare.
‘Etinẹ yen ovuẹ rẹ ẹdjọeguo kpahen Moab de vwoba.’”
Eta rehẹ obotọ na
^ Yẹrẹ “vo asan ro fuoma ro kpenu na.”
^ Yẹrẹ “erhi.”
^ Yẹrẹ “ushekpotọ.”
^ Yẹrẹ ọ sa dia, “chidia otọ ọyaya.”
^ Yẹrẹ “idjo.”
^ Yẹrẹ “mẹ cha vwọ riọ.”
^ Kọyen, iflutu re hworo vwo vwerhe oma vwẹ ughworivwin.
^ Yẹrẹ “mẹ cha vwọ riọ.”
^ Kọyen, iflutu re hworo vwo vwerhe oma vwẹ ughworivwin.
