Jerimaya 10:1-25
10 Nyo ota rẹ Jihova ta kpahen owẹ, E uwevwin rẹ Izrẹl.
2 Ọnana yen oborẹ Jihova tare:
“Ovwan vwẹrokere ẹkuruemu rẹ ẹgborho naa,Ovwan djoshọ fikirẹ eka rẹ idjuvwu naaKidie oshọ rayen muẹ ẹgborho na.
3 Kidie ẹkuruemu rẹ ihwo na vwo otọọ.
Ọyen urhe rẹ egbo ra gbọ she,Rẹ ọwena vwẹ ekuakua rẹ iruo rọyen vwọ kare.
4 Ayen da vwẹ idọnọ efuanfon kugbe iro vwọ rhuẹrẹ fiaJe reyọ ihama kugbe ipẹrẹn vwo hwe mu rere o vwo je she.
5 Kerẹ urhe re ku ewun phiyọ vwẹ udju rẹ ikukumba, ayen cha sa ta otaa;E muẹ ayen kidie ayen cha sa yaan.
Wọ djoshọ rayeen kidie ayen cha sa wan ohwo omaa,Yẹrẹ ayen che se ru emu esiri vuọvoo.”
6 O vwo ohwo vuọvo rọ họhọ owẹẹ, E Jihova.
Wọ rhoro, odẹ wẹn rhoro, wo ji vwo ẹgba.
7 Ono yen che jẹ oshọ wẹn ẹdjẹ, E Ovie rẹ ẹgborho na, kidie ofori nẹ a djoshọ wẹn;Kidie vwẹ ohri rẹ egbaghwanre rẹ ẹgborho na eje kugbe uvie sansan rayen eje,O vwo ọvuọvo rọ họhọ owẹ kakakaa.
8 Ayen eje ẹkpa ayen vwo iroroo.
Odjekẹ ro nẹ obọ rẹ urhe rhe vwo otọ kakakaa.*
9 E mu idọnọ efuanfon re duvwunru pẹpẹghẹ vwo nẹ Tashish rhe, ji mu oro vwo nẹ Yufaz rhe,Iruo rẹ ọwena, iruo rẹ abọ rẹ odjogun.
Oruru rẹ iblu kugbe ipọpo yen e vwo ru ewun rayen.
Ewena yen ru ayen eje.
10 Ẹkẹvuọvo Jihova yen Ọghẹnẹ rẹ uyota.
Ọyen Ọghẹnẹ ro jeghwo na kugbe Ovie ri bẹdẹ.
Fikirẹ ophu rọyen otọrakpọ na che kpogho,O vwo ẹgborho vuọvo ro se chiri ophu ọgangan rọyeen.
11 * Ọnana yen oborẹ ofori nẹ wọ ta kẹ ayen:
“Eghẹnẹ re ma idjuvwu vẹ otọrakpọ naaCha ghwọrọ kufia vwo nẹ akpọ na kugbe vwo nẹ otọ rẹ idjuvwu nana.”
12 Ọyen yen Ohwo rọ vwẹ ogangan rọyen vwọ ma otọrakpọ na,Ohwo rọ vwẹ aghwanre rọyen vwọ ma otọ naJe vwẹ ẹruọ rọyen vwọ riẹn idjuvwu na phiyọ.
13 Ọke rọ da van,Ame rẹ idjuvwu na ki kpogho,Ọ nẹrhẹ evwru nẹ oba rẹ akpọ na kpenu.
Ọ nẹrhẹ enu nyavwaro ọke rẹ osio da rhọ,Ọ je reyọ odju vwo nẹ iwevwin rọ sẹro rẹ ekuakua phiyọ cha.
14 Kohwo kohwo ruẹ kerẹ ohwo ro vwo iroro vẹ erianriẹẹn.
A cha nẹrhẹ oma vo kodjogun kodjogun fikirẹ ema ra kare na;Kidie ema rẹ utehru rọyen* ophiẹnvwe,Ẹwẹn* hẹ evun rayeen.
15 Ayen emu ifefe,* iruo rẹ ehwẹjẹ.
Ẹdẹ rẹ ẹdjọeguo rayen de te, ayen cha ghwọrọ kufia.
16 Ẹkẹn ri Jekọp họhọ erọnvwọn nanaa,Kidie ọyen yen Ohwo ro ma erọnvwọn eje,Izrẹl yen ọkpọ rẹ uku rọyen.
Jihova rẹ otuofovwin yen odẹ rọyen.
17 Ghwẹ ekuakua wẹn koko vwo nẹ otọ na,E aye rọ dia orere ra gba riariẹ phiyọ na.
18 Kidie ọnana yen oborẹ Jihova tare:
“Nighere, mi do ihwo re dia otọ na vwo nẹ otọ na vwẹ ọke nana,Me cha nẹrhẹ ayen rhiẹromrẹ ukpokpogho.”
19 Okpetu rode kẹ vwẹ fikirẹ omaẹwan mẹ!
E che se sivwin omaẹwan mẹ na kpoo.
Me da tanẹ: “Vwọrẹ imuẹro, ọnana ọga mẹ, mi che chirakon rọyen.
20 A guọghọ itughẹ mẹ totọ, a sanvwe ifi rẹ itughẹ mẹ eje.
Emọ mẹ yanjẹ uvwe vwo, ayen rha herọọ.
O vwo ohwo vuọvo ro chekọ rọ cha riẹn amwa rẹ utughẹ mẹ yẹrẹ reyọ vwo vii.
21 Kidie isuigodẹ na dje uruemu rẹ ọhọ hephaa phia,Ayen nọ mie Jihovaa.
Ọyensorọ ayen vwo dje uruemu rẹ ẹkpa phia,Ichuru rayen eje hrabọ.”
22 Kerhọ! Iyẹnrẹn ọvo cha!
Edo rẹ oyanghan rode ọvo nẹ otọ rẹ obohwẹre ọnre na cha,Rọ vwọ nẹrhẹ irere ri Juda dia ifefe, asan rẹ eranko rẹ aghwa* dia.
23 E Jihova, me nabọ riẹn nẹ ohworakpọ che se sun oma rọyeen.
Ohworakpọ rọ yan che se sun ichiyin robọ rọyeen.
24 E Jihova, kpọ vwẹ vi vwevunrẹ orhiẹn ọsoso,Ẹkẹvuọvo ọ dia vwevunrẹ ophu wẹẹn, wo vwo juvwe ẹghwọrọ.
25 Ku ophu ọgangan wẹn ku ẹgborho re kpairoro vrẹ wẹ naKugbe erua ri se odẹ wẹẹn.
Kidie ayen mu Jekọp rọ,E, ayen muro rọ te ẹdia rẹ ayen da ghwọrọ,Ayen de hirhe otọ rọyen phiyọ ofefe.
