Jerimaya 12:1-17
12 Wẹwẹ ọvwata, E Jihova, ọke mi vwo mu ẹdjọ mẹ bru we rhe,Ọke me vwọ ta ota kẹ wẹ kpahen erọnvwọn ri shekpahen orhiẹn ọsoso.
Ẹkẹvuọvo diesorọ o vwo yovwẹn kẹ irumwemwu rẹ ihwo,Diesorọ udu brẹ ihwo rẹ ophiẹnvwee?
2 Wọ kọn ayen, ayen je tan awọ phiyọ otọ re.
Ayen djẹre je mọ emamọ.
Ayen vwẹ unu rayen vwo se we, ẹkẹvuọvo ubiudu* rayen sheri vwọ kẹ wẹ.
3 Ẹkẹvuọvo wọ nabọ riẹn vwẹ, E Jihova, wọ mrẹ vwẹ;Wọ fuẹrẹn ubiudu mẹ wọ da mrẹ nẹ me vwomakpahotọ kẹ wẹ.
Sane ayen phia kerẹ igodẹ re che hwe,Rere wo phi ayen phiyọ ọkọkọ vwọ kẹ ẹdẹ rẹ ihwehwe.
4 Brọke yen otọ na che vwioro kri teBrọke yen ekankọn rẹ kudju kudju cha ya kri te?
Fikirẹ umiovwo rẹ ihwo re dia evun rọyen,A ghwọrọ eranvwe rẹ aghwa kugbe ephran na kufia.
Kidie ayen tare nẹ, “Ọ mrẹ obo re cha phia kẹ avwanree.”
5 Ọ da dianẹ oma rhọ wẹ wo vwo nene ihwo re vwẹ owọ djonẹ vwọ djonẹ,Kẹ mavọ yen wo se vwo nene iyesi djonẹ?
Ọ da tobọ dianẹ wo fiudugberi vwẹ otọ rẹ ufuoma hepha,Mavọ yen ọ cha dia kẹ wẹ vwẹ ohri rẹ egbo djigbri vwẹ orhoma ri Jọdan?
6 Kidie iniọvo robọ wẹn dede, evwruwevwin rẹ ọsẹ wẹn,Nene uwe yerin vwẹ idjerhe rẹ ophiẹnvwe.
Ayen kpare urhuru rayen kpenu vwọso owẹ.
Wọ vwẹrosua ayeen,Ọ da tobọ dianẹ ayen ta ota esiri vwọ kẹ wẹ dede.
7 “Me kpairoro vrẹ uwevwin mẹ; me yanjẹ uku mẹ vwo.
Mi phi ohwo ri mi* vwo ẹguọnọ rọyen mamọ phiyọ obọ rẹ ivwighrẹn rọyen.
8 Uku mẹ rhe dia kerẹ okpohrokpo rọhẹ evunrẹ egbo vwọ kẹ vwẹ.
Kọ guan kẹ vwẹ.
Ọtiọyena ko tun vwe oma.
9 Vwọ kẹ vwẹ, uku mẹ pha kerẹ ọphran ro vwo ikọlọ sansan* rọ ria eranvwe;Ephran efa re ria eranvwe riarierẹ phiyọ, ayen de nene họnre.
Ovwan yanrhe, ovwan ghwomakoko, ovwan eranvwe rẹ aghwa na eje,Ovwan rhe riemu.
10 Isuigodẹ buebun ghwọrọ ogba rẹ ivaini mẹ;Ayen chiyin ẹkẹn rẹ otọ mẹ muotọ.
Ayen hirhe ẹkẹn rẹ otọ mẹ ro je vwe na phiyọ aton fefe.
11 O hirhephiyọ otọ fefe,
O vwiori;*O hirhephiyọ ofefe vwẹ obaro mẹ.
E ru otọ na eje hirhephiyọ ofefe,Ẹkẹvuọvo ohwo vuọvo davwerhọọ.
12 Ihwo re ghwọrọ na wan idjerhe ri miovwirin eje rẹ aton na rhe,Kidie ọlọkọ ri Jihova rhe hwe vwo nẹ ẹtan ọvo rẹ otọ na re te ẹtan ro chekọ.
Ufuoma herọ vwọ kẹ ohwo vuọvoo.
13 Ayen kọn iwiti, ẹkẹvuọvo idjigbẹn yen ayen vunru.
Ayen wian oma guọghọ, ẹkẹvuọvo ayen mrẹ erere vuọvoo.
Oma rẹ orhọ rayen cha vo ayenFikirẹ ophu ọgangan ri Jihova.”
14 Ọnana yen oborẹ Jihova ta kpahen irivẹ mẹ eje re dia irumwemwu, ri djobọte uku re me nẹrhẹ ihwo mẹ Izrẹl re ughwẹ rọyen na: “Nighere, mi ghwie ayen vwo nẹ otọ rayen, mi che ghwie uwevwin ri Juda vwo nẹ ohri rayen.
15 Ẹkẹvuọvo mi de ghwie ayen nu, me cha rhoma gbe arodọnvwẹ kẹ ayen je reyọ ayen ọvuọvo rhivwin kpo uku vẹ otọ rọyen.”
16 “Ọ da dianẹ ayen yono idjerhe rẹ ihwo mẹ je reyọ odẹ mẹ vwo duvwun iyorin nẹ, ‘Rẹ Jihova vwọ herọ na!’ kirobo rẹ ayen yono ihwo mẹ nẹ ayen reyọ Bel vwo duvwun iyorin na, ọke yena ke me cha nẹrhẹ o yovwin vwọ kẹ ayen vwẹ ohri rẹ ihwo mẹ.
17 Ẹkẹvuọvo ayen rha rhọnvwe ru ọtiọyeen, mi ji che ghwie ẹgborho yena, mi che ghwie je ghwọrọ,” ọtiọyen Jihova tare.
