Jerimaya 3:1-25
3 Ihwo nọ: “Ọ da dianẹ ọshare djẹ aye rọyen kpo, aye na da yanran, ọ da rọvwọn ọshare ọfa, kẹ ofori nẹ ọshare na rhoma reyọ aye na rhivwin?”
E ji rhi gbe otọ yena ẹgua karekare nu?
“Wẹ vẹ ihwo buebun gbe ọfanrhiẹn,Kẹ ofori wọ vwọ rhoma rhivwin bru vwe rhe asaọkiephana?” ọtiọyen Jihova tare.
2 “Kpare ẹro wẹn kpenu kpo igbenu itete na rere wo ni.
Tivọ yen e de juwe ẹgba duẹ?
Wo chidia orhoma rẹ idjerhe vwọ kẹ ayen,Kerẹ ohwo rọ kua nẹ asan kpo asan* vwevunrẹ aton.
Wọ vwẹ igberadja egbe vẹ umiovwo wẹnVwo gbe otọ na ẹgua.
3 Kọyensorọ osio tuerii,Osio je rhọ vwẹ ọke osioo.
Wọ pha kerẹ* aye ro gbe igberadja jẹ oma vuọọ;Oma vo owẹẹ.
4 Ẹkẹvuọvo asaọkiephana ku wo kperẹ se vwe,‘Ọsẹ mẹ, wẹwẹ yen ugbeyan mẹ ọkpẹkpẹkpẹ vwo nẹ ọke eghene mẹ rhe!
5 Kẹ ofori nẹ ohwo muophu rhirin bẹdẹ,Yẹrẹ phi ota phiyọ evun ọkieje?’
Ọnana yen oborẹ wọ ta,Ẹkẹvuọvo wo ji ruẹ umiovwo eje ru wo se ru.”
6 Vwẹ ọke rẹ Ovie Josaya, Jihova ta kẹ vwẹ nẹ: “‘Wọ mrẹ oborẹ Izrẹl ro jẹ evun ẹfuọn na ruru? O kpo enu ri kugbenu kugbenu kugbe otọ rẹ kurhe kurhe rode re gbe ọfanrhiẹn.
7 Ọ vwọ tobọ ru erọnvwọn nana eje nu na, mi ji dje ẹvuẹvuẹ nẹ o rhivwin bru vwe rhe, ẹkẹvuọvo o rhivwiin; jẹ Juda rhe nẹ uruemu rẹ ophiẹnvwe rẹ oniọvo rọyen djephia.
8 Me vwọ mrẹ ọyena, me da vwẹ ọbe rẹ orọnvwe-ẹfan vwọ kẹ Izrẹl rọ fuevuun na, mi de siobọno fikirẹ igberadja ro gberi. Ẹkẹvuọvo oshọ mu Juda oniọvo rọyen ro dje uruemu rẹ ophiẹnvwe phiaa; ọ da je yanran re gbe ọfanrhiẹn.
9 O ni ọfanrhiẹn ro gbe na fiemuu, ko gbe otọ na ẹgua ji nene ikuta kugbe irhe gbe igberadja.
10 Dede nẹ enana eje phiare na, oniọvo rọyen Juda ro dje uruemu rẹ ophiẹnvwe phia na rhivwin bru vwe rhe vẹ ubiudu rọyen ejee, omeru yen ọ hepha,’ ọtiọyen Jihova tare.”
11 Etiyin Jihova da ta kẹ vwẹ: “Izrẹl rọ fuevuun na dje uruemu rẹ ọvwata phia vrẹ Juda ro dje uruemu rẹ ophiẹnvwe phia.
12 Yanran wo re ghwoghwo eta nana vwẹ obohwẹre ọnre:
“‘“Rhivwin rhe, E Izrẹl rọ yanjẹ Ọghẹnẹ vwo,” ọtiọyen Jihova tare.’ ‘“Mi che muophu ni wee,* kidie mẹvwẹ ohwo rọ fuevun,” ọtiọyen Jihova tare.’ ‘“Mi che muophu rhirin bẹdẹẹ.
13 Takpe nẹ rhọnvwe abe wẹn, kidie wo gbe vwọso Jihova Ọghẹnẹ wẹn. Wo nene erhorha* mroma vwẹ otọ rẹ kurhe kurhe rode, ẹkẹvuọvo wo nyupho mẹẹ,” ọtiọyen Jihova tare.’”
14 “Rhivwin, e ovwan rẹ emọ re yanjẹ Ọghẹnẹ vwo,” ọtiọyen Jihova tare. “Kidie me rhe dia onini kẹ ovwan* re; me cha reyọ ovwan, ohwo ọvo vwo nẹ orere, ihwo ivẹ vwo nẹ orua, ke me cha reyọ ovwan rhe Zayọn.
15 Me cha kẹ ovwan isuigodẹ ri ruẹ nene obo rehẹ ubiudu mẹ, ayen cha vwẹ erianriẹn kugbe ẹruọ vwọ ghẹrẹ ovwan.
16 Ovwan cha dia buebun ji vwiẹ emọ vwẹ otọ na vwẹ ọke yena,” ọtiọyen Jihova tare. “Ayen rha cha ta ota kpahen ‘ekpeti rẹ ọphọ ri Jihova ọfaa!’ Ayen gbi che roro kpahọn yẹrẹ karophiyọọ, urhuru rọyen gbi che si ayeen, e gbi che ruo ọfaa.
17 Vwẹ ọke yena, kẹ ayen che se Jerusalẹm ekete ri Jihova; ẹgborho na eje ke cha ghwẹkoko rhi jiri odẹ ri Jihova vwẹ Jerusalẹm, ayen gbi che ru uyovwin gangan vwo ru nene ubiudu umwemwu rayeen.”
18 “Vwẹ ọke yena uwevwin ri Juda kugbe uwevwin rẹ Izrẹl cha yan usun, ayen cha yan usun vwo nẹ otọ rẹ obohwẹre ọnre na ra ro otọ re me vwọ kẹ esẹ rẹ ovwan ride nẹ ayen vwọ riuku.
19 Ki mi roro, ‘Ni oborẹ mi phi we phiyọ ohri rẹ emọ na je kẹ wẹ otọ oyoyovwin na, uku ro me yovwin vwẹ ohri rẹ ẹgborho na!’* Mi ji roro nẹ ovwan che se vwe, ‘Ọsẹ mẹ!’ nẹ ovwan che kuomarhẹriẹ rẹ ovwan vwo juvwe enenee.
20 ‘Vwọrẹ uyota, kerẹ aye rọ vwẹ ona rẹ ophiẹnvwe vwọ yanjẹ ọshare rọyen* vwo, ọtiọyen ovwan, E uwevwin rẹ Izrẹl, je vwẹ ophiẹnvwe vwo nene uvwe yerin,’ ọtiọyen Jihova tare.”
21 E nyo edo ọvo vwẹ enu rẹ igbenu itete,Edo rẹ oviẹ kugbe oyare rẹ evwoghovwo rẹ ihwo rẹ Izrẹl,Kidie ayen ru idjerhe rayen gugunu;Jihova Ọghẹnẹ rayen chọrọ ayen ẹro.
22 “Rhivwin rhe, ovwan emọ re yanjẹ Ọghẹnẹ vwo.
Mi che sivwin ovwan, ovwan gbe cha dia ihwo re yanjẹ Ọghẹnẹ vwoo.”
“Avwanre na! Avwanre bru we rhire,Kidie wẹ, E Jihova yen Ọghẹnẹ rẹ avwanre.
23 Vwọrẹ uyota, edo re do vwẹ igbenu itete vẹ igbenu na eyen ophiẹnvwe.
Vwọrẹ uyota, Jihova Ọghẹnẹ rẹ avwanre yen esivwon rẹ Izrẹl.
24 Vwo nẹ ọke eghene rẹ avwanre rhe yen orọnvwọn rẹ oma rọyen vua ohwo* na vwọ reyọ erọnvwọn eje rẹ esẹ rẹ avwanre ride wianre gangan phiyọ,Ọ reyọ ichuru vẹ erhuẹn rayen,Emeshare rayen kugbe emetẹ rayen.
25 E jẹ avwanre sherhẹn totọ vẹ omavovwẹ rẹ avwanre,E jẹ ophọphọvwe rẹ avwanre rhurhu avwanre,Kidie vwo nẹ ọke eghene avwanre rhe rhi te ọke nana,Yen avwanre vẹ esẹ rẹ avwanre vwo ru umwemwu vwọso Jihova Ọghẹnẹ rẹ avwanre,Avwanre ji rhi nyupho ri Jihova Ọghẹnẹ rẹ avwanree.”
Eta rehẹ obotọ na
^ Vwẹ Hibru, “ohwo rẹ Arab.”
^ Vwẹ Hibru, “kerẹ arhare rẹ.”
^ Vwẹ Hibru, “Mi che si opharo phiyọ kẹ wẹẹ.”
^ Yẹrẹ “nene eghẹnẹ erhorha.”
^ Yẹrẹ ọ sa dia, “rhe dia ọshare rẹ ovwan.”
^ Vwẹ Hibru, “ohri rẹ ituofovwin rẹ ẹgborho na.”
^ Vwẹ Hibru, “yanjẹ ọrivẹ rọyen.”
^ Yẹrẹ “yen ọghẹnẹ rẹ oma rọyen vua ohwo.”
