Jerimaya 43:1-13
43 Ọke rẹ Jerimaya vwọ ta eta eje ri nẹ obọ ri Jihova Ọghẹnẹ rayen rhe vwọ kẹ ihwo na eje nu, kota kota rẹ Jihova Ọghẹnẹ rayen vuẹrẹ nẹ ọ ta kẹ ayen,
2 Azaraya ọmọ ri Hoshaya, Johenan ọmọ ri Kariya, kugbe eshare eje re kparoma na da ta kẹ Jerimaya: “Oborẹ wọ ta na efian! Jihova Ọghẹnẹ rẹ avwanre ji we nẹ wọ tanẹ, ‘Ovwan kpo Ijipt ra dia oboyiin.’
3 Ẹkẹvuọvo Barọk ọmọ ri Neraya yen nẹrhẹ wọ ta eta nana rere wo vwo phi avwanre phiyọ obọ rẹ ihwo ri Kaldia na, rẹ ayen vwọ teyen avwanre hwe yẹrẹ mu avwanre kpo ighuvwu vwẹ Babilọn.”
4 Ọtiọyena Johenan ọmọ ri Kariya kugbe inotu rẹ otuofovwin na eje vẹ ihwo na eje de jẹ upho ri Jihova rọ tare nẹ ayen daji otọ ri Juda na enyo.
5 Ukperẹ ọtiọyen, Johenan ọmọ ri Kariya kugbe inotu rẹ otuofovwin na eje da reyọ uchekotọ ri Juda eje ri rhivwin nẹ ẹgborho eje ra hra ayen ra rhe rhe dia otọ ri Juda nene oma.
6 Ayen da reyọ eshare na, eya na, emọ na, emetẹ rẹ ovie na, kugbe kohwo kohwo* rẹ Nẹbuzaradan onotu rẹ ihwo re rhẹrẹ na yan jovwo vwọ kẹ Gẹdalaya ọmọ rẹ Ahaikam ọmọ ri Shefan, ọtiọyen ji te Jerimaya ọmraro na kugbe Barọk ọmọ ri Neraya.
7 Ayen de kpo otọ rẹ Ijipt kidie ayen nyupho ri Jihovaa, ayen yanre shesheri re te Tapanhis.
8 Etiyin ota ri Jihova de bru Jerimaya rhe vwẹ Tapanhis:
9 “Vwẹ obọ wẹn mu ikuta ride rere wo si ayen nu vwẹ asan ra vwẹ ibriki ma vwẹ anurhoro rẹ uwevwin ri Fero vwẹ Tapanhis na, wọ ghwiẹ isimeti rhurhu ayen jẹ ihwo ri Ju na ni we.
10 Ọyena da wan nu, gba ta kẹ ayen nẹ, ‘Ọnana yen oborẹ Jihova rẹ otuofovwin, Ọghẹnẹ rẹ Izrẹl tare: “Nighere, me vwẹ ovuẹ rhe Nẹbukadnẹza* ovie ri Babilọn, odibo mẹ, mi che phi ekete rọyen phiyọ enu rẹ ikuta nana ri mi sinu na, kọ cha vwẹ utughẹ rẹ uvie rọyen vwo vi vwẹ enu rayen.
11 Ọ cha rhe rhi nene Ijipt họnre. Kohwo kohwo rẹ ọtiekọ che hwe, ọtiekọ yen che hwe, kohwo kohwo re che mu, e che muo yanran, kohwo kohwo rẹ ọlọkọ che hwe, ọlọkọ yen che hwe.
12 Mi che phi erhanre phiyọ iwevwin rẹ eghẹnẹ rẹ Ijipt, ovie na kọ cha torhẹ ayen ji mu ayen yanran. Ọ cha vwẹ otọ rẹ Ijipt vwo phopho oma kirobo rẹ osuigodẹ reyọ ewun rọyen vwo phopho, ko che vrẹn nẹ etiyin vwọrẹ ufuoma.*
13 Ọ cha guọghọ ichivwo ri Bẹt-shimẹsh* vwẹ otọ rẹ Ijipt chẹghẹchẹghẹ je vwẹ erhanre vwọ torhẹ iwevwin rẹ eghẹnẹ rẹ Ijipt.”’”
