Jerimaya 35:1-19
-
Ihwo ri Rikab phi udje rẹ ẹmienyo phiyotọ (1-19)
35 Ota ro nẹ obọ ri Jihova bru Jerimaya rhe vwẹ ọke ri Jehoyakim ọmọ ri Josaya, ovie ri Juda, rọ vwọ ta:
2 “Yan kpo uwevwin rẹ ihwo ri Rikab na rere wo nene ayen ta ota je reyọ ayen rhe uwevwin ri Jihova, ro ọvo vwẹ usun rẹ ivun ra da riemu na; wo de ru ọyena nu, gba vwẹ iwaini vwọ kẹ ayen da.”
3 Ọtiọyena me da reyọ Jehazanaya ọmọ ri Jerimaya ọmọ ri Habazinaya, iniọvo rọyen, emọ rọyen eje kugbe orua ri Rikab ejobi
4 ro uwevwin ri Jihova na. Me da reyọ ayen kpo uvun ra da riemu rẹ emọ ri Henan ọmọ rẹ Igdalaya, ohwo rẹ Ọghẹnẹ rẹ uyota na, rọ kẹrẹ uvun ra da riemu rẹ isun na, rọhẹ obenu rẹ uvun ra da riemu ri Measaya ọmọ ri Shalọm, ohwo rọ rhẹrẹ anurhoro na.
5 Etiyin mi de mu iko vẹ iganasi re ku vọn vẹ iwaini phiyọ obaro rẹ ihwo rẹ orua ri Rikab na je ta kẹ ayen nẹ, “Ovwan da iwaini.”
6 Ẹkẹvuọvo ayen da ta: “Avwanre cha da iwainii kidie Jehonadab* ọmọ ri Rikab, ọsẹ rẹ avwanre rode vwẹ iji nana kẹ avwanre nẹ, ‘Ovwan yẹrẹ emọ rẹ ovwan vwẹ ọke vuọvo vwọ da iwainii.
7 Ovwan bọn uwevwiin, kọn ubi ekankọn yẹrẹ kọn yẹrẹ vwo ogba rẹ ivainii. Ukperẹ ọtiọyen, ovwan vwẹ ọkieje vwọ dia itughẹ, rere ovwan sa vwọ dia ọke grongron vwẹ otọ rẹ ovwan dia kerẹ erhorha na.’
8 Ọtiọyena avwanre nyẹme ri Jehonadab ọmọ rẹ ọsẹ rẹ avwanre rode Rikab vwẹ erọnvwọn eje ro ji iji rọyen kẹ avwanre, rẹ avwanre vwo jẹ kiwaini kiwaini ẹda—avwanre, eya rẹ avwanre, emeshare rẹ avwanre, kugbe emetẹ rẹ avwanre.
9 Avwanre je bọn iwevwin rẹ avwanre diaa yẹrẹ kẹ avwanre vwo egba rẹ ivaini yẹrẹ idju yẹrẹ ubi ekankọọn.
10 Itughẹ kọyen avwanre dia rẹ avwanre vwo nyẹme ri Jehonadab* ọsẹ rẹ avwanre rode vwẹ erọnvwọn eje ro ji iji rọyen kẹ avwanre.
11 Ẹkẹvuọvo ọke rẹ Ovie Nẹbukadnẹza* ri Babilọn vwọ kpare rhe vwọso otọ na, avwanre da ta, ‘Ovwan yanrhe rere a ro evunrẹ Jerusalẹm a sa vwọ vabọ rẹ otuofovwin ri Kaldia kugbe ọ ri Siria na,’ ọnana yen sorọ avwanre vwọ dia evunrẹ Jerusalẹm asaọkiephana.”
12 Ota ri Jihova de bru Jerimaya rhe, ọ da ta:
13 “Ọnana yen oborẹ Jihova rẹ otuofovwin, Ọghẹnẹ rẹ Izrẹl tare, ‘Yanran ra ta kẹ ihwo ri Juda vẹ ihwo re dia Jerusalẹm: “Ọ dia ọkieje yen a vwọ vuẹ ovwan nẹ ovwan nyo eta mẹ?” ọtiọyen Jihova tare.
14 “Jehonadab ọmọ ri Rikab vwẹ iji vwọ kẹ emọ rọyen nẹ ayen da iwainii, ayen ru nene eta rọyen na rẹ ayen vwo jẹ iwaini ẹda rhi te ọke na, womarẹ ọyena, ayen ru nene urhi rẹ ọsẹ rayen rode. Ẹkẹvuọvo mi dje ota ẹtẹta kẹ ovwan* jẹ ovwan nyẹme mẹẹ.
15 Ki mi ji idibo mẹ eje emraro na brẹ ovwan cha, mi dje ayen ejejo* nẹ, ‘Biko, ovwan ohwo ọvuọvo kurhẹriẹ vwo nẹ idjerhe rẹ umwemwu rọyen, rere ovwan ru obo ri shephiyọ! Ovwan yan nene eghẹnẹ efa je ga ayeen. Ọke yena kẹ ovwan cha dia otọ re me vwọ kẹ ovwan vẹ esẹ rẹ ovwan ride na. Ẹkẹvuọvo ovwan davwerhọ yẹrẹ kerhọ mẹẹ.
16 Emọ ri Jehonadab ọmọ ri Rikab ru nene iji rẹ ọsẹ rayen rode vwọ kẹ ayen, ẹkẹvuọvo ihwo nana je rhe kerhọ mẹẹ.”’”
17 “Ọtiọyena ọnana yen oborẹ Jihova Ọghẹnẹ rẹ otuofovwin, Ọghẹnẹ rẹ Izrẹl tare: ‘Nighere, me ghwa okpetu eje re me vwẹ orhọesio rọyen kẹ Juda vẹ ihwo eje re dia Jerusalẹm cha enu rayen, kidie me ta ota kẹ ayen ẹkẹvuọvo ayen rhọnvwe kerhọọ, mi dje ayen esese ẹkẹvuọvo ayen rhọnvwe nyoo.’”
18 Jerimaya da ta kẹ evwruwevwin ri Rikab: “Ọnana yen oborẹ Jihova rẹ otuofovwin, Ọghẹnẹ rẹ Izrẹl tare, ‘Kidie nẹ ovwan nyẹme rẹ iji rẹ ọsẹ rẹ ovwan rode Jehonadab ji ru nene iji rọyen eje, rẹ ovwan vwo ru obo rọ vuẹ ovwan dẹn na,
19 ọnana yen oborẹ Jihova rẹ otuofovwin, Ọghẹnẹ rẹ Izrẹl tare: “O rhe vwo ọke vuọvo rẹ ọmọ ri Jehonadab* ọmọ ri Rikab che vwo jẹ ga vwẹ obaro mẹẹ.”’”
Eta rehẹ obotọ na
^ Vwẹ Hibru, “Jọnadab,” obrukrẹ rẹ odẹ na Jehonadab.
^ Vwẹ Hibru, “Jọnadab,” obrukrẹ rẹ odẹ na Jehonadab.
^ Vwẹ Hibru, “Nẹbukadrẹza,” idjerhe ọfa re vwo sio.
^ Vwẹ Hibru, “mi vrẹn edegburhiọke je ta ota kẹ ovwan.”
^ Vwẹ Hibru, “mi vrẹn edegburhiọke ji jẹ ayen.”
^ Vwẹ Hibru, “Jọnadab,” obrukrẹ rẹ odẹ na Jehonadab.
