Jerimaya 26:1-24
26 Vwẹ ọtonphiyọ rẹ usuon ri Jehoyakim ọmọ ri Josaya ovie ri Juda, ota nana de nẹ obọ ri Jihova rhe:
2 “Ọnana yen oborẹ Jihova tare, ‘Mudia otegodo rẹ uwevwin ri Jihova na rere wọ ta ota kpahen* ihwo rẹ irere ri Juda eje re cha cha rhe ga ẹga* vwẹ uwevwin ri Jihova na. Vuẹ ayen erọnvwọn eje ri mi ji iji rọyen kẹ wẹ; wo siẹ ota vuọvo noo.
3 Ọkiọvo ayen cha kerhọ, ayen ọvuọvo mi kurhẹriẹ nẹ idjerhe umwemwu rọyen, ki mi che wene ẹwẹn mẹ kpahen okpetu re me guọnọ reyọ cha enu rayen jovwo na fikirẹ irueru umwemwu rayen.
4 Ta kẹ ayen nẹ, “Ọnana yen oborẹ Jihova tare, ‘Ọ da dianẹ ovwan kerhọ mẹẹ rẹ ovwan de jẹ urhi* mẹ ri mi phi phiyọ obaro rẹ ovwan enene,
5 rẹ ovwan rha je kerhọ rẹ eta rẹ idibo mẹẹ, kọyen emraro ri mi dje ejejo* bru ovwan cha na,
6 ki mi che ru uwevwin nana kerẹ Shailo ji ru orere nana phiyọ emu rẹ ekan vwọ kẹ ẹgborho rẹ akpọ na eje.’”’”
7 Irherẹn na kugbe emraro na vẹ ihwo na eje nyo Jerimaya ọke rọ vwọ ta eta nana vwẹ uwevwin ri Jihova na.
8 Ọke rẹ Jerimaya vwọ ta eta eje rẹ Jihova ji iji kẹ nẹ ọ ta kẹ ihwo na eje nu, irherẹn na kugbe emraro na vẹ ihwo na eje de shabọ phiyọ, ayen da ta: “Wo che jeghwoo.
9 Diesorọ wọ vwọ vwẹ odẹ ri Jihova mraro nẹ, ‘Uwevwin nana cha dia kerẹ Shailo, nẹ a cha ghwọrọ orere nana, ohwo vuọvo gbe cha diaa’?” Ihwo na eje da gba riariẹ Jerimaya phiyọ vwevunrẹ uwevwin ri Jihova na.
10 Ọke rẹ isun ri Juda vwo nyo eta nana, ayen de nẹ uwevwin* rẹ ovie na kpo uwevwin ri Jihova, ayen de chidia asan ra wan rua anurhoro kpokpọ rẹ uwevwin ri Jihova na.
11 Irherẹn na kugbe emraro na da ta kẹ isun na kugbe ihwo na eje nẹ, “Ọshare nana fo ughwu, kidie ọ mraro vwọso orere nana kirobo rẹ ovwan ghwa vwẹ erhọ rẹ ovwan vwo nyo na.”
12 Etiyin Jerimaya da ta kẹ isun na eje kugbe ihwo na eje nẹ, “Jihova yen tare nẹ me ta eta rẹ aroẹmrẹ nana rẹ ovwan nyori na kpahen uwevwin nana vẹ orere nana.
13 Ọtiọyena ovwan rhuẹrẹ idjerhe rẹ ovwan ji wene iruemu rẹ ovwan rere ovwan nyo urhuru rẹ Jihova Ọghẹnẹ rẹ ovwan, Jihova ko che wene ẹwẹn rọyen kpahen okpetu rọ tare nẹ ọyen cha reyọ rhe enu rẹ ovwan na.
14 Ẹkẹvuọvo vwọ kẹ vwẹ, me hẹ obọ rẹ ovwan. Ovwan ru vwe kemu kemu rẹ ovwan niri nẹ o yovwirin ro ji shephiyọ vwẹ ẹro rẹ ovwan.
15 Ovwan riẹn nẹ ovwan da teyen ovwẹ hwe, ọbara rẹ ohwo rẹ abọ rọyen fonro cha dia enu rẹ uyovwin rẹ ovwan kugbe orere nana kugbe ihwo re dia evun rọyen, kidie vwọrẹ uyota, Jihova yen ji vwe rhe ta eta nana eje rẹ ovwan nyori na kẹ ovwan.”
16 Etiyin isun na kugbe ihwo na eje da ta kẹ irherẹn vẹ emraro na nẹ, “Ọshare nana fo ughwuu, kidie odẹ ri Jihova Ọghẹnẹ rẹ avwanre yen ọ vwọ ta ota kẹ avwanre.”
17 Kpobarophiyọ, evo vwẹ usun rẹ ekpako rẹ otọ na de vrẹn, ayen da tuẹn ota ẹta phiyọ kẹ ihwo na eje re ghwẹ koko na nẹ,
18 “Maika ri Morẹshẹt mraro vwẹ ọke rẹ Ovie Hẹzikaya ri Juda, ọ da ta kẹ ihwo ri Juda eje nẹ, ‘Ọnana yen oborẹ Jihova rẹ otuofovwin na tare:
“E che voro Zayọn kerẹ udju,Jerusalẹm che hirhephiyọ asan ra ghwọrọ totọ,Ugbenu rẹ Uwevwin na* mi rhe hirhephiyọ asan ri kpenu vwevunrẹ egbo.”’
19 “Kẹ Ovie Hẹzikaya ri Juda vẹ Juda eje teyenrọ hwe? Ọ rha djoshọ ri Jihova je rẹ Jihova vwọ kẹ ẹroesiri, rẹ Jihova de wene ẹwẹn rọyen kpahen okpetu rọ tare nẹ ọ cha ghwa rhe enu rayen? Ọtiọyena okpetu rode yen avwanre guọnọ sua kẹ oma* rẹ avwanre na.
20 “O vwo ọshare ọfa rọ vwẹ odẹ ri Jihova vwọ mraro, Yuraijah ọmọ ri Shẹmaya ro nẹ Kiriat-jiarim rhe, rọ vwẹ eta re họhọ e rẹ Jerimaya tare vwọ mraro kpahen orere nana kugbe otọ nana.
21 Ovie Jehoyakim kugbe egba eshare rọyen eje vẹ isun na eje vwo nyo eta rọyen na, ovie na kọ guọnọ teyọn hwe. Ọke rẹ Yuraijah vwo nyo kpahọn, oshọ de muo ugege yena, ọ da djẹ kpo Ijipt.
22 Etiyin Ovie Jehoyakim de ji Ẹlnetan ọmọ rẹ Akbọ kugbe eshare efa nene kpo Ijipt.
23 Ayen de mu Yuraijah nẹ Ijipt bru Ovie Jehoyakim rhe, ọ da vwẹ ọlọkọ teyọn hwe ji do orivwin rọyen phiyọ asan re shẹ ihwo ghevweghe phiyọ.”
24 Ẹkẹvuọvo Ahaikam ọmọ ri Shefan bicha Jerimaya, ọtiọyena a rha vwọ kpahotọ vwọ kẹ ihwo na nẹ e teyọn hwee.
