Jerimaya 27:1-22
27 Vwẹ ọtonphiyọ rẹ usuon ri Jehoyakim ọmọ ri Josaya ovie ri Juda, ota nana de nẹ obọ ri Jihova bru Jerimaya rhe:
2 “Ọnana yen oborẹ Jihova ta kẹ vwẹ, ‘Vwẹ ufi vwọ gba urhekpe evo rere wo phi ayen phiyọ ohọre wẹn.
3 Ọyena da wan nu, gba vwẹ ayen rhe ovie rẹ Idọm, ovie ri Moab, ovie rẹ ihwo rẹ Amọn, ovie ri Taya, kugbe ovie ri Saidọn womarẹ ikọn ri bru Ovie Zẹdikaya ri Juda rhe vwẹ Jerusalẹm.
4 Vwẹ iji nana vwọ kẹ ayen vwo rhe inini rayen:
“‘“Ọnana yen oborẹ Jihova rẹ otuofovwin, Ọghẹnẹ rẹ Izrẹl tare; ọnana yen oborẹ ovwan cha ta kẹ inini rẹ ovwan,
5 ‘Mẹvwẹ yen vwẹ ogangan mẹ rode na vẹ ugbobọ mẹ re me riẹn phia vwọ ma akpọ na, ihworakpọ, kugbe eranvwe rehẹ otọrakpọ na; me vwerọ kẹ kohwo kohwo re me guọnọre.*
6 Asaọkiephana mi phi etọ nana eje phiyọ obọ rẹ odibo mẹ Ovie Nẹbukadnẹza ri Babilọn; me tobọ je vwẹ eranvwe rẹ aghwa na vwọ kẹ nẹ e ga.
7 Ẹgborho na eje cha ga vẹ ọmọ rọyen kugbe uvwrọmọ rọyen rhirin re te ọke rẹ usuon rọyen che vwo vwoba, rẹ ẹgborho buebun kugbe ivie ride cha vwọ reyọ vwo ru ọviẹn rayen.’
8 “‘“‘Ọ da dianẹ ẹgborho yẹrẹ uvie ọvo rhọnvwe ga Ovie Nẹbukadnẹza ri Babilọnii, ọ je rhọnvwe phi ohọre rọyen phiyọ otọ rẹ urhekpe rẹ ovie ri Babilọnii, me cha vwẹ ọlọkọ, owẹnvwe, kugbe ọga vwo gboja kẹ ẹgborho yena,’ ọtiọyen Jihova tare, ‘bẹsiẹ me vwọ reyọ obọ rọyen vwọ ghwọrọ ayen re.’
9 “‘“‘Ọtiọyena ovwan kerhọ kẹ emraro rẹ ovwan, ebọepha rẹ ovwan, evwerhevwerhẹn rẹ ovwan, kugbe ihwo rẹ ovwan ri ruẹ imajikii, re ta kẹ ovwan nẹ: “Ovwan cha ga ovie ri Babilọnii.”
10 Kidie ayen mraro rẹ efian kẹ ovwan, rere e vwo mu ovwan kpo otọ oshesheri, me vwọ hra ovwan, kẹ ovwan cha ghwọrọ.
11 “‘“‘Ẹkẹvuọvo ẹgborho ro phi ohọre rọyen phiyọ otọ rẹ urhekpe rẹ ovie ri Babilọn je ga, me cha rhọnvwe kẹ nẹ ọ daji* otọ rọyen, kọn ekankọn phiyọ je dia evun rọyen,’”’” ọtiọyen Jihova tare.
12 Me je ta ota vuọvo nana kẹ Ovie Zẹdikaya ri Juda: “Ovwan phi ohọre rẹ ovwan phiyọ otọ rẹ urhekpe rẹ ovie ri Babilọn rere ovwan ga vẹ ihwo rọyen, kẹ ovwan cha rhọ.
13 Diesorọ wẹ vẹ ihwo wẹn vwo ghwu fikirẹ ọlọkọ, owẹnvwe, kugbe ọga, kirobo rẹ Jihova ta kpahen ẹgborho re rhọnvwe ga ovie ri Babilọnii?
14 Ovwan kerhọ rẹ eta rẹ emraro naa re ta kẹ ovwan nẹ, ‘Ovwan cha ga ovie ri Babilọnii,’ kidie ayen mraro rẹ efian vwọ kẹ ovwan.
15 “‘Kidie mi ji ayeen,’ ọtiọyen Jihova tare, ‘ẹkẹvuọvo ayen vwẹ odẹ mẹ vwọ mraro rẹ efian, ukuotọ rọyen, me cha hra ovwan, kẹ ovwan cha ghwọrọ, te ovwan te emraro re mraro kẹ ovwan na.’”
16 Me da rha ta kẹ irherẹn na vẹ ihwo nana eje nẹ, “Ọnana yen oborẹ Jihova tare, ‘Ovwan kerhọ rẹ eta rẹ emraro rẹ ovwan re mraro kẹ ovwan naa, nẹ, “Nighere! E che mu ekuakua rẹ uwevwin ri Jihova nẹ Babilọn rhivwin rhe kẹrẹkpẹ!” kidie efian yen ayen mraro rọyen kẹ ovwan na.
17 Ovwan kerhọ rayeen. Ovwan ga ovie ri Babilọn, kẹ ovwan cha rhọ. Diesorọ orere nana vwọ dia orere ra ghwọrọre?
18 Ẹkẹvuọvo ọ da dianẹ ayen emraro, ota ri Jihova ji rhe ayen, biko jẹ ayen rẹ Jihova rẹ otuofovwin na nẹ e mu ekuakua ri chekọ vwẹ uwevwin ri Jihova na, uwevwin* rẹ ovie ri Juda, kugbe e rehẹ Jerusalẹm kpo Babilọnii.’
19 “Kidie ọnana yen oborẹ Jihova rẹ otuofovwin na ta kpahen ichivwo na, Abadi na,* erọnvwọn re vwo muẹ eghwa na, kugbe ekuakua ri chekọ ra yan jovwo vwevunrẹ orere nana,
20 rẹ Ovie Nẹbukadnẹza ri Babilọn kuaree vwẹ ọke ro vwo mu Jẹkonaya ọmọ ri Jehoyakim ovie ri Juda, vẹ ihwo ride ri Juda eje kugbe Jerusalẹm vwo nẹ Jerusalẹm kpo ighuvwu vwẹ Babilọn;
21 e, ọnana yen oborẹ Jihova rẹ otuofovwin, Ọghẹnẹ rẹ Izrẹl ta kpahen ekuakua ra yan jovwo vwẹ uwevwin ri Jihova, vwẹ uwevwin* rẹ ovie ri Juda, kugbe vwẹ Jerusalẹm:
22 ‘“E che mu ayen kpo Babilọn, ke cha dia oboyin re te ọke me vwọ davwerhọ rayen,” ọtiọyen Jihova tare. “Ke me cha reyọ ayen rhivwin rhe ji phi ayen phiyọ etinẹ na.”’”
