Jerimaya 42:1-22
42 Etiyin inotu rẹ otuofovwin na eje kugbe Johenan ọmọ ri Kariya, Jezanaya ọmọ ri Hoshaya vẹ ihwo na eje, vwo nẹ ọ rọ ma hanvwe re te ọ rọ ma rho, da yan rhe
2 ayen da ta kẹ Jerimaya ọmraro na: “Biko nyo oyare rẹ avwanre vwọ kẹ ẹroesiri, rere wọ nẹrhovwo rhe Jihova Ọghẹnẹ wẹn fikirẹ avwanre, fikirẹ uchekotọ nana eje, kidie imihwo kọyen chekọ vwẹ usun rẹ ihwo re pha buebun jovwo na kirobo wọ ghwa mrẹ na.
3 E jẹ Jihova Ọghẹnẹ wẹn vuẹ avwanre idjerhe ro fori nẹ avwanre nene kugbe obo ro fori nẹ avwanre ru.”
4 Jerimaya ọmraro na da kpahen kẹ ayen: “Mi nyo oborẹ ovwan tare, mi che nene ovwan nẹrhovwo rhe Jihova Ọghẹnẹ rẹ ovwan vwo nene oyare rẹ ovwan; kota kota rẹ Jihova kpahen kẹ ovwan, me cha vuẹ ovwan. Me cha djahen ota vuọvo vwọ kẹ ovwaan.”
5 Ayen da kpahen kẹ Jerimaya: “E jẹ Jihova dia oseri rẹ uyota rọ je fuevun vwọso avwanre ọ da dianẹ avwanre ru oborẹ Jihova Ọghẹnẹ wẹn wan oma wẹn vuẹ avwanree.
6 Te o yovwirin yẹrẹ ọ brare, avwanre che nyupho ri Jihova Ọghẹnẹ rẹ avwanre, ohwo rẹ avwanre ji we brẹ ra na, rere o se vwo yovwin kẹ avwanre, kidie avwanre che nyupho ri Jihova Ọghẹnẹ rẹ avwanre.”
7 Asaọkiephana ẹdẹ ihwe vwọ wan nu, ota ri Jihova de bru Jerimaya rhe.
8 Ọtiọyena o de se Johenan ọmọ ri Kariya kugbe inotu rẹ otuofovwin na eje re vẹ ọyen gba herọ kugbe ihwo na eje vwo nẹ ọ rọ ma hanvwe re te ọ rọ ma rho.
9 Ọ da ta kẹ ayen: “Ọnana yen oborẹ Jihova Ọghẹnẹ rẹ Izrẹl ohwo rẹ ovwan ji vwe bru ra ra rẹ vwọ kẹ ẹroesiri tare:
10 ‘Ọ da dianẹ ovwan cha ghene daji otọ nana, ke me cha bọn ovwan, me cha guọghọ ovwaan, ke me cha kọn ovwan, mi che ghwie ovwaan, kidie mi che wene ẹwẹn mẹ kpahen* okpetu re me so vwọ kẹ ovwan na.
11 Ovwan djoshọ fikirẹ ovie ri Babilọn rẹ oshọ rọyen muẹ ovwan naa.’
“‘Ovwan djoshọ fiki rọyeen,’ ọtiọyen Jihova tare, ‘kidie me vẹ ovwan herọ ri mi vwo sivwin ovwan ji si ovwan nẹ obọ rọyen.
12 Mi che gbe arodọnvwẹ kẹ ovwan, ko ji che gbe arodọnvwẹ kẹ ovwan je reyọ ovwan rhivwin kpo otọ rẹ ovwan.
13 “‘Ẹkẹvuọvo ọ da dianẹ ovwan tare nẹ, “Ẹjo, avwanre cha daji otọ nanaa!” rẹ ovwan de jẹ upho ri Jihova Ọghẹnẹ rẹ ovwan enyo
14 womarẹ ovwan vwọ tanẹ, “Ẹjo, ukperẹ ọyena, avwanre che kpo otọ rẹ Ijipt, asan rẹ avwanre de che jẹ ofovwin ẹmrẹ yẹrẹ re de che jẹ edo rẹ ọgban enyo yẹrẹ rẹ owẹnvwe rẹ ibrẹdi de che jẹ avwanre ehwe; etiyin yen avwanre cha dia,”
15 ovwan gbe nyo ota ri Jihova, E uchekotọ ri Juda. Ọnana yen oborẹ Jihova rẹ otuofovwin, Ọghẹnẹ rẹ Izrẹl tare: “Ọ da dianẹ ovwan brorhiẹn kokoroko nẹ ovwan che kpo Ijipt, rẹ ovwan de kpo oboyin ra dia,*
16 ọke yena, ọlọkọ rẹ oshọ rọyen muẹ ovwan na kọ cha vwa ovwan vwẹ oboyin vwẹ otọ rẹ Ijipt, owẹnvwe rẹ oshọ rọyen muẹ ovwan na che nene ovwan kpo Ijipt, oboyin kọyen ovwan de che ghwu.
17 Ihwo eje ri brorhiẹn ri vwo kpo Ijipt ra dia oboyin che ghwu womarẹ ọlọkọ, owẹnvwe, kugbe ọga. O vwo ọvuọvo vwẹ usun rayen rọ cha rhọ yẹrẹ vrabọ rẹ okpetu re me cha reyọ rhe enu rayeen.”’
18 “Kidie ọnana yen oborẹ Jihova rẹ otuofovwin, Ọghẹnẹ rẹ Izrẹl tare: ‘Kirobo ri mi ku ophu mẹ kugbe ophu ọgangan mẹ ku ihwo re dia Jerusalẹm, ọtiọyen mi ji che ku ophu ọgangan mẹ ku ovwan ọ da dianẹ ovwan kpo Ijipt, kẹ ovwan cha dia ekan, obo ri muẹ ohwo oshọ, obo ra reyọ vwọ hanrha ekan, kugbe ehwẹjẹ, ovwan rha cha mrẹ etinẹ na ọfaa.’
19 “Jihova ta ota vwọso ovwan nure, E uchekotọ ri Juda. Ovwan kpo Ijiptii. Ovwan me riẹn vwọrẹ imuẹro nẹ me vwẹ orhọesio kẹ ovwan nonẹna
20 nẹ oruchọ rẹ ovwan cha so ughwu vwọ kẹ ovwan. Kidie ovwan yen ji vwe bru Jihova Ọghẹnẹ rẹ ovwan ra nẹ, ‘Nene avwanre nẹrhovwo rhe Jihova Ọghẹnẹ rẹ avwanre, rere wọ vuẹ avwanre erọnvwọn eje rẹ Jihova Ọghẹnẹ rẹ avwanre tare, kẹ avwanre che ruo.’
21 Me vuẹ ovwan nonẹna, ẹkẹvuọvo me riẹnre nẹ ovwan che nyupho ri Jihova Ọghẹnẹ rẹ ovwaan yẹrẹ ru kemu kemu rọ vuẹ vwẹ nẹ me vuẹ ovwaan.
22 Ọtiọyena ovwan riẹn vwọrẹ uyota nẹ ovwan che ghwu womarẹ ọlọkọ, owẹnvwe, kugbe ọga vwẹ asan rẹ ovwan guọnọ ra ra dia na.”
