Jerimaya 37:1-21
37 Ovie Zẹdikaya ọmọ ri Josaya da tuẹn usuon phiyọ vwẹ ẹdia ri Konaya* ọmọ ri Jehoyakim, kidie Ovie Nẹbukadnẹza* ri Babilọn reyerọ vwo mu ovie vwẹ otọ ri Juda.
2 Ẹkẹvuọvo ọ vẹ idibo rọyen kugbe ihwo rẹ otọ na kerhọ rẹ eta rẹ Jihova womarẹ Jerimaya ọmraro na ta naa.
3 Ovie Zẹdikaya de ji Jehukal ọmọ ri Shẹlẹmaya kugbe Zẹfanaya ọmọ ri Measaya orherẹn na bru Jerimaya ọmraro na ra: “Biko nene avwanre nẹrhovwo rhe Jihova Ọghẹnẹ rẹ avwanre.”
4 Jerimaya yancha yankpo odedede vwẹ ohri rẹ ihwo na kidie ayen ji rhi muo phiyọ uwodii.
5 Asaọkiephana otuofovwin ri Fero kparoma nẹ Ijipt re, ihwo ri Kaldia re gba riariẹ Jerusalẹm de nyo kpahen ayen. Ọtiọyena ayen de siomareyọ vwo nẹ Jerusalẹm.
6 Etiyin ota ri Jihova de bru Jerimaya ọmraro na rhe:
7 “Ọnana yen oborẹ Jihova Ọghẹnẹ rẹ Izrẹl tare, ‘Ọnana yen oborẹ wọ cha ta kẹ ovie ri Juda ro ji we rhe rhe nọ mie vwe na: “Nighere! Otuofovwin ri Fero rọ cha cha rhe vwẹ ukẹcha kẹ wẹ na che rhivwin kpo otọ rọyen, Ijipt.
8 Ihwo ri Kaldia na che rhivwin rhe rhi nene orere nana họnre, ayen cha reyọ je vwẹ erhanre torhẹ.”
9 Ọnana yen oborẹ Jihova tare, “Ovwan phiẹn oma* rẹ ovwaan rẹ ovwan da tanẹ, ‘Vwọrẹ imuẹro, ihwo ri Kaldia na che rhivwin rhee,’ kidie ayen che jẹ chaa.
10 Ọ da tobọ dianẹ ovwan joma teyen ọsoso rẹ otuofovwin ri Kaldia ri nene ovwan họnra na hwe, rẹ ihwo rayen re wan oma ọvo de chekọ, ayen ji che vrẹn nẹ itughẹ rayen rhe rhe vwẹ erhanre torhẹ orere nana.”’”
11 Ọke rẹ otuofovwin ri Kaldia vwo siomareyọ vwo nẹ Jerusalẹm fikirẹ otuofovwin ri Fero nu,
12 Jerimaya de vrẹn nẹ Jerusalẹm kpo otọ ri Bẹnjamin ra reyọ ẹkẹn rọyen vwẹ ohri rẹ ihwo rọyen vwẹ oboyin.
13 Ẹkẹvuọvo ọke ro vwo te Anurhoro ri Bẹnjamin, onotu rẹ ihwo re rhẹrẹ na re se Airaijah ọmọ ri Shẹlẹmaya ọmọ ri Hananaya da yọnrọn Jerimaya ọmraro na, ọ da ta: “Wọ djẹ brẹ ihwo ri Kaldia na ra!”
14 Ẹkẹvuọvo Jerimaya da ta: “Ọyena dia uyotaa! Ọ dia ihwo ri Kaldia na yen me djẹ brẹ raa.” Ẹkẹvuọvo ọ kerhọ rọyeen. Ọtiọyena Airaijah de mu Jerimaya, ọ da reyọ bru isun na ra.
15 Ophu de mu isun na gangan kpahen Jerimaya, ayen de hwe ji muo phiyọ uwodi vwẹ uwevwin ri Jehonatan osiọbe na ra rhẹriẹphiyọ uwodi.
16 E de mu Jerimaya phiyọ uwodi rẹ ọgọdọ, ivun ra tọn phiyọ otọ rẹ uwevwin, ọ da dia etiyin ẹdẹ buebun.
17 Ọyena vwọ wan nu, Ovie Zẹdikaya de ji ohwo re se, ovie na da bẹbẹ nọ enọ vwẹ uwevwin* rọyen. Ọ da nọ nẹ, “Ota nẹ obọ ri Jihova rhe?” Jerimaya da tanẹ, “E ota herọ!” ọ da je tanẹ, “E che phi we phiyọ obọ rẹ ovie ri Babilọn!”
18 Jerimaya da je ta kẹ Ovie Zẹdikaya: “Umwemwu vọ yen mi ru vwọso owẹ kugbe idibo wẹn vẹ ihwo nana, rọ nẹrhẹ wo mu vwe phiyọ uwodi?
19 Asaọkiephana, tivọ yen emraro wẹn re mraro kẹ wẹ nẹ, ‘Ovie ri Babilọn cha rhe vwọso owẹ vẹ otọ nanaa hepha’?
20 Asaọkiephana, biko kerhọ, E ọrovwovwe ovie. Biko nyo oyare mẹ vwọ kẹ ẹroesiri. Wo ji vwe rhivwin kpo uwevwin ri Jehonatan osiọbe naa, mi de rhe ghwu vwẹ oboyin.”
21 Ọtiọyena Ovie Zẹdikaya da vwẹ iji phia nẹ e mu Jerimaya phiyọ uwodi vwẹ Otegodo rẹ Ihwo re Rhẹrẹ na, ka reyọ ibrẹdi ọvo rọ pha ghorien ghorien vwo nẹ urhuvwun rẹ ihwo ri ruẹ ibrẹdi na vwọ kẹ kẹdi kẹdẹ, bẹsiẹ ibrẹdi rẹ orere na eje vwo re. Jerimaya da daji Otegodo rẹ Ihwo re Rhẹrẹ na.
