Jerimaya 46:1-28
46 Ọnana yen ota rẹ Jihova ta kẹ Jerimaya ọmraro na kpahen ẹgborho na:
2 Ọnana yen ovuẹ ra vwọ phia kpahen Ijipt, vwọ kpahen otuofovwin ri Fero Niko ovie rẹ Ijipt, rọhẹ orhoma rẹ Urhie ri Yufretis rẹ Ovie Nẹbukadnẹza ri Babilọn phikparobọ vwẹ Kakẹmish vwẹ ukpe rẹne ri Jehoyakim ọmọ ri Josaya, ovie ri Juda:
3 “Ovwan muegbe rẹ ekpọfia itete* kugbe ekpọfia ride rẹ ovwan,Rere ovwan kpo ofovwin.
4 Ovwan muegbe rẹ iyesi na rere ovwan ruọ, ovwan iguiyesi.
Ovwan mudia ẹdia rẹ ovwan rere ovwan ku erhu egangan rẹ ovwan phiyọ.
Ovwan lọ ibiri na dandan rere ovwan ku ewun rẹ utehru* rẹ ovwan phiyọ.
5 ‘Diesorọ me vwọ mrẹ nẹ uguegue ro ayen oma?
Ayen siomareyọ, e phi egba ofovwin rayen kparobọ.
Ayen djẹre vẹ oshọ, egba ofovwin rayen djẹ ni obukoo.
Oshọ ro asan eje,’ ọtiọyen Jihova tare.
6 ‘Ọ rọ djonẹ mamọ na cha sa djẹẹ, egba ofovwin na cha sa djẹ vabọọ.
Ayen kprowọ ji she vwẹ obohwẹre ọnre na,Vwẹ orhoma rẹ Urhie ri Yufretis.’
7 Ono yen kpara cha kerẹ Urhie ri Nail na,Kerẹ irhie rẹ ame rayen mwavwa na?
8 Ijipt kpare rhe kerẹ Urhie ri Nail,Kerẹ irhie rẹ ame rayen mwavwa,Ọ da tanẹ, ‘Me cha kpare kpenu ji rhurhu akpọ na.
Me cha ghwọrọ orere na kugbe ihwo re dia evun rọyen.’
9 Ovwan yanran, ovwan iyesi!
Ovwan djẹ gangan, ovwan ekpẹrẹ na!
Jẹ egba ofovwin ri Kush kugbe PọtRe yọnrọn ekpọfiaKugbe ihwo ri Lọd re riẹn obo ra sa* umurhabọ na yan obaro.
10 “Ẹdẹ yena ẹdẹ rẹ Ọrovwori ro Me Kpenu, Jihova rẹ otuofovwin na, ẹdẹ rẹ ihriẹriọ rọ cha vwọ reihri vwẹ enu rẹ ivwighrẹn rọyen. Ọlọkọ na cha ghwọrọ bẹsiẹ evun vwọ vọn, ọ cha da ọbara rayen vọn evun, kidie Ọrovwori ro Me Kpenu, Jihova rẹ otuofovwin vwo izobo ro che ze* vwẹ otọ rẹ obohwẹre ọnre na, vwẹ orhoma rẹ Urhie ri Yufretis.
11 Yanran kpo Giliẹd ra reyọ balsam,E ọmọtobẹ rẹ Ijipt.
Ihuvwun buebun ru wọ kua koko na odiodi,Kidie e che se sivwin uwee.
12 Ẹgborho na nyo kpahen omaẹphọphọ wẹn,Ukperi rẹ oviẹ wẹn nene otọ na.
Kidie ọgba ofovwin ọvo kprowọ she teyen ọgba ofovwin ọfa,Ayen ivẹ na de she teyen otọ.”
13 Ọnana yen ota rẹ Jihova ta kẹ Jerimaya ọmraro na kpahen ẹcha rẹ Ovie Nẹbukadnẹza* ri Babilọn, rọ vwọ ghwọrọ otọ rẹ Ijipt:
14 “Ghwoghwo vwẹ Ijipt, ghwoghwo vwẹ Migdọl.
Ghwoghwo vwẹ Nọf* kugbe Tapanhis.
Tanẹ, ‘Ovwan mudia ẹdia rẹ ovwan je choma fia,Kidie ọlọkọ na cha ghwọrọ ihwo eje re riariẹ ovwan phiyọ.
15 Diesorọ e vwo hwerhe egba rẹ eshare rẹ ovwan yanran?
Ayen mudia gan vwẹ otọọ.Kidie Jihova genre ayen she nure.
16 Ayen re kprowọ ji she pha buebun.
Ayen ta kẹ ohwohwo:
“Vrẹn! Jẹ avwanre rhivwin kpotọ rẹ avwanre bru ihwo rẹ avwanre raFikirẹ ọlọkọ ro gbe arodọnvwẹẹ na.”’
17 Ayen ghwoghwori vwẹ etiyin nẹ,‘Fero ovie rẹ Ijipt ta ota buebun, ẹkẹvuọvo o ruẹ emuọvooOhwo rọ nẹrhẹ uphẹn na* wanvrẹ.’
18 ‘Re me vwọ herọ na,’ ọtiọyen Ovie rẹ odẹ rọyen dia Jihova rẹ otuofovwin na tare,‘Ọ* cha rhe kerẹ Tebọ vwẹ ohri rẹ igbenu naKerẹ Kamẹl vwẹ orhoma rẹ abadi na.
19 Muegbe rẹ eghwa wẹn vwọ kẹ ighuvwu,E ọmọtẹ rọ dia Ijipt.
Kidie Nọf* che hirhephiyọ obo ri muẹ ohwo oshọ;E che phi erhanre phiyọ,* ohwo vuọvo rhe che chekọ vwẹ evun rọyeen.
20 Ijipt pha kerẹ ọmọ rẹ inama rọ pha yoyovwin,Ẹkẹvuọvo iyẹn re sa ohwo che nẹ obohwẹre ọnre rhe rhe vwọsuọ.
21 Isodje rọ reyọre vwẹ ohri rọyen dede pha kerẹ emọ rẹ erhuẹn re pha tubie tubie,Ẹkẹvuọvo ayen ji kuomarhẹriẹ ayen da djẹ.
Ayen se mudia hẹrhẹ obo re cha naa,Kidie ẹdẹ rẹ ukpokpogho rayen rhe enu rayen re,Ọke re che vwo gun ayen ẹdjọ.’
22 ‘Edo rọyen pha kerẹ edo rẹ ọrọdekọ rọ kpanọ,Kidie ayen vwẹ ogangan bro rhe vẹ ishurhe,Kerẹ eshare re gbọ irhe she.*
23 Ayen cha gbọ egbo rọyen she,’ ọtiọyen Jihova tare, ‘dede nẹ ọhọhọre nẹ a cha sa ruọọ.
Kidie ayen bun nọ igurube ri vwo unuu.
24 A cha nẹrhẹ oma vo ọmọtẹ rẹ Ijipt.
E che phio phiyọ obọ rẹ ihwo rẹ obohwẹre ọnre na.’
25 “Jihova rẹ otuofovwin, Ọghẹnẹ rẹ Izrẹl da ta: ‘Asaọkiephana mi hirhe opharo mẹ kuẹ Emọn ri No,* kuẹ Fero, kuẹ Ijipt, kuẹ eghẹnẹ rọyen, kugbe ivie rọyen—Fero kugbe ihwo eje re vwẹrosuọ.’
26 “‘Ki mi che phi ayen phiyọ obọ rẹ ihwo re guọnọ arhọ rayen reyọ, phiyọ obọ rẹ Ovie Nẹbukadnẹza* ri Babilọn kugbe idibo rọyen. Ẹkẹvuọvo ọke vwọ yanran na, ka cha rhoma dia evun rọyen kirobo ri jovwo,’ ọtiọyen Jihova tare.
27 ‘Vwọ kẹ wẹ, wọ djoshọọ, odibo mẹ Jekọp,Wo gueguee, E Izrẹl.
Kidie mi che sivwin uwe nẹ asan oshesheri rheMi che sivwin emọ* wẹn vwo nẹ otọ re mu ayen ra na.
Jekọp che rhivwin rhe, kọ cha fọ gbiẹi, e ji che kpokpoo,O vwo ohwo vuọvo rọ cha djoshọ mu ayeen.
28 Ọtiọyena wọ djoshọọ, odibo mẹ Jekọp,’ ọtiọyen Jihova tare, ‘kidie me vẹ owẹ herọ.
Me cha ghwọrọ ẹgborho na eje re me hra ovwan ra na karekare,Ẹkẹvuọvo me cha ghwọrọ owẹẹ.
Me cha vwẹ ọghwọku* ro fori vwọ kẹ wẹ,Mi ji che jẹ oja egbe vwọ kẹ wẹẹ.’”
Eta rehẹ obotọ na
^ Ọke buebun ihwo re sa umurhabọ yen muo.
^ Ọ họhọre nẹ imibro utehru re pha kerẹ esẹn rẹ erin ra rhuọn kugbe yen e vwo ru ewun na.
^ Vwẹ Hibru, “ra gba ifi phiyọ.”
^ Yẹrẹ “vwo ihwehwe ro che hwe.”
^ Vwẹ Hibru, “Nẹbukadrẹza,” idjerhe ọfa re vwo sio.
^ Yẹrẹ “Mẹmfis.”
^ Vwẹ Hibru, “nẹrhẹ ọke re bruphiyọ na.”
^ Kọyen, ohwo ro che phi Ijipt kparobọ na.
^ Yẹrẹ “Mẹmfis.”
^ Yẹrẹ ọ sa dia, “O che hirhephiyọ otọ ofefe.”
^ Yẹrẹ “re ghwẹ irhe koko.”
^ Kọyen, Tibs.
^ Vwẹ Hibru, “Nẹbukadrẹza,” idjerhe ọfa re vwo sio.
^ Vwẹ Hibru, “ubi.”
^ Yẹrẹ “ọkpọvi.”
