Jerimaya 2:1-37
2 Ota ri Jihova de bru vwe rhe:
2 “Yanran rere wo ghwoghwo phiyọ erhọ ri Jerusalẹm nẹ, ‘Ọnana yen oborẹ Jihova tare:
“Me nabọ karophiyọ ẹguọnọ* rẹ ọke eghene wẹn,Ẹguọnọ ru wo djephia vwẹ ọke ra vwọ sa wẹ phiyotọ,Obo wo nene uvwe wan vwevunrẹ aton na,Vwẹ otọ ra kọn ubi phiyọọ na.
3 Izrẹl pha fuanfon kẹ Jihova, omamọ rẹsosuọ rẹ orhọ rọyen.”’
‘Kohwo kohwo rọ wanrọ oma cha riabe.
Okpetu che te ayen oma,’ ọtiọyen Jihova tare.”
4 Nyo ota ri Jihova, E uwevwin ri Jekọp,Ovwan orua rẹ uwevwin rẹ Izrẹl eje.
5 Ọnana yen oborẹ Jihova tare:
“Oruchọ vọ yen esẹ rẹ ovwan ride mrẹ vwẹ oma mẹ,Rọ nẹrhẹ ayen bo ghwru shesheri vwọ kẹ vwẹ,Rẹ ayen da ga edjọ ri fiemuu je dia ihwo re che se vwo ru emuọvoo?
6 Ayen nọree nẹ, ‘Tivọ yen Jihova hepha,Ohwo rọ reyọ avwanre vwo nẹ otọ rẹ Ijipt rhe,Ro sun avwanre wan aton na,Wan aton vẹ ikpotọ,Wan otọ ọyaya vẹ ebri hwi,Wan otọ rẹ ohwo vuọvo waanKugbe asan rẹ ohwo vuọvo diaa?’
7 Me da reyọ ovwan rhe otọ ra kọn irhe re mọ emamọ phiyọ,Rere ovwan re emamọ rọyen je re erọnvwọn iyoyovwin rọyen.
Ẹkẹvuọvo ovwan rhere, ovwan de gbe otọ mẹ ẹgua;Ovwan rhẹriẹ uku mẹ kpo emu rẹ ẹgua.
8 Irherẹn na nọre nẹ, ‘Tivọ yen Jihova hephaa?’
Ihwo ri vwo oghwa ri vwo yono urhi na riẹn vwẹẹ,Isuigodẹ na gbe vwọso ovwẹ,Emraro na vwẹ Bel vwọ mraro,Ji nene eghẹnẹ re cha sa ghwa erere vuọvo rhee.
9 ‘Ọtiọyena me cha rhoma reyọ ovwan vwo guẹdjọ,’ ọtiọyen Jihova tare,‘Me cha vwẹ emọ rẹ emọ rẹ ovwan vwo guẹdjọ.’
10 ‘Ẹkẹvuọvo shariẹ vrẹ kpo etọ rehẹ orhoma rẹ abadi* rẹ ihwo ri Kitim rere wo ni.
E, ji ikọn kpo Kida rere ayen nabọ fuẹrẹn;No sẹ oka rẹ orọnvwọn tiọnana phiare jovwo re.
11 O vwo ẹgborho ọvo rọ reyọ obo re dia eghẹnẹẹ vwo wene eghẹnẹ rọyen jovwo re?
Ẹkẹvuọvo ihwo robọ mẹ reyọ obo ri fiemuu vwo wene urinrin mẹ.
12 Ovwan ni ọnana vẹ igbevwunu, ovwan idjuvwu;Ovwan phariẹ fikirẹ oshọ ọgangan,’ ọtiọyen Jihova tare,
13 ‘Kidie ihwo mẹ ru erọnvwọn ebrabra ivẹ:
Ayen kpairoro vrẹ vwẹ rọ dia esiri rẹ ame rẹ arhọ na,Ayen da tọn* erhare* kẹ oma rayen,Erhare re guọghọre re cha sa yọnrọn amee.’
14 ‘Kẹ Izrẹl odibo gbanẹ ọviẹn re vwiẹre vwevunrẹ evwruwevwin na?
Diesorọ e vwo gborho ekuakua rọyen?
15 Ikpohrokpo itete* guan fiki rọyen;Ayen kpare urhuru rayen kpenu.
Ayen ru otọ rọyen phiyọ asan ro muoshọ.
E phi erhanre phiyọ irere rọyen, ohwo vuọvo rha diaa.
16 Ihwo ri Nọf* kugbe Tapanis cha rha kua wẹ fiotọ.*
17 Ọ dia owẹ yen so ọnana kẹ oma wẹnWọ vwọ kpairoro vrẹ Jihova Ọghẹnẹ wẹnRo vwo sun we vwẹ idjerhe na?
18 Asaọkiephana diesorọ idjerhe ro kpo Ijipt vwo si we urhuruRu wọ vwọ da ame ri Shaihọ?*
Diesorọ idjerhe ro kpo Asiria vwo si we urhuruRu wọ vwọ da ame rẹ Urhie na?*
19 Ofori nẹ imwemwu wẹn kpọ wẹ vi,Rere jẹ evun ẹfuọn wẹn ghwọku uwe.
Mrẹ, rere wọ riẹn obo rọ yare te je bra teRa vwọ kpairoro vrẹ Jihova Ọghẹnẹ wẹn;Wo vwo oshọẹdjẹ mẹ kakakaa,’ ọtiọyen Ọrovwori ro Me Kpenu Jihova rẹ otuofovwin na tare.
20 ‘Kidie vwẹ ọke grongron re yen mi vwirhin urhekpe wẹnJe sanvwe ejọnrọn wẹn.
Ẹkẹvuọvo wọ tare nẹ, “Me cha ga wẹẹ,”
Kidie vwẹ enu rẹ kugbenu kugbenu otete kugbe obotọ rẹ kurhe kurhe rodeYen wo de sherhẹn hra abọ vẹ awọ phiyọ wo vwo gbe igberadja.
21 Me kọn wẹ kerẹ omamọ rẹ ivaini ọvwavware, eje omamọ ibi;Ọtiọyena kẹ mavọ wo rhi vwo hirhephiyọ orharhe rẹ ivaini rọ djẹ nẹ otọ rhe vwẹ obaro mẹ?’
22 ‘Ọ da tobọ dianẹ wọ vwẹ isoda* vẹ odja buebun vwọ hworhẹ oma,Abe wẹn je cha dia kerẹ upe vwẹ obaro mẹ,’ ọtiọyen Ọrovwori ro Me Kpenu Jihova tare.
23 Mavọ yen wọ sa vwọ tanẹ, ‘Mi gbe oma mẹ ẹguaa.
Mi nene Beel’?
Gbe ni idjerhe wẹn vwevunrẹ iyara na.
Roro kpahen oborẹ wo rure.
Wọ pha kerẹ ikamẹl otete aye rọ djẹ gangan,Rọ djẹ cha djẹ kpo kirobo ri je re,
24 Ekẹkẹtẹ rẹ aghwa nabọ riẹn aton na,Ọ reyọ iwen rọyen vwo se ọnrhe guọnọ ọ rẹ ọshare fikirẹ urhurusivwe ehware ọgangan rọyen.*
Ono yen sa da obọ ji vwẹ ọke ro de vwo urhurusivwe ehware ọgangan?
O vwo ohwo vuọvo rọ guọnọ rọ cha lagha oma rọyeen.
Ayen cha mrẹ vwẹ ọke* rọyen.
25 Wọ vwẹ awọ ofefe yaanWo ji jẹ urhuru ame si wee.
Ẹkẹvuọvo wọ tare nẹ, ‘Ọke wanre!
Kidie ọ guakẹ vwẹ vwo ẹguọnọ rẹ erhorha* nure,Mi che nene ayen.’
26 Kirobo oma vua oji ọke re de muo ye,Ọtiọyen yen a nẹrhẹ oma vo uwevwin rẹ Izrẹl,Ayen, ivie rayen kugbe isun rayen,Irherẹn rayen kugbe emraro rayen.
27 Ayen ta vwọ kẹ urhe nẹ, ‘Wẹwẹ ọsẹ mẹ,’
Je ta kẹ ukuta nẹ, ‘Wẹwẹ yen vwiẹ vwẹ.’
Ẹkẹvuọvo ayen chukoku uvwe ukperẹ ayen vwo hirhe opharo ku uvwe.
Ọke rẹ ayen dahẹ ukpokpogho re, kẹ ayen ta,‘Vrẹn rere wo sivwin avwanre!’
28 Kẹ eghẹnẹ wo ru kẹ oma wẹn na rhọ?
Gbe jẹ ayen vrẹn sẹ ayen se sivwin uwe vwẹ ọke rẹ ukpokpogho wẹn na,Kidie eghẹnẹ wẹn rhi bun mamọ kerẹ irere wẹn, E Juda.
29 ‘Diesorọ ovwan vwo nene uvwe họnra?
Diesorọ ovwan eje vwo gbe vwọso ovwẹ?’ ọtiọyen Jihova tare.
30 Me ghwọku emọ rẹ ovwan kufia.
Ayen reyọ ọghwọku naa;Ọlọkọ robọ rẹ ovwan hwe emraro rẹ ovwan,Kerẹ okpohrokpo rọ guọnọ eranvwe ro che hwe.
31 E ihwo mẹ, ovwan roro kpahen ota ri Jihova na.
Me rhe dia kerẹ atonYẹrẹ otọ rẹ ebri hwi vwọ kẹ Izrẹl re?
Diesorọ ihwo mẹ nana vwọ tanẹ, ‘Avwanre yancha yankpo odedede.
Avwanre che rhivwin bru we rhe ọfaa’?
32 Ekuakua rẹ osẹnvwe rẹ ọmọtobẹ sa chọrọ ẹro,Kẹ imuivie rẹ ọpha sa chọrọ ẹro?
Dedena me chọrọ ihwo robọ mẹ ẹro vwẹ ọke grongron.
33 E aye, gbe ni oborẹ wọ tẹn ona rẹ obo ra guọnọ eshare ri che vwo ẹguọnọ wẹn te!
Wo yono oma wẹn phiyọ idjerhe rẹ umwemwu.
34 Ọbara rẹ igbere rẹ abọ rayen fonro ghworo ibuluku wẹn,Dede nẹ me mrẹ ayen re kpanra ẹchẹ ro uwevwiin;Ọbara rayen ghworo ibuluku wẹn eje.
35 Ẹkẹvuọvo wọ tanẹ, ‘Abọ mẹ fonro.
Vwọrẹ imuẹro, o rhe muophu kpahan ovwẹẹ.’
Asaọkiephana me reyọ owẹ vwo guẹdjọKidie wọ tanẹ, ‘Mi ru umwemwuu.’
36 Diesorọ wọ vwọ reyọ ẹro ri frae vwo ni idjerhe wẹn rọ phiọnree na?
Oma rẹ Ijipt je cha vo owẹ,Kirobo rẹ oma rẹ Asiria vo wẹ na.
37 Fikirẹ ọnana, wọ je cha yanran vẹ abọ wo mu kpahen uyovwin,Kidie Jihova sen ihwo ru wọ vwẹroso;Ayen cha vwẹ ukẹcha vuọvo vwọ kẹ wẹẹ.”
Eta rehẹ obotọ na
^ Yẹrẹ “karophiyọ ẹguọnọ ro jẹ rhẹriẹ.”
^ Yẹrẹ “etọ rẹ ame riariẹ phiyọ.”
^ Yẹrẹ “Ayen bru,” ọ họhọre nẹ oragha yen bruro phiyọ.
^ Kọyen, ọgọdọ ra vwọ sẹro rẹ ame.
^ Yẹrẹ “Emọ rẹ ikpohrokpo ri vwo ẹton ohọre re.”
^ Yẹrẹ “Mẹmfis.”
^ Vwẹ Hibru, “cha rha ria erhu rẹ ovie rẹ uyovwin wẹn.”
^ Kọyen, oghọn rẹ Urhie ri Nail.
^ Kọyen, Yufretis na.
^ Yẹrẹ “akalai.”
^ Yẹrẹ “fikirẹ oborẹ erhi rọyen guọnọre.”
^ Vwẹ Hibru, “emeranvwe.”
^ Yẹrẹ “ẹguọnọ rẹ eghẹnẹ erhorha.”
