Jerimaya 16:1-21
16 Ota ri Jihova da rhoma bru vwe rhe, nẹ:
2 “Wọ reyọ aye kakakaa, wo ji vwiẹ emeshare vẹ emetẹ vwẹ etinẹ naa.
3 Kidie ọnana yen oborẹ Jihova ta kpahen emeshare vẹ emetẹ re vwiẹ vwẹ etinẹ kugbe ini rayen ri vwiẹ ayen vẹ esẹ rayen re nẹrhẹ e vwiẹ ayen vwẹ otọ nana:
4 ‘Ega egangan yen che hwe ayen, ẹkẹvuọvo ohwo vuọvo che vwere ayen yẹrẹ shi ayeen; ayen cha dia kerẹ imaniọ* vwẹ otọ na. A cha vwẹ ọlọkọ vẹ owẹnvwe vwọ ghwọrọ ayen, irivwin rayen cha dia emuọre vwọ kẹ ephran rẹ idjuvwu na vẹ eranvwe rẹ otọrakpọ na.’
5 Kidie ọnana yen oborẹ Jihova tare,‘Wọ rua uwevwin rẹ ihwo da riemu rẹ uvwerii,Wọ yanran re vwerhe oma yẹrẹ re ehrọre rayeen.’
‘Kidie me reyọ ufuoma mẹ mie ihwo nana re,’ ọtiọyen Jihova tare,‘Ọtiọyen ji te ẹguọnọ ro jẹ rhẹriẹ vẹ arodọnvwẹ mẹ.
6 Te ihwo ride te ihwo itete che ghwu vwẹ otọ nana.
E che shi ayeen,Ohwo vuọvo che vwere ayeen,Ohwo vuọvo ji che bru oma rọyen yẹrẹ wanre uyovwin* fiki rayeen.
7 O vwo ohwo vuọvo rọ cha vwẹ emuọre vwọ kẹ ihwo ri vwere uvweri,Ro vwo bru ayen uche fikirẹ ihwo rayen ri ghwuruu;Ohwo vuọvo je cha vwẹ uko rẹ iwaini rẹ onẹrhẹvwe kẹ ayenRẹ ayen cha da fikirẹ ọsẹ yẹrẹ oni rayen ro ghwuruu.
8 Wọ rua uwevwin ra da ria orẹWo vwo nene ayen chidia riemu je daa.’
9 “Kidie ọnana yen oborẹ Jihova rẹ otuofovwin, Ọghẹnẹ rẹ Izrẹl tare, ‘Nighere, vwẹ etinẹ na rẹ ovwan je vwọ hẹ akpọ na, vwẹ irharo rẹ ovwan, mi che phioba phiyọ edo rẹ omavwerhovwẹn kugbe aghọghọ, urhuru rẹ ọshare ọpha kugbe urhuru rẹ ọpha.’
10 “Ọke wọ da vuẹ ihwo nana eta nana eje, kẹ ayen cha nọ wẹ, ‘Diesorọ Jihova vwọ tanẹ okpetu rode nana eje cha phia kẹ avwanre? Oruchọ vẹ umwemwu vọ yen avwanre ru vwọso Jihova Ọghẹnẹ rẹ avwanre?’
11 Ku wọ kpahen kẹ ayen nẹ, ‘“Kidie esẹ rẹ ovwan ride kpairoro vrẹ vwẹ,” ọtiọyen Jihova tare, “kẹ ayen nene eghẹnẹ efa, ga ayen, je vwẹ uyovwin kpotọ kẹ ayen. Ẹkẹvuọvo ayen kpairoro vrẹ vwẹ, ayen je yọnrọn urhi mẹẹ.
12 Ovwan ru obo re bra vrẹ e rẹ esẹ rẹ ovwan ride shesheri, ovwan ọvuọvo nene ubiudu umwemwu ọgangan rọyen ukperẹ ovwan vwo nyupho mẹ.
13 Ọtiọyena mi che genre ovwan nẹ otọ nana ro otọ rẹ ovwan yẹrẹ esẹ rẹ ovwan ride riẹnree, ovwan cha ga eghẹnẹ efa te ason te uvo vwẹ etiyin, kidie mi che dje ẹroesiri kẹ ovwaan.”’
14 “‘Ẹkẹvuọvo ọke cha,’ ọtiọyen Jihova tare, ‘rẹ ayen che vwo jẹ tanẹ, “Rẹ Jihova rọ reyọ ihwo rẹ Izrẹl nẹ otọ rẹ Ijipt rhe vwọ herọ na!”
15 ukperẹ ọyena kẹ ayen cha ta: “Rẹ Jihova rọ reyọ ihwo rẹ Izrẹl vwo nẹ otọ rẹ obohwẹre ọnre na kugbe vwo nẹ etọ eje rọ hra ayen ra na rhe vwọ herọ na!” me cha reyọ ayen rhivwin rhe otọ rayen re me vwọ kẹ esẹ rayen ride.’
16 ‘Nighere, mi se ihwiyerin buebun cha,’ ọtiọyen Jihova tare,‘Kẹ ayen cha guọnọ ayen ji mu ayen.
Ọyena da wan nu, ki mi che se ebẹribefi buebun,Kẹ ayen cha guọnọ ayen mrẹ vwẹ enu rẹ kugbenu kugbenu kugbe kugbenu kugbenu oteteKugbe vwo nẹ inu rẹ eragha.
17 Kidie ẹro mẹ mrẹ kemu kemu rẹ ayen ruẹ.*
Ayen cha sa djahen obo rẹ ayen ruẹ kẹ vwẹẹ,Ayen je cha sa djahen oruchọ rayen kẹ vwẹẹ.
18 Ẹsosuọ, me cha hwosa ọvọnvọn ro fo oruchọ kugbe umwemwu rayen na kẹ ayen,Kidie ayen vwẹ ema* rẹ edjọ rayen ri tuẹn ohwo oma ri vwo arhọọ na vwo gbe otọ mẹ ẹguaAyen je ghwẹ ekuakua ẹgua rayen vọn otọ mẹ.’”
19 E Jihova, ogangan mẹ kugbe asan ọgangan mẹ.Asan mẹ re me djẹ rua vwẹ ọke rẹ ukpokpogho,Wẹwẹ yen ẹgborho na che bru rhe vwo nẹ oba rẹ akpọ na rhe,Kẹ ayen cha tanẹ: “Esẹ rẹ avwanre ride titi ẹkuruemu ra vwọ ga eghẹnẹ rẹ efian,*Re dia obo ri vwo otọọ kugbe erharhe rẹ erọnvwọn ri fiemuu.”
20 Kẹ ohwo se ru eghẹnẹ kẹ oma rọyenJẹ ayen dia eghẹnẹẹ?
21 “Ọtiọyena me cha nẹrhẹ ayen riẹn,Vwẹ ọke yena me cha nẹrhẹ ayen riẹn ẹgba kugbe ogangan mẹ,Kẹ ayen cha riẹn nẹ odẹ mẹ Jihova.”
