Jerimaya 29:1-32
29 Enana yen eta rẹ ọbe rẹ Jerimaya ọmraro na si nẹ Jerusalẹm bru ekpako ri chekọ vwẹ usun rẹ ihwo re mu kpo ighuvwu na, irherẹn na, emraro na, kugbe ihwo na eje rẹ Nẹbukadnẹza mu nẹ Jerusalẹm kpo ighuvwu vwẹ Babilọn,
2 ọke rẹ Ovie Jẹkonaya, oni rẹ ovie, ediaguare* na, isun ri Juda kugbe Jerusalẹm, ewena na kugbe idjogun* na vwo vrẹn nẹ Jerusalẹm nu.
3 Ọ vwẹ ọbe na yanran womarẹ Ẹlesa ọmọ ri Shefan kugbe Gemaraya ọmọ ri Hilkaya, rẹ Ovie Zẹdikaya ri Juda ji kpo Babilọn bru Ovie Nẹbukadnẹza ri Babilọn ra. Ọnana yen obo re si phiyọ ọbe na:
4 “Ọnana yen oborẹ Jihova rẹ otuofovwin, Ọghẹnẹ rẹ Izrẹl ta kẹ ihwo eje re mu kpo ighuvwu, ihwo rọ nẹrhẹ e mu nẹ Jerusalẹm kpo ighuvwu vwẹ Babilọn,
5 ‘Ovwan bọn iwevwin rere ovwan dia evun rayen. Ovwan kọn irhe re mọ emamọ rere ovwan re emamọ rayen.
6 Ovwan reyọ eya rere ovwan vwiẹ emeshare vẹ emetẹ; ovwan reyọ eya kẹ emeshare rẹ ovwan je vwẹ emetẹ rẹ ovwan vwo bru egọ rere ayen ji vwo vwo emeshare vẹ emetẹ. Ovwan bunphiyọ vwẹ oboyin, ovwan hanvwaa.
7 Ovwan guọnọ ufuoma rẹ orere re me nẹrhẹ e mu ovwan ra na, ovwan nẹrhovwo rhe Jihova fiki rọyen kidie ovwan che vwo ufuoma vwevunrẹ ufuoma rọyen.
8 Kidie ọnana yen oborẹ Jihova rẹ otuofovwin, Ọghẹnẹ rẹ Izrẹl tare: “Ovwan jẹ emraro rẹ ovwan kugbe ebọepha rẹ ovwan rehẹ ohri rẹ ovwan phiẹn ovwaan, ovwan je kerhọ kẹ evwerhẹn rẹ ayen vwerhẹẹn.
9 Kidie ‘ayen vwẹ odẹ mẹ vwọ mraro rẹ efian kẹ ovwan. Mi ji ayeen,’ ọtiọyen Jihova tare.”’”
10 “Kidie ọnana yen oborẹ Jihova tare, ‘Ọke rẹ ikpe 70 na da gba vwẹ Babilọn nu, ke me cha davwerhọ rẹ ovwan, ki mi che ru ive mẹ gba rẹ me cha vwọ reyọ ovwan rhivwin rhe etinẹ na.’
11 “‘Kidie me nabọ riẹn iroro ri mi roro kpahan ovwan,’ ọtiọyen Jihova tare, ‘iroro rẹ ufuoma, ọ dia ọ rẹ okpetuu, rẹ me vwọ vwẹ obo ri yovwirin kẹ ovwan vwẹ obaro na je kẹ ovwan iphiẹrophiyọ.
12 Ovwan che se vwe, bru vwe rhe, je nẹrhovwo rhe vwe, ke me cha kerhọ rẹ ovwan.’
13 “‘Ovwan cha guọnọ ovwẹ je mrẹ vwẹ, kidie ovwan cha vwẹ ubiudu rẹ ovwan eje vwọ hiẹ guọnọ ovwẹ.
14 Me cha nẹrhẹ ovwan mrẹ vwẹ,’ ọtiọyen Jihova tare. ‘Mi che koko ihwo rẹ ovwan re mu reyọ ji koko ovwan vwo nẹ ẹgborho eje kugbe asan re me hra ovwan ra,’ ọtiọyen Jihova tare. ‘Me cha reyọ ovwan rhivwin rhe asan rẹ me da nẹrhẹ e mu ovwan kpo ighuvwu na.’
15 “Ẹkẹvuọvo ovwan tare nẹ, ‘Jihova vwẹ emraro vwo mu kẹ avwanre vwẹ Babilọn.’
16 “Kidie ọnana yen oborẹ Jihova ta kẹ ovie ro chidia ekete ri Devid kugbe ihwo eje re dia orere nana, iniọvo rẹ ovwan ri nene ovwan kpo ighuvwuu,
17 ‘Ọnana yen oborẹ Jihova rẹ otuofovwin na tare: “Nighere mi jẹ ọlọkọ, owẹnvwe, kugbe ọga brẹ ayen ra, me cha nẹrhẹ ayen dia kerẹ ifigi ri gbonri mamọ* te ẹdia rẹ a rha cha sa re ayeen.”’
18 “‘Me cha reyọ ọlọkọ, owẹnvwe, kugbe ọga vwọtua ayen, mi che ru ayen phiyọ obo ri muẹ ohwo oshọ vwọ kẹ uvie sansan eje rẹ akpọ na, ekan, obo ri gbe ohwo unu, orọnvwọn ra vwẹ fiki rọyen gbe ophiọrọ, kugbe ehwẹjẹ vwẹ ohri rẹ ẹgborho na eje re me hra ayen ra,
19 kidie ayen kerhọ rẹ eta mẹ ri mi vwo rhe ayen womarẹ idibo mẹ emraro naa,’ ọtiọyen Jihova tare, ‘ri mi djẹ ejejo.’*
“‘Ẹkẹvuọvo ovwan kerhọọ,’ ọtiọyen Jihova tare.
20 “Ọtiọyena ovwan nyo ota ri Jihova, ovwan ihwo eje re mu kpo ighuvwu na, re me nẹrhẹ e mu nẹ Jerusalẹm kpo Babilọn.
21 Ọnana yen oborẹ Jihova rẹ otuofovwin, Ọghẹnẹ rẹ Izrẹl ta kpahen Ehab ọmọ ri Kolaya kugbe Zẹdikaya ọmọ ri Measaya, re vwẹ odẹ mẹ vwọ mraro rẹ efian kẹ ovwan na, ‘Nighere mi phiẹ ayen phiyọ obọ rẹ Ovie Nẹbukadnẹza* ri Babilọn, kọ cha teyen ayen hwe vwẹ irharo rẹ ovwan.
22 Obo re phia kẹ ayen cha dia oborẹ ihwo ri Juda eje re mu kpo ighuvwu vwẹ Babilọn che vwo dje ekan, rẹ ayen cha vwọ tanẹ: “E jẹ Jihova ru we kerẹ Zẹdikaya kugbe Ehab, rẹ ovie ri Babilọn vwọ tọn vwẹ erhanre!”
23 kidie ayen ru emu rẹ ophọphọvwe vwẹ Izrẹl, rẹ ayen vwo nene eya rẹ irivẹ rayen gbe igberadja je vwẹ odẹ mẹ vwọ ta eta rẹ efian ri mi ji iji rọyen kẹ ayeen.
“‘“Mẹvwẹ yen Ohwo rọ riẹnre rọ je dia oseri,” ọtiọyen Jihova tare.’”
24 “Wọ me ta kẹ Shẹmaya ri Nehẹlam nẹ,
25 ‘Ọnana yen oborẹ Jihova rẹ otuofovwin, Ọghẹnẹ rẹ Izrẹl tare: “Kidie nẹ wọ vwẹ odẹ wẹn si ẹbe vwo rhe ihwo eje rehẹ Jerusalẹm, vwo rhe Zẹfanaya ọmọ ri Measaya orherẹn na kugbe irherẹn na eje nẹ,
26 ‘Jihova vwẹ owẹ vwo ru orherẹn ukperẹ Jehoyada orherẹn na, wọ vwọ dia oniruo rẹ uwevwin ri Jihova, wọ vwọ vwẹrote kọrhuẹ kọrhuẹ ro ruẹ kerẹ ọmraro je vwẹ igoni vwọ kanrọ;
27 kẹ, diesorọ wọ je rhe ghwọku Jerimaya rẹ Anatọt naa, ohwo ro ruẹ kerẹ ọmraro kẹ ovwan na?
28 Kidie ọ tobọ vwẹ ovuẹ rhe avwanre vwẹ Babilọn, rọ vwọ ta: “Ọ cha reyọ ọke grongron! Ovwan bọn iwevwin rere ovwan dia evun rayen. Ovwan kọn irhe re mọ emamọ rere ovwan re emamọ rayen,—”’”’”
29 Ọke rẹ Zẹfanaya orherẹn na vwo se ọbe nana vwọ kẹ Jerimaya ọmraro na nyo,
30 ota ri Jihova de bru Jerimaya rhe:
31 “Vwẹ ovuẹ vwo rhe ihwo eje re mu kpo ighuvwu nẹ, ‘Ọnana yen oborẹ Jihova ta kpahen Shẹmaya ri Nehẹlam: “Kidie nẹ Shẹmaya mraro kẹ ovwan dede nẹ mi jiroo, ọ je davwẹngba rọ vwọ nẹrhẹ ovwan se efian gbuyota,
32 ọtiọyena ọnana yen oborẹ Jihova tare, ‘Nighere, mi hirharokuẹ Shẹmaya ri Nehẹlam kugbe emọ rọyen. O vwo ohwo vuọvo vwẹ usun rẹ ihwo rọyen ro che sivwin rhọ vwẹ ohri rẹ ihwo nanaa, ọ je cha mrẹ erhuvwu ri mi che ru vwọ kẹ ihwo mẹẹ,’ ọtiọyen Jihova tare, ‘kidie o phiuduphiyọ ihwo awọ vwo gbe vwọso Jihova.’”’”
