Jerimaya 41:1-18
41 Vwẹ emeranvwe righwrẹn, Ishmẹl ọmọ ri Nẹtanaya ọmọ rẹ Ẹlishama, ro nẹ urhiẹ rẹ ovie rhe* rọ je dia ọvo vwẹ usun rẹ ihwo ride rẹ ovie na, vẹ eshare ihwe efa de bru Gẹdalaya ọmọ rẹ Ahaikam rhe Mizpa. Rẹ ayen vwọ riemu kuẹgbe vwẹ Mizpa na,
2 Ishmẹl ọmọ ri Nẹtanaya vẹ eshare ihwe re vẹ ọyen gba herọ na de vrẹn, ayen da vwẹ ọlọkọ teyen Gẹdalaya ọmọ rẹ Ahaikam ọmọ ri Shefan hwe. Ọtiọyen kọyen ọ teyen ohwo rẹ ovie ri Babilọn vwo mu vwẹ enu rẹ otọ na hwe.
3 Ishmẹl je teyen ihwo ri Ju eje re vẹ Gẹdalaya gba herọ vwẹ Mizpa hwe, ọtiọyen ji te isodje ri Kaldia rehẹ etiyin.
4 Vwẹ ẹdẹ rivẹ ra vwọ teyen Gẹdalaya hwe nu, tavwen ohwo vuọvo ke riẹn kpahọn,
5 eshare 80 de nẹ Shikẹm, Shailo, kugbe Sameria rhe, ayen wanre ẹtuegban rayen, bẹrẹ iwun rayen, bru era phiyọ oma rayen, ji mu izobo rẹ eka kugbe ifrankisẹnsi rẹ ayen che mu rhe uwevwin ri Jihova nene oma.
6 Ọtiọyena Ishmẹl ọmọ ri Nẹtanaya de vrẹn nẹ Mizpa ra vwa ayen, jẹ ọ viẹ rọ vwọ yanran na. Ọke ro vwo te asan rẹ ayen hepha, ọ da ta kẹ ayen nẹ: “Ovwan bru Gẹdalaya ọmọ rẹ Ahaikam rhe.”
7 Ẹkẹvuọvo ọke rẹ ayen vwọ ro evunrẹ orere na, Ishmẹl ọmọ ri Nẹtanaya vẹ eshare rọyen da teyen ayen hwe ji do ayen phiyọ evunrẹ ọgọdọ.
8 Ẹkẹvuọvo eshare ihwe vwẹ usun rayen da ta kẹ Ishmẹl: “Wọ teyan avwanre hwee, kidie avwanre vwo iwiti, ibali, evwri, kugbe ame ọnyọn rẹ avwanre sinu vwevunrẹ eko na.” Ọtiọyena ọ rha teyen ayen hwe kirobo rọ teyen iniọvo rayen hwee.
9 Asaọkiephana Ishmẹl de do irivwin rẹ eshare ro hweri na phiyọ ọgọdọ rode na, ọ rẹ Ovie Esa tọnre fikirẹ Ovie Beasha rẹ Izrẹl. Ọnana yen ọgọdọ rẹ Ishmẹl ọmọ ri Nẹtanaya ghwẹ vọn vẹ irivwin rẹ ihwo re hweri na.
10 Ishmẹl de mu ihwo eje ri chekọ vwẹ Mizpa yanran, ọtiọyen ji te emetẹ rẹ ovie na kugbe ihwo eje ri chekọ vwẹ Mizpa, rẹ Nẹbuzaradan rọ dia onotu rẹ ihwo re rhẹrẹ na phi phiyotọ rẹ ẹroevwote ri Gẹdalaya ọmọ rẹ Ahaikam. Ishmẹl ọmọ ri Nẹtanaya de mu ayen rẹ ayen vwọ shariẹ vrẹ bru ihwo rẹ Amọn ra.
11 Ọke rẹ Johenan ọmọ ri Kariya vẹ inotu rẹ otuofovwin na eje re vẹ ọyen gba herọ vwo nyo kpahen umiovwo eje rẹ Ishmẹl ọmọ ri Nẹtanaya ruru na,
12 ayen da reyọ eshare na eje, ayen da yanran re nene Ishmẹl ọmọ ri Nẹtanaya họnre, ayen da mrẹ vwẹ asan ame rode na* vwẹ Gibiọn.
13 Ihwo na eje re vẹ Ishmẹl gba herọ na da ghọghọ ọke rẹ ayen vwọ mrẹ Johenan ọmọ ri Kariya vẹ inotu rẹ ituofovwin na eje re vẹ ọyen gba herọ.
14 Etiyin ihwo na eje rẹ Ishmẹl mu nẹ Mizpa rhe na de kuomarhẹriẹ, ayen de nene Johenan ọmọ ri Kariya rhivwin.
15 Ẹkẹvuọvo Ishmẹl ọmọ ri Nẹtanaya kugbe ihwo ẹrenren vwẹ usun rẹ eshare rọyen djẹ va Johenan abọ, ayen de bru ihwo rẹ Amọn ra.
16 Johenan ọmọ ri Kariya kugbe inotu rẹ otuofovwin na eje re vẹ ọyen gba herọ da reyọ ihwo ri chekọ vwẹ Mizpa na, ihwo ro sivwin vwo nẹ obọ rẹ Ishmẹl ọmọ ri Nẹtanaya vwẹ ọke rọ vwọ teyen Gẹdalaya ọmọ rẹ Ahaikam hwe nu. Ayen da reyọ eshare, isodje, eya, emọ, kugbe ediaguare* na rhivwin vwo nẹ Gibiọn.
17 Ọtiọyena ayen da yanran ra dia asan re wonphiyọ ri Kimham rọ kẹrẹ Bẹtlẹhẹm, vẹ ẹwẹn rẹ ayen vwo kpo Ijipt
18 fikirẹ ihwo ri Kaldia na. Kidie oshọ rayen muẹ ayen rọ vwọ dianẹ Ishmẹl ọmọ ri Nẹtanaya teyen Gẹdalaya ọmọ rẹ Ahaikam rẹ ovie ri Babilọn vwo mu vwẹ enu rẹ otọ na hwe na.
