Jerimaya 4:1-31
4 “Ọ da dianẹ wo che rhivwin rhe, E Izrẹl,” ọtiọyen Jihova tare,“Ọ da dianẹ wo che rhivwin bru vwe rheJi si edjọ ri tuẹn ohwo oma na nẹ obaro mẹ,Ọke yena, wọ rha cha dia ohwo ro ghoroo.
2 Ọ da dianẹ wọ ta uyota, brorhiẹn ọsoso, ji ruẹ obo ri shephiyọ,Ọke wo de duvwun iyorin nẹ, ‘Rẹ Jihova vwọ herọ na!’Ọke yena ẹgborho na cha wan oma rọyen mrẹ ebruba vwọ kẹ oma rayen,Je reyọ vwọ yonma.”
3 Kidie ọnana yen oborẹ Jihova ta kẹ eshare ri Juda kugbe Jerusalẹm:
“Ovwan voro otọ ro yovwon emu kẹ oma rẹ ovwan,Ovwan gbe kọn erọnvwọn phiyọ ohri rẹ idjigbẹẹn.
4 Ovwan yanvwe oma rẹ ovwan vwọ kẹ Jihova,Ovwan bru uvweruvwe rẹ ubiudu rẹ ovwan no,Ovwan eshare ri Juda kugbe ihwo re dia Jerusalẹm,Rere ophu ọgangan mẹ vwo jẹ la kerẹ erhanreRọ da la rẹ ohwo vuọvo de je se fuon,Fikirẹ iruemu ebrabra rẹ ovwan.”
5 Ghwoghwo vwẹ Juda, ghwoghwo vwẹ Jerusalẹm.
Kperi rere wo hworo ọgban nene otọ na.
Kperi gangan rere wọ ta: “Ovwan ghwomakoko,Rere avwanre djẹ kpo irere ra gbogba riariẹ na.
6 Kpare oka* ọvo ro dje idjerhe ro kpo Zayọn kpenu.
Guọnọ asan djẹ ro, wo mudiaa,”
Kidie me reyọ okpetu nẹ obohwẹre ọnre cha, okpetu rode.
7 Ọ va phia kerẹ okpohrokpo ro nẹ asan ro de siomanu rhe;Ọ rọ ghwọrọ ẹgborho na mu oyan phiyọ re.
O vrẹn nẹ asan rọyen rere o vwo ru otọ wẹn phiyọ obo ri muẹ ohwo oshọ.
A cha ghwọrọ irere wẹn totọ, ohwo vuọvo gbe cha dia ayeen.
8 Ọtiọyena, ovwan ku ewun rẹ esiso phiyọ,Ovwan vwere* ji beroma,Kidie ophu ri Jihova rọ tuan kpahan avwanre na ji rhi fuun.
9 “Vwẹ ẹdẹ yena, udu che nẹ ovie na awọ,Udu ji che nẹ isun na awọ,” ọtiọyen Jihova tare;“Oshọ che mu irherẹn na, o ji che gbe emraro na unu.”
10 Etiyin me da ta: “Okpetu rode, E Ọrovwori ro Me Kpenu Jihova! Vwọrẹ uyota wọ phiẹn ihwo nana vẹ Jerusalẹm karekare, ru wọ vwọ tanẹ, ‘Ovwan che vwo ufuoma,’ jẹ a guọnọ vwẹ ọlọkọ vwọ teyan avwanre hwe.”
11 Vwẹ ọke yena, a cha ta kẹ ihwo nana kugbe Jerusalẹm nẹ,
“Odju ọrhorhorho ro che dju nẹ igbenu itete rẹ odin vuọvo hephaa vwẹ aton na rheChe hwerhe ọmọtẹ rẹ ihwo mẹ;Ọ dia o djuẹ cha rọ vwọ frẹ yẹrẹ phorho ekankọọn.
12 Mẹvwẹ yen tanẹ odju ọgangan dju nẹ asan sansan nana rhe.
Asaọkiephana mi che ghwoghwo ẹdjọeguo vwọso ayen.
13 Nighere! Ọ cha rhe kerẹ enu ro bi phiyọ,Ekpẹrẹ rọyen pha kerẹ ogiribo.
Iyesi rọyen djẹ kpata nọ ugo.
Okpetu rode kẹ avwanre kidie a ghwọrọ avwanre!
14 Ru ubiudu wẹn fon vwo nẹ umwemwu, E Jerusalẹm, rere wo se vwo sivwin rhọ.
Brọke yen wo che roro iroro rẹ umwemwu kri te?
15 Kidie urhuru ọvo ghwoghwo iyẹnrẹn na vwo nẹ Dan rhe,O de ghwoghwo okpetu vwo nẹ igbenu rẹ Ifrem rhe.
16 Niyẹnrẹn rọyen, e, vwọ kẹ ẹgborho na;Ghwoghwo kpahen Jerusalẹm.”
“Ẹko rẹ isodje* evo nẹ otọ oshesheri cha,Ayen cha kpare upho rayen vwọso irere ri Juda.
17 Ayen nẹ kẹbẹre kẹbẹre eje rhe kerẹ erhẹrotọ rẹ otọ ro rhiephiyọ na rhe vwọsuọ,Kidie Jerusalẹm gbe vwọso ovwẹ,” ọtiọyen Jihova tare.
18 “Kidie a cha reyọ iruemu kugbe irueru robọ wẹn rhe enu wẹn.
Okpetu wẹn yara mamọ,O te ubiudu wẹn re!”
19 Ofu dje vwe hwe, ofu dje vwe hwe!
Ubiudu mẹ miavwa ovwẹ gangan.
Ubiudu mẹ teyan kpekpe.
Mi che se rhurhu unuu,Kidie mi* nyo edo rẹ ọgban,Edo rẹ ofovwin.*
20 A niyẹnrẹn rẹ okpetu vwọ kpahen okpetu,Kidie a ghwọrọ otọ na eje.
Siẹvuọvo na, a da ghwọrọ itughẹ robọ mẹ,Vwẹ ẹroẹbrẹ emwa rẹ utughẹ mẹ da ghwọrọ.
21 Brọke me cha mrẹ oka* na kri te,Ji nyo edo rẹ ọgban na?
22 “Kidie ihwo mẹ ẹkpa;Ayen vwo oniso mẹẹ.
Ayen ẹkpa rẹ emọ, ayen vwo ẹruọọ.
Ayen nabọ vwo aghwanre re vwo ruẹ umiovwo,*Ẹkẹvuọvo ayen riẹn obo re ruẹ erhuvwuu.”
23 Me mrẹ otọ na, nighere! ofefe, a je ghwọrọ.
Mi ni idjuvwu na, elo rayen rha herọọ.
24 Me mrẹ igbenu na, nighere! ayen kpogho,Igbenu itete na ji kpogho.
25 Nighere! me mrẹ ohwo vuọvoo,Ephran rẹ idjuvwu na eje je rhan no re.
26 Me mrẹ ogba ra kọn irhe re mọ emamọ phiyọ ro hirhephiyọ aton,A guọghọ irere rọyen eje totọ.
Ọ dia ọtiọyen fikirẹ Jihova,Fikirẹ ophu rọyen rọ tuan.
27 Kidie ọnana yen oborẹ Jihova tare: “Otọ na eje che hirhephiyọ ofefe,Ẹkẹvuọvo me cha ghwọrọ karekaree.
28 Fikirẹ iroro nana otọ na che vwere uvweri,Idjuvwu na che muebri.
Kidie me tarọ nure, mi brorhiẹn nure,Mi che wene ẹwẹn mẹẹ,* yẹrẹ mi che kuomarhẹriẹ mi de je ruoo.
29 Orere na eje djẹre,Ọke rẹ ayen vwo nyo edo rẹ iguiyesi vẹ ihwo re sa umurhabọ.
Ayen ro evunrẹ aghwa na,Ayen yeren eragha na.
A kpairoro vrẹ korere korere,Ohwo vuọvo dia ayeen.”
30 Enẹna ra vwọ ghwọrọ owẹ re na, kẹ die wo che ru?
Wo kuẹ iwun evwavware phiyọ jovwo,Wọ ghwa ekuakua rẹ osẹnvwe rẹ oro phiyọ,Je vwẹ ilẹdi obiebi* vwo siẹ ẹro wẹn.
Ẹkẹvuọvo wo di ru oma wẹn vwo vwo erhuvwu kufia,Ihwo re djẹ nene uwe jovwo sen wẹ re;Asaọkiephana ayen guọnọ reyọ arhọ wẹn.*
31 Kidie mi nyo edo kerẹ edo rẹ aye rọ muọga,Irhivwẹn kerẹ irhivwẹn rẹ aye ro vwiẹ ọmọ rọyen rẹsosuọ,Urhuru rẹ ọmọtẹ ri Zayọn rọ wẹn fẹkpẹ fẹkpẹ.
Ọ da riẹn abọ rọyen phia jẹ ọ ta:
“Okpetu rode kẹ vwẹ, kidie ofu dje vwe* fikirẹ ihwo ri hwe ihwo na.
Eta rehẹ obotọ na
^ Yẹrẹ “Kpare ọkpọ rẹ oka.”
^ Yẹrẹ “Ovwan ghwiẹ udu rẹ ovwan.”
^ Vwẹ Hibru, “Erhẹrotọ,” kọyen, ihwo re rhẹrẹ orere na rere ayen vwọ riẹn ọke ayen vwọ reyọ vwọsuọ.
^ Yẹrẹ “Kidie erhi mẹ.”
^ Yẹrẹ ọ sa dia, “Ukperi rẹ ofovwin.”
^ Yẹrẹ “mrẹ ọkpọ rẹ oka.”
^ Yẹrẹ “Ayen tẹn ona obo re ruẹ umiovwo.”
^ Yẹrẹ “Ọ cha da vwẹẹ.”
^ Yẹrẹ “vwẹ orọnvwọn re vwo gbe ikpẹro.”
^ Yẹrẹ “reyọ erhi wẹn.”
^ Yẹrẹ “ofu dje erhi mẹ.”
