Jerimaya 44:1-30
44 Ota ro bru Jerimaya rhe vwọ kẹ ihwo ri Ju na eje re dia otọ rẹ Ijipt, ihwo re dia Migdọl, Tapanhis, Nọf,* kugbe otọ ri Patrọs:
2 “Ọnana yen oborẹ Jihova rẹ otuofovwin, Ọghẹnẹ rẹ Izrẹl tare, ‘Ovwan mrẹ okpetu eje re me reyọ rhe enu ri Jerusalẹm kugbe irere ri Juda eje, asaọkiephana a ghwọrọ ayen totọ, ohwo vuọvo rha dia evun rayeen.
3 Ọ dia ọtiọyen fikirẹ erọnvwọn ebrabra rẹ ayen ruru vwọ kpare ophu mẹ womarẹ ayen vwọ yanran re ze izobo je ga eghẹnẹ efa rẹ ayen, ovwan, yẹrẹ esẹ rẹ ovwan ride riẹnree.
4 Ki mi jẹ idibo mẹ eje emraro na brẹ ovwan cha, mi dje ayen ejejo:* “Biko ovwan ruẹ emu rẹ ẹgua nana ri mi vwo utuoma kpahen naa.”
5 Ẹkẹvuọvo ayen kerhọ yẹrẹ davwerhọ rẹ ayen vwo kuomarhẹriẹ vwo nẹ imwemwu rayen womarẹ ayen vwo jẹ izobo eze kẹ eghẹnẹ efaa.
6 Ọtiọyena mi de ku ophu ọgangan mẹ kugbe ophu mẹ kuotọ, ọ da la kerẹ erhanre vwọso irere ri Juda kugbe irhuvwun ri Jerusalẹm, ayen de hirhephiyọ asan ra ghwọrọ totọ kugbe asan ofefe, kirobo rẹ ayen hepha nonẹna.’
7 “Asaọkiephana ọnana yen oborẹ Jihova Ọghẹnẹ rẹ otuofovwin, Ọghẹnẹ rẹ Izrẹl tare, ‘Diesorọ ovwan vwọ sua okpetu rode kẹ oma rẹ ovwan rọ da nẹrhẹ kọshare kọshare kugbe kaye kaye, omotete kugbe ọmọboba vwọ ghwọrọ vwo nẹ Juda, rẹ ovwan de jẹ uchekotọ evwo?
8 Diesorọ ovwan vwọ kpare ophu mẹ vẹ iruo rẹ abọ rẹ ovwan womarẹ izobo rẹ ovwan ze vwọ kẹ eghẹnẹ efa vwẹ otọ rẹ Ijipt, rẹ ovwan yanran ra dia na? Ovwan cha ghwọrọ ji hirhephiyọ obo ra vwọ hanrha ekan kugbe ehwẹjẹ vwẹ ohri rẹ ẹgborho rẹ otọrakpọ na eje.
9 Irueru ebrabra rẹ esẹ rẹ ovwan ride kugbe irueru ebrabra rẹ ivie ri Juda, irueru ebrabra rẹ eya rayen, ọtiọyen ji te irueru ebrabra rẹ ovwan kugbe irueru ebrabra rẹ eya rẹ ovwan re ruru vwẹ otọ ri Juda kugbe irhuvwun ri Jerusalẹm chọrọ ovwan ẹro re?
10 Rhi te ọke na, ayen je rhe vwẹ oma rayen kpotọọ,* ayen ji rhi dje oshọẹdjẹ phiaa, yẹrẹ kẹ ayen yan nene irhi mẹ kugbe iji mẹ ri mi phi phiyotọ vwọ kẹ ovwan vẹ esẹ rẹ ovwan ridee.’
11 “Ọtiọyena ọnana yen oborẹ Jihova rẹ otuofovwin, Ọghẹnẹ rẹ Izrẹl tare, ‘Nighere, mi brorhiẹn re me vwọ reyọ okpetu rhe enu rẹ ovwan, re me vwọ ghwọrọ Juda ejobi.
12 Me cha nẹrhẹ uchekotọ ri Juda eje ri brorhiẹn ri vwo kpo otọ rẹ Ijipt ra dia kerẹ erhorha na ghwọrọ vwẹ otọ rẹ Ijipt. Ayen che she womarẹ ọlọkọ je ghwọrọ fikirẹ owẹnvwe; vwo nẹ ọ rọ ma hanvwe re te ọ rọ ma rho, ayen che ghwu womarẹ ọlọkọ vẹ owẹnvwe. Kẹ ayen cha dia ekan, obo ri muẹ ohwo oshọ, obo ra vwọ hanrha ekan, kugbe ehwẹjẹ.
13 Mi che gboja kẹ ihwo re dia otọ rẹ Ijipt kirobo re me vwẹ ọlọkọ, owẹnvwe, kugbe ọga vwo gboja kẹ Jerusalẹm.
14 Uchekotọ ri Juda re yanran ra dia otọ rẹ Ijipt cha djẹ vabọ yẹrẹ sivwin rhọ rẹ ayen de rhivwin rhe otọ ri Judaa. Ayen che vwo owenvwe rẹ ayen vwo rhivwin ra dia oboyin, ẹkẹvuọvo ayen che rhivwiin, jokparẹ imihwo evo re djẹ vabọ.’”
15 Eshare na eje re riẹnre nẹ eya rayen ze izobo vwọ kẹ eghẹnẹ efa vẹ eya na eje ri mudia etiyin, re dia oghwẹgbe rode, kugbe ihwo na eje re dia otọ rẹ Ijipt vwẹ Patrọs, da kpahen kẹ Jerimaya:
16 “Avwanre cha kerhọ rẹ ota ru wọ vwẹ odẹ ri Jihova ta kẹ avwanre naa.
17 Ukperẹ ọtiọyen, avwanre che vwo imuẹro nẹ avwanre ru kota kota rẹ avwanre vwẹ unu rẹ avwanre vwọ ta, rẹ avwanre vwo ze izobo vwọ kẹ Ovie Aye rẹ Odjuvwu* ji ku izobo rẹ udi kuotọ kẹ kirobo rẹ avwanre, esẹ rẹ avwanre ride, ivie rẹ avwanre, kugbe isun rẹ avwanre ruru vwẹ irere ri Juda kugbe irhuvwun ri Jerusalẹm ọke rẹ avwanre vwọ re evun vọn rẹ erọnvwọn ji vwo yovwin kẹ avwanre, rẹ avwanre vwo jẹ okpetu vuọvo ẹmrẹ.
18 Rhanvwẹ ọke rẹ avwanre vwọ dobọ rẹ izobo re ze vwọ kẹ Ovie Aye rẹ Odjuvwu* na kugbe izobo rẹ udi re kuẹ kuotọ kẹ na ji yen erọnvwọn eje vwọ kanre avwanre, rẹ avwanre ji vwo ghwu womarẹ ọlọkọ vẹ owẹnvwe.”
19 Eya na da je vwọ ba: “Ọke rẹ avwanre vwo ze izobo vwọ kẹ Ovie Aye rẹ Odjuvwu* na ji kuẹ izobo rẹ udi kuotọ vwọ kẹ, eshare rẹ avwanre rha rhọnvwephiyọ nẹ avwanre ru ikeki rẹ izobo ra ma phiyọ uhoho rọyen ji ku izobo rẹ udi kuotọ vwọ kẹ?”
20 Etiyin Jerimaya da ta kẹ ihwo na eje, eshare kugbe eya rayen kugbe ihwo na eje re ta ota kẹ na:
21 “Izobo rẹ ovwan, esẹ rẹ ovwan ride, ivie rẹ ovwan, isun rẹ ovwan, kugbe ihwo rẹ otọ na zeri vwẹ irere ri Juda vẹ irhuvwun ri Jerusalẹm—Jihova karophiyọ ayen, e chọrerọ ẹroo!*
22 Ukuotọ rọyen Jihova rhe se chirakon rẹ iruemu ebrabra rẹ ovwan kugbe erọnvwọn rẹ ẹgua rẹ ovwan ruruu, otọ rẹ ovwan da rhe dia asan ra ghwọrọre, obo ri muẹ ohwo oshọ kugbe ekan, ohwo vuọvo rha dia evun rọyeen kirobo rọ hepha nonẹna.
23 Ọ dia ọtiọyen kidie ovwan ze izobo nana, ovwan ji ru umwemwu vwọso Jihova womarẹ ovwan vwo jẹ upho ri Jihova enyo, rẹ ovwan vwo jẹ irhi rọyen, iji rọyen, kugbe ẹkarophiyọ rọyen enene, kọyensorọ okpetu nana vwọ rhe enu rẹ ovwan, kirobo rọ hepha nonẹna.”
24 Jerimaya da je ta vwọ kẹ ihwo na eje kugbe eya na eje: “Ovwan nyo ota ri Jihova, ovwan ihwo ri Juda eje rehẹ otọ rẹ Ijipt.
25 Ọnana yen oborẹ Jihova rẹ otuofovwin, Ọghẹnẹ rẹ Izrẹl tare, ‘Oborẹ ovwan vẹ eya rẹ ovwan vwẹ unu rẹ ovwan ta na, ovwan vwẹ abọ rẹ ovwan ruo gba nure, kidie ovwan tare: “Vwọrẹ imuẹro avwanre che ru ive rẹ avwanre gba rẹ avwanre vwo ze izobo vwọ kẹ Ovie Aye rẹ Odjuvwu* na ji ku udi rẹ izobo kuotọ vwọ kẹ.” Ovwan eya na che jẹ ive rẹ ovwan eruo gbaa.’
26 “Ọtiọyena nyo ota ri Jihova, ovwan ihwo ri Juda eje re dia otọ rẹ Ijipt: ‘“Nighere, me vwẹ odẹ mẹ rode na vwo duvwun iyorin,” ọtiọyen Jihova tare, “nẹ o rhe vwo ohwo ri Juda vuọvo vwẹ otọ rẹ Ijipt eje ro che se odẹ mẹ vwẹ iyorin eduvwon rọ da taa nẹ, ‘Rẹ Jihova Ọrovwori ro Me Kpenu na vwọ herọ na!’
27 Asaọkiephana me rhẹrẹ ayen re me vwọ reyọ okpetu rhe, ọ dia obo ri yomaa; ihwo ri Juda eje rehẹ otọ rẹ Ijipt cha ghwọrọ womarẹ ọlọkọ vẹ owẹnvwe bẹsiẹ ayen che vwo jẹ dia ọfa.
28 Imihwo yen cha vabọ rẹ ọlọkọ ji rhivwin vwo nẹ otọ rẹ Ijipt kpo otọ ri Juda. Ọke yena, uchekotọ ri Juda eje re rhe otọ rẹ Ijipt rhe dia ke cha riẹn ohwo rẹ ota rọyen rugba, sẹ ọmẹ yẹrẹ ọrayen!”’”
29 “‘Ọnana yen oka vwọ kẹ ovwan,’ ọtiọyen Jihova tare, ‘nẹ mi che gboja vwọ kẹ ovwan vwẹ etinẹ na, rere ovwan vwọ riẹn nẹ okpetu ri mi veri vwọso ovwan na che je ruẹgbaa.
30 Ọnana yen oborẹ Jihova tare: “Nighere, mi phiẹ Fero Họfra ovie rẹ Ijipt phiyọ obọ rẹ ivwighrẹn rọyen kugbe ihwo re guọnọ arhọ* rọyen reyọ, kirobo ri mi phi Ovie Zẹdikaya ri Juda phiyọ obọ rẹ Ovie Nẹbukadnẹza* ri Babilọn rọ dia ọvweghrẹn rọyen, rọ je guọnọ arhọ* rọyen reyọ na.”’”
Eta rehẹ obotọ na
^ Yẹrẹ “Mẹmfis.”
^ Vwẹ Hibru, “ri mi vrẹn edegburhiọke jẹ.”
^ Yẹrẹ “ayen ji rhi muomaphiyọọ.”
^ Odova rẹ ọghẹnẹ rẹ aye rẹ ihwo rẹ Izrẹl ri chukoku Ọghẹnẹ gare; ọ sa dianẹ ayen vwo imuẹro nẹ ọyen ọghẹnẹ rẹ aye rọ nẹrhẹ a sa mrevun.
^ Odova rẹ ọghẹnẹ rẹ aye rẹ ihwo rẹ Izrẹl ri chukoku Ọghẹnẹ gare; ọ sa dianẹ ayen vwo imuẹro nẹ ọyen ọghẹnẹ rẹ aye rọ nẹrhẹ a sa mrevun.
^ Odova rẹ ọghẹnẹ rẹ aye rẹ ihwo rẹ Izrẹl ri chukoku Ọghẹnẹ gare; ọ sa dianẹ ayen vwo imuẹro nẹ ọyen ọghẹnẹ rẹ aye rọ nẹrhẹ a sa mrevun.
^ Vwẹ Hibru, “e kọn ro ubiudu rọyen.”
^ Odova rẹ ọghẹnẹ rẹ aye rẹ ihwo rẹ Izrẹl ri chukoku Ọghẹnẹ gare; ọ sa dianẹ ayen vwo imuẹro nẹ ọyen ọghẹnẹ rẹ aye rọ nẹrhẹ a sa mrevun.
^ Yẹrẹ “erhi.”
^ Vwẹ Hibru, “Nẹbukadrẹza,” idjerhe ọfa re vwo sio.
^ Yẹrẹ “erhi.”
