Jerimaya 40:1-16
40 Ota ro nẹ obọ ri Jihova bru Jerimaya rhe vwẹ ọke rẹ Nẹbuzaradan rọ dia onotu rẹ ihwo re rhẹrẹ na vwo siobọno vwẹ Rema nu. O muro kpo etiyin vẹ ejọnrọn vwẹ abọ rọyen, ọ jehẹ ohri rẹ ihwo ri Jerusalẹm kugbe Juda eje re muẹ kpo ighuvwu vwẹ Babilọn.
2 Etiyin onotu rẹ ihwo re rhẹrẹ na da reyọ Jerimaya kpo ọkọkọ, ọ da ta kẹ: “Jihova Ọghẹnẹ wẹn mraro rẹ okpetu nana kpahen etinẹ na,
3 Jihova ruro kirobo rọ tare, kidie ovwan ru umwemwu vwọso Jihova, ovwan ji nyupho rọyeen. Kọyensorọ ọnana vwọ phia kẹ ovwan na.
4 Asaọkiephana me rhan ejọnrọn rehẹ abọ wẹn na nẹ abọ wẹn nonẹna. O de shephiyọ kẹ wẹ wo vwo nene uvwe kpo Babilọn, nene uvwe, me cha vwẹrote we. Ẹkẹvuọvo ọ da dianẹ wọ guọnọ nene uvwe kpo Babilọnii, wo nene uvwee. Nighere, otọ na eje hẹ obaro wẹn. Kpo kasan kasan ro je we.”
5 Tavwen Jerimaya ki kuomarhẹriẹ, Nẹbuzaradan da tanẹ: “Rhivwin bru Gẹdalaya ọmọ rẹ Ahaikam ọmọ ri Shefan, ohwo rẹ ovie ri Babilọn vwo mu vwẹ enu rẹ irere ri Juda rere wo nene dia vwẹ ohri rẹ ihwo na; yẹrẹ kpo kasan kasan ro je we.”
Onotu rẹ ihwo re rhẹrẹ na da vwẹ emuọre kugbe okẹ vwọ kẹ, o de siobọno yanran.
6 Ọtiọyena Jerimaya de bru Gẹdalaya ọmọ rẹ Ahaikam ra vwẹ Mizpa, o de nene dia vwẹ ohri rẹ ihwo ri chekọ vwẹ otọ na.
7 Ọke vwọ yanran na, inotu rẹ otuofovwin na eje rehẹ eko na vẹ eshare rayen de nyo nẹ ovie ri Babilọn reyọ Gẹdalaya ọmọ rẹ Ahaikam vwo mu vwẹ enu rẹ otọ na, nẹ ọ reyerọ vwo mu vwẹ enu rẹ eshare, eya, kugbe emọ vwẹ ohri rẹ igbere rẹ otọ na re ji rhi mu vwo kpo Babilọnii.
8 Ọtiọyena ayen de bru Gẹdalaya rhe vwẹ Mizpa. Ayen yen Ishmẹl ọmọ ri Nẹtanaya, Johenan vẹ Jonatan emọ ri Kariya, Sẹraya ọmọ ri Tanhumẹt, emọ rẹ Ifai ohwo ri Nẹtofa, kugbe Jezanaya ọmọ rẹ ohwo ri Meakat na vẹ eshare rayen.
9 Gẹdalaya ọmọ rẹ Ahaikam ọmọ ri Shefan de duvwun iyorin kẹ ayen vẹ eshare rayen: “Ovwan djoshọ rẹ ovwan vwọ ga ihwo ri Kaldia naa. Ovwan dia otọ na je ga ovie ri Babilọn, ko che yovwin vwọ kẹ ovwan.
10 Vwọ kẹ vwẹ, me cha dia Mizpa mi vwo mudia kẹ ovwan vwẹ obaro rẹ ihwo ri Kaldia ri che rhe brẹ avwanre cha na. Ẹkẹvuọvo ovwan koko iwaini, emamọ rẹ ọke uvo, kugbe evwri rere ovwan phi ayen phiyọ echẹ rẹ ovwan sẹro rẹ erọnvwọn phiyọ, ovwan dia evunrẹ irere rẹ ovwan phikparobọ na.”
11 Ihwo ri Ju eje rehẹ Moab, Amọn, kugbe Idọm, ọtiọyen ji te e rehẹ etọ efa na eje de ji nyo nẹ ovie ri Babilọn yanjẹ uchekotọ vwo nẹ e dia Juda, nẹ ọ je vwẹ Gẹdalaya ọmọ rẹ Ahaikam ọmọ ri Shefan vwo mu vwẹ enu rayen.
12 Ọtiọyena ihwo ri Ju na eje ki rhivwin nẹ asan sansan na eje ra hra ayen ra jovwo na cha, ayen de rhivwin rhe otọ ri Juda, bru Gẹdalaya rhe vwẹ Mizpa. Ayen de koko iwaini kugbe emamọ rẹ ọke uvo buebun.
13 Johenan ọmọ ri Kariya kugbe inotu rẹ otuofovwin na eje rehẹ evunrẹ eko na de bru Gẹdalaya rhe vwẹ Mizpa.
14 Ayen da ta kẹ nẹ: “Wọ riẹnre nẹ Belis ovie rẹ ihwo rẹ Amọn ji Ishmẹl ọmọ ri Nẹtanaya nẹ o rhi hwe we?” Ẹkẹvuọvo Gẹdalaya ọmọ rẹ Ahaikam se ayen gbuyotaa.
15 Etiyin Johenan ọmọ ri Kariya da bẹbẹ ta kẹ Gẹdalaya vwẹ Mizpa: “Me guọnọ yanran ra teyen Ishmẹl ọmọ ri Nẹtanaya hwe, ohwo vuọvo cha riẹẹn. Diesorọ ọ vwọ teyen owẹ hwe, diesorọ ra vwọ hra ihwo ri Juda eje re ghwomakoko bru we rhe je nẹrhẹ uchekotọ ri Juda ghwọrọ?”
16 Ẹkẹvuọvo Gẹdalaya ọmọ rẹ Ahaikam da ta kẹ Johenan ọmọ ri Kariya: “Wo ruẹ ọtiọyeen kidie oborẹ wọ ta kpahan Ishmẹl na efian.”
