Jerimaya 21:1-14
21 Ota ri Jihova de bru Jerimaya rhe ọke rẹ Ovie Zẹdikaya vwo ji Pashọ ọmọ ri Malkaijah kugbe Zẹfanaya ọmọ ri Measaya orherẹn na bro ra, ra vuẹ nẹ,
2 “Biko nene avwanre nọ mie Jihova, kidie Ovie Nẹbukadnẹza* ri Babilọn nene avwanre phiẹ ofovwin. Ọkiọvo Jihova che ru ọvo vwẹ usun rẹ iruo rẹ igbevwunu rọyen fikirẹ avwanre rere o vwo siomareyọ nẹ avwanre.”
3 Jerimaya da ta kẹ ayen: “Ọnana yen oborẹ ovwan cha ta kẹ Zẹdikaya,
4 ‘Ọnana yen oborẹ Jihova Ọghẹnẹ rẹ Izrẹl tare: “Nighere, me reyọ ekuakua ofovwin rehẹ obọ wẹn ru wọ reyọ vwọ họnra ovie ri Babilọn kugbe ihwo ri Kaldia rehẹ otafe re gba riariẹ igbẹhẹ wẹn phiyọ na vwọso owẹ. Ki mi che koko ayen vwẹ uherevie rẹ orere nana.
5 Me cha họnre vwọso owẹ vẹ obọ re me riẹn phia kugbe ugbobọ ọgangan vẹ ophu, ophu ọgangan, kugbe ivun emiovwo ọgangan.
6 Me cha teyen ihwo re dia orere nana hwe, te ihworakpọ te eranvwe. Ayen che ghwu womarẹ ọga ọgangan.”’
7 “‘“Ọyena da wan nu,” ọtiọyen Jihova tare, “ki mi che phi Ovie Zẹdikaya ri Juda kugbe idibo rọyen vẹ ihwo rẹ orere nana—ihwo rẹ ega, ọlọkọ, kugbe owẹnvwe hwerii phiyọ obọ rẹ Ovie Nẹbukadnẹza* ri Babilọn, obọ rẹ ivwighrẹn rayen kugbe obọ rẹ ihwo re guọnọ arhọ* rayen reyọ. Ọ cha reyọ ọlọkọ vwọ teyen ayen hwe. Ọ cha davwerhọ rayeen, ọ cha re ehrọre rayen yẹrẹ gbe arodọnvwẹ kẹ ayeen.”’
8 “Wọ me ta kẹ ihwo nana nẹ, ‘Ọnana yen oborẹ Jihova tare: “Nighere mi phiẹ idjerhe rẹ arhọ vẹ idjerhe rẹ ughwu phiyọ obaro rẹ ovwan.
9 Ọlọkọ, owẹnvwe, kugbe ega che hwe ihwo ri chekọ vwevunrẹ orere nana. Ẹkẹvuọvo kohwo kohwo rọ ro otafe ra vwẹ oma rọyen kpahotọ vwọ kẹ ihwo ri Kaldia re gba riariẹ ovwan phiyọ na cha rhọ, a me je vwẹ arhọ* rọyen vwọ hwosa kẹ.”’
10 “‘“Kidie mi hirharoku orere nana me vwọso okpetu kẹ, ọ dia erhuvwuu,” ọtiọyen Jihova tare. “E che phi orere na phiyọ obọ rẹ ovie ri Babilọn, kọ cha vwẹ erhanre vwọ torhẹ.”
11 “‘Evwruwevwin rẹ ovie ri Juda: Ovwan nyo ota ri Jihova.
12 E uwevwin ri Devid, ọnana yen oborẹ Jihova tare:
“Ovwan brorhiẹn ọsoso kurhiọke kurhiọke,Ovwan sivwin ọ ra ghwa ria vwo nẹ obọ rẹ ohwo rọ ghwa ria na,Rere ophu ọgangan mẹ vwo jẹ la kerẹ erhanreRọ da la rẹ ohwo vuọvo de je se fuonFikirẹ irueru ebrabra rẹ ovwan.”’
13 ‘Nighere, me vwọso ovwan, E ihwo re dia iyara* na,E oragha rẹ otọ ọriẹriẹriẹ na,’ ọtiọyen Jihova tare.
‘Vwọ kẹ ovwan re tanẹ, “Ono yen cha rhe rhe vwọso avwanre?
Ono yen cha kpare rhe asan rẹ avwanre dia na?”
14 Me cha nọ ovwan orhiẹnVwo nene oborẹ irueru rẹ ovwan hepha,’ ọtiọyen Jihova tare.
‘Mi che phi erhanre phiyọ egbo rọyen,Kọ cha torhẹ erọnvwọn eje re riarierẹ phiyọ muotọ.’”
