Jerimaya 1:1-19
1 Enana eta ri Jerimaya* ọmọ ri Hilkaya, ọvo vwẹ usun rẹ irherẹn rẹ Anatọt vwẹ otọ ri Bẹnjamin.
2 Ota ri Jihova de bru vwe rhe vwẹ ọke ri Josaya ọmọ rẹ Emọn ovie ri Juda, vwẹ ukpe rẹ 13 rẹ usuon rọyen.
3 Ota rẹ Ọghẹnẹ ji bru vwe rhe vwẹ ọke ri Jehoyakim ọmọ ri Josaya ovie ri Juda, re te okuphiyọ rẹ ukpe rẹ 11 ri Zẹdikaya ọmọ ri Josaya ovie ri Juda, rhirin re te ọke rẹ ihwo ri Jerusalẹm vwo kpo ighuvwu vwẹ emeranvwe riyorin.
4 Ota ri Jihova de bru vwe rhe nẹ:
5 “Tavwen me ke ma wẹ phiyọ evun rẹ oni wẹn, me riẹn* wẹ,Tavwen e ki vwiẹ wẹ,* mi ru we fon.*
Me vwẹ owẹ vwo ru ọmraro vwọ kẹ ẹgborho na.”
6 Ẹkẹvuọvo me da tanẹ: “Okpetu rode kẹ vwẹ, E Ọrovwori ro Me Kpenu Jihova!
Me riẹn obo ra ta otaa, kidie mẹvwẹ omotete* ghevweghe.”
7 Ọtiọyena Jihova da ta kẹ vwẹ nẹ:
“Wọ tanẹ, ‘Mẹvwẹ omotete ghevweghee.’
Kidie wo che jẹ ihwo nana eje ri mi ji we brẹ ra na ebro raa,Wọ me ta kota kota ri mi ji iji rọyen kẹ wẹ.
8 Wọ djoshọ fikirẹ oborẹ ayen hephaa,Kidie ‘me vẹ owẹ herọ ri mi vwo sivwin uwe,’ ọtiọyen Jihova tare.”
9 Etiyin Jihova da riẹn obọ rọyen, o de vwo te ugbunu mẹ. Jihova da ta kẹ vwẹ: “Mi phi eta mẹ phiyọ ugbunu wẹn nure.
10 Nighere, nonẹna me vwẹ owẹ vwo mu vwẹ enu rẹ ẹgborho sansan kugbe uvie sansan, wo vwo ghwie ji kporon totọ, wọ vwọ ghwọrọ je guọghọ totọ, wọ vwọ bọn je kọn.”
11 Ota ri Jihova da rhoma bru vwe rhe: “Die yen wọ mrẹ, Jerimaya?” Ọtiọyena me da ta: “Me mrẹ oghọn rẹ urhe rẹ almọnd.”*
12 Jihova da ta kẹ vwẹ: “Oborẹ wọ mrẹre na, ọtiọyen ọ ghene hepha, kidie mi rhiẹro mẹ phiyọ mi vwo ru ota mẹ gba.”
13 Ota ri Jihova de bru vwe rhe abọ rivẹ: “Die yen wọ mrẹ?” Me da ta: “Me mrẹ itaso* rọ họrhọ,* unu rọyen gẹre vwo nẹ obohwẹre ọnre rhe.”
14 Etiyin Jihova da ta kẹ vwẹ:
“Obohwẹre ọnre yen okpetu na che nurheVwọso ihwo re dia otọ na eje.
15 Kidie ‘mi se erua eje rẹ uvie sansan rẹ obohwẹre ọnre koko,’ ọtiọyen Jihova tare,‘Ayen cha rhe; dohwo dekete rọyen che vwo viVwẹ asan anurhoro ri Jerusalẹm,Vwọso igbẹhẹ rọyen eje riariẹJe vwọso irere ri Juda ejobi.
16 Ki mi che ghwoghwo ẹdjọeguo mẹ vwọso ayen fikirẹ imwemwu rayen eje,Kidie ayen kpairoro vrẹ vwẹ,Ayen nẹrhẹ ivwirhi rẹ izobo bru kpenu vwọ kẹ eghẹnẹ efaJe vwẹ uyovwin kpotọ vwọ kẹ iruo rẹ abọ rayen.’
17 Ẹkẹvuọvo muegbe vwọ kẹ iruo,*Rere wọ yanran ra vuẹ ayen erọnvwọn eje ri mi ji iji rọyen vwọ kẹ wẹ.
Wo guegue fiki rayeen,Rere mi vwo juwe eguegue vwẹ obaro rayen.
18 Kidie nonẹna mi ru we phiyọ orere ra gbogba riariẹ,Uchivwo rẹ utehru, kugbe igbẹhẹ rẹ ẹrovwo vwọso otọ na eje,Vwọso ivie ri Juda kugbe isun rọyen,Vwọso irherẹn rọyen kugbe ihwo rẹ otọ na.
19 Ayen cha họnre owẹ,Ẹkẹvuọvo ayen che phi we kparobọọ,Kidie ‘me vẹ owẹ herọ ri mi vwo sivwin uwe,’” ọtiọyen Jihova tare.
Eta rehẹ obotọ na
^ O se mudiaphiyọ “Jihova Kpara Kpenu.”
^ Yẹrẹ “jẹ.”
^ Vwẹ Hibru, “Tavwen wo ki nẹ evun rhe.”
^ Yẹrẹ “mi phi we phiyọ ọkọkọ.”
^ Yẹrẹ “emeghene.”
^ Vwẹ Hibru, “rẹ ohwo ro vrẹn nẹ ovwerhẹn.”
^ Yẹrẹ “itaso vẹ unu hẹhẹre.”
^ Vwẹ Hibru, “re djuẹ” o djephia nẹ e djuẹ erhanre phiyọ.
^ Vwẹ Hibru, “Ẹkẹvuọvo chobiẹ fia.”
