Jerimaya 32:1-44
32 Ota ri Jihova ro bru Jerimaya rhe vwẹ ukpe rẹ 10 rẹ Ovie Zẹdikaya ri Juda, kọyen ukpe rẹ 18 ri Nẹbukadnẹza.*
2 Vwẹ ọke yena, jẹ ituofovwin rẹ ovie ri Babilọn gba riariẹ Jerusalẹm, a je kanre Jerimaya ọmraro na dje Otegodo rẹ Uwevwin rẹ Ihwo re Rhẹrẹ na vwẹ uwevwin* rẹ ovie ri Juda.
3 Kidie Ovie Zẹdikaya ri Juda kanrerọ dje rọ vwọ tanẹ, “Diesorọ wọ vwọ mraro ọtiọna? Wọ vwọ tanẹ, ‘Ọnana yen oborẹ Jihova tare: “Mi che phi orere nana phiyọ obọ rẹ ovie ri Babilọn, ọ je cha reyọ,
4 Ovie Zẹdikaya ri Juda cha sa djẹ vabọ rẹ ihwo ri Kaldiaa, kidie e che phio phiyọ obọ rẹ ovie ri Babilọn, ọ vẹ ọyen che hirharoku ohwohwo ta ota.”’
5 ‘O che mu Zẹdikaya kpo Babilọn, etiyin ọ cha dia rhirin re te ọke me vwọ davwerhọ rọyen,’ ọtiọyen Jihova tare. ‘Dede nẹ wọ cha rha họnra vwọsua ihwo ri Kaldia na, jẹ wo che phikparobọọ.’”
6 Jerimaya da ta: “Ota ri Jihova bru vwe rhe nẹ,
7 ‘Nighere Hanamẹl ọmọ ri Shalọm oniọvo rẹ ọsẹ wẹn che bru we rhe je ta: “Dẹ otọ mẹ rọhẹ Anatọt kẹ oma wẹn kidie wo vwo uturhi wọ vwọ dẹ.”’”
8 Hanamẹl ọmọ rẹ oniọvo rẹ ọsẹ mẹ de bru vwe rhe vwẹ Otegodo rẹ Ihwo re Rhẹrẹ na, kirobo rẹ Jihova ghwa ta na, ọ da ta kẹ vwẹ: “Biko dẹ otọ mẹ rọhẹ Anatọt vwẹ otọ ri Bẹnjamin, kidie wo vwo uturhi wọ vwọ dẹ je reyọ vwọ re ughwẹ. Dẹ kẹ oma wẹn.” Vwẹ ọke yena, me da riẹn nẹ ọnana ota ri Jihova.
9 Ọtiọyena me da dẹ otọ na mie Hanamẹl ọmọ rẹ oniọvo rẹ ọsẹ mẹ vwẹ Anatọt. Me da vwanvwe igho na kẹ, shẹkẹl* ighwrẹn kugbe idọnọ efuanfon ihwe.
10 Ọyena vwọ wan nu, mi de sio phiyọ ọbe, me da vwẹ utẹ vwo te, mi de se iseri rhe, me da vwanvwe igho na vwẹ ovwanvwọ.
11 Me da reyọ ẹbe me vwọ dẹ otọ na, ọ ra vwẹ utẹ te vwo nene iji na kugbe oborẹ urhi guọnọre, ọtiọyen ji te ọ ra vwẹ utẹ tee na,
12 me da vwẹ ẹbe me vwọ dẹ otọ na vwọ kẹ Barọk ọmọ ri Neraya ọmọ ri Masaya vwẹ irharo ri Hanamẹl ọmọ rẹ oniọvo rẹ ọsẹ mẹ, vẹ iseri re ghwobọphiyọ ọbe ra vwọ dẹ otọ na, kugbe ihwo ri Ju eje ri chidia Otegodo rẹ Ihwo re Rhẹrẹ na.
13 Me da vwẹ iji kẹ Barọk vwẹ irharo rayen nẹ,
14 “Ọnana yen oborẹ Jihova rẹ otuofovwin, Ọghẹnẹ rẹ Izrẹl tare, ‘Reyọ ẹbe nana, ẹbe me vwọ dẹ otọ na, ọ ra vwẹ utẹ te kugbe ọ ra vwẹ utẹ tee na, rere wo phi ayen phiyọ evunrẹ ochẹ, a sa vwọ sẹro rayen vwẹ ọke grongron.’
15 Kidie ọnana yen oborẹ Jihova rẹ otuofovwin, Ọghẹnẹ rẹ Izrẹl tare, ‘A cha rhoma dẹ iwevwin, etọ kugbe egba rẹ ivaini vwẹ otọ nana.’”
16 Etiyin me da nẹrhovwo rhe Jihova ọke me vwọ reyọ ẹbe rẹ otọ na vwọ kẹ Barọk ọmọ ri Neraya nu:
17 “E Ọrovwori ro Me Kpenu Jihova! Nighere! Wẹ yen vwẹ ogangan wẹn rode vẹ ugbobọ wẹn ru wọ riẹn phia vwọ ma idjuvwu vẹ akpọ na. O vwo emu vuọvo rọ bẹn kẹ wẹẹ,
18 Ohwo ro dje ẹguọnọ ro jẹ rhẹriẹ kẹ ihwo uriorin buebun, ẹkẹvuọvo ọ hwosa rẹ oruchọ rẹ esẹ vwọ kẹ emọ rayen re vwọ kpahen ayen, Ọghẹnẹ rẹ uyota na, Ohwo rode rọ je rho, rẹ odẹ rọyen dia Jihova rẹ otuofovwin na.
19 A mrẹ vwo dje uchebro wẹẹn, wo ji ruiruo ride, wọ mrẹ idjerhe rẹ ihwo eje, ru wọ vwọ hwosa kẹ ohwo ọvuọvo nene idjerhe rọyen vẹ obo ro ruru.
20 Wo ru eka kugbe igbevwunu vwẹ otọ rẹ Ijipt, ra riẹnre rhi te ọke na, ọtiọyena wọ re odẹ kẹ oma wẹn vwẹ Izrẹl kugbe vwẹ ohri rẹ ihworakpọ, kirobo rọ hepha nonẹna.
21 Wọ reyọ ihwo wẹn Izrẹl vwo nẹ otọ rẹ Ijipt vẹ eka, igbevwunu, obọ ọgangan, ugbobọ ra riẹn phia, kugbe irueru ri muoshọ.
22 “Ọke vwọ yan obaro, wọ da vwẹ otọ nana ru wo duvwun iyorin nẹ wọ cha vwọ kẹ esẹ rayen ride na vwọ kẹ ayen, otọ rọ djẹ ọkẹre rẹ ameivie vẹ ame ọnyọn.
23 Ayen rhere je reyọ vwọ re ughwẹ, ẹkẹvuọvo ayen nyẹme wẹẹn yẹrẹ yan nene urhi wẹẹn. Ayen ru orọnvwọn vuọvo ru wo ji iji rọyen kẹ ayen nẹ ayen ruu, ọtiọyena wọ da nẹrhẹ okpetu nana eje she teyen ayen.
24 Nighere! Ihwo rhere rhe gbogba riariẹ orere na phiyọ rẹ ayen vwọ reyọ, ihwo ri Kaldia re họnra vwọsua orere na cha reyọ womarẹ ọlọkọ, owẹnvwe, kugbe ọga; oborẹ wọ tare eje phiare kirobo wọ mrẹ asaọkiephana.
25 Ẹkẹvuọvo, E Ọrovwori ro Me Kpenu Jihova, wọ ta kẹ vwẹ nẹ, ‘Vwẹ igho dẹ otọ na kẹ oma wẹn rere wo se ihwo rhi soseri,’ dede nẹ e che jẹ orere nana ephio phiyọ obọ rẹ ihwo ri Kaldia naa.”
26 Etiyin ota ri Jihova de bru Jerimaya rhe nẹ:
27 “Nighere mẹvwẹ Jihova Ọghẹnẹ rẹ ihworakpọ eje. O vwo obo re bẹn kẹ vwẹ eruo?
28 Ọtiọyena ọnana yen oborẹ Jihova tare, ‘Nighere, mi phiẹ orere nana phiyọ obọ rẹ ihwo ri Kaldia kugbe obọ rẹ Ovie Nẹbukadnẹza* ri Babilọn, kọ cha reyọ.
29 Ihwo ri Kaldia ri nene orere nana họnra na cha rhe ji phi erhanre phiyọ, ayen me torhẹ vẹ iwevwin rẹ ihwo dia enu rayen de ze izobo kẹ Bel rẹ ayen de ji kuẹ udi rẹ izobo kẹ eghẹnẹ efa vwọ kpare ophu mẹ na muotọ.’
30 “‘Kidie obo re brare vwẹ ẹro mẹ ọvo ọyen ihwo rẹ Izrẹl kugbe Juda ruẹ vwo nẹ ọke rẹ eghene rayen rhe; ihwo rẹ Izrẹl ki dje ophu mẹ ẹkpẹkparọ womarẹ iruo rẹ abọ rayen,’ ọtiọyen Jihova tare.
31 ‘Kidie rhanvwẹ ọke ra vwọ bọn orere nana rhi te ọke nana, orere nana ruẹ orọnvwọn ọfaa jokparẹ ophu mẹ rọ kpara kugbe ophu ọgangan rọ sua kẹ vwẹ, ọtiọyena e che je sio nẹ obaro mẹẹ,
32 fikirẹ umiovwo eje rẹ ihwo rẹ Izrẹl kugbe Juda ruru vwọ kpare ophu mẹ—ayen, ivie rayen, isun rayen, irherẹn rayen, emraro rayen, kugbe ihwo ri Juda vẹ ihwo re dia Jerusalẹm.
33 Kẹ ayen chukoku uvwe ọkieje ukperẹ ayen vwo hirhe opharo ku vwe, dede nẹ me davwẹngba vwo dje ayen eyeyono,* jẹ o vwo ọvuọvo rayen rọ kerhọ ro de rhiabọreyọ uyonoo.
34 Ayen de mu edjọ rayen ri tuẹn ohwo oma na phiyọ uwevwin ra vwẹ odẹ mẹ se rere ayen vwo gbe ẹgua.
35 Kpobarophiyọ, ayen bọn asan ri kpenu ri Bel vwẹ Iyara rẹ Ọmọ ri Hinọm,* rere ayen sa vwọ torhẹ emeshare rayen vẹ emetẹ rayen vwẹ erhanre kẹ Molẹk, orọnvwọn ri mi ji iji rọyen kẹ ayeen, rọ je rhe rhe ẹwẹn* mẹ dẹvo mi vwo ru emu rẹ ẹgua tiọyena rọ da nẹrhẹ Juda ru umwemwuu.’
36 “Ọtiọyena ọnana yen oborẹ Jihova Ọghẹnẹ rẹ Izrẹl ta kpahen orere nana rẹ ovwan tanẹ e che phi phiyọ obọ rẹ ovie ri Babilọn womarẹ ọlọkọ, owẹnvwe, kugbe ọga na,
37 ‘Nighere, mi che koko ayen vwo nẹ etọ eje re me hra ayen ra fikirẹ ophu mẹ, ophu ọgangan mẹ, kugbe ophu rode mẹ, me cha reyọ ayen rhivwin rhe etinẹ na je nẹrhẹ ayen dia vwẹ ofuvwegbe.
38 Ayen cha dia ihwo mẹ, ke me cha dia Ọghẹnẹ rayen.
39 Me cha kẹ ayen ubiudu ọvo je nẹrhẹ ayen riẹn idjerhe ọvo rere ayen vwọ djoshọ mẹ ọkieje, fikirẹ erhuvwu robọ rayen kugbe erhuvwu rẹ emọ rayen re vwọ kpahen ayen.
40 Mi che nene ayen re ọphọ ri bẹdẹ, nẹ me cha dobọ rẹ erhuvwu ri mi ruẹ kẹ ayen jii; mi che phi oshọẹdjẹ mẹ phiyọ ubiudu rayen rere ayen vwo juvwe echukokuẹ.
41 Oma cha vwerhen ovwẹ mi vwo ru emu esiri kẹ ayen, me cha vwẹ ubiudu mẹ eje vẹ erhi* mẹ eje vwọ kọn ayen phiyọ otọ nana.’”
42 “Kidie ọnana yen oborẹ Jihova tare, ‘Kirobo me so okpetu ride nana eje kẹ ihwo nana na, ọtiọyen me je cha nẹrhẹ uyoyovwin* eje ri mi ve vwọ kẹ ayen na bru ayen rhe.
43 A cha rhoma dẹ etọ vwẹ otọ nana dede nẹ ovwan tanẹ, “Ọnana otọ ofefe, ohworakpọ vẹ eranvwe herọọ, e phiro phiyọ obọ rẹ ihwo ri Kaldia nure.”’
44 “‘A cha vwẹ igho vwọ dẹ etọ, e che si ẹbe ra vwọ dẹ etọ na je vwẹ utẹ te ayen, e che si ihwo re cha dia iseri vwẹ otọ ri Bẹnjamin, vwẹ ekogho re riariẹ Jerusalẹm phiyọ, vwẹ irere ri Juda, vwẹ irere rẹ ekogho rẹ igbenu na, vwẹ irere rẹ ushekpotọ na, kugbe vwẹ irere rẹ obọrhen ọnre na, kidie me cha reyọ ihwo rẹ ayen mu yanran na rhivwin rhe,’ ọtiọyen Jihova tare.”
Eta rehẹ obotọ na
^ Vwẹ Hibru, “Nẹbukadrẹza,” idjerhe ọfa re vwo sio.
^ Yẹrẹ “ọguan.”
^ Shẹkẹl ọvo vẹ igramu 11.4 abavo. Ni Apẹndis B14.
^ Vwẹ Hibru, “Nẹbukadrẹza,” idjerhe ọfa re vwo sio.
^ Vwẹ Hibru, “dede nẹ mi vrẹn edegburhiọke ji yono ayen.”
^ Ni Eta re Vwomaphia, “Gehina.”
^ Vwẹ Hibru, “ubiudu.”
^ Ni Eta re Vwomaphia.
^ Yẹrẹ “ru emu esiri na.”
