Jerimaya 52:1-34
52 Zẹdikaya hẹ ẹgbukpe 21 vwẹ ọke rọ vwọ dia ovie, o sunru ẹgbukpe 11 vwẹ Jerusalẹm. Odẹ rẹ oni rọyen Hamuta ọmọtẹ ri Jerimaya ri Libna.
2 O ru obo re brare vwẹ ẹro ri Jihova, o ru erọnvwọn eje rẹ Jehoyakim ruru.
3 Erọnvwọn nana phiare vwẹ Jerusalẹm vẹ Juda fikirẹ ophu ri Jihova bẹsiẹ ro vwo si ayen nẹ obaro rọyen. Zẹdikaya de gbe vwọso ovie ri Babilọn.
4 Vwẹ ukpe rirhirin rẹ usuon ri Zẹdikaya, vwẹ emeranvwe rihwe, vwẹ ẹdẹ rihwe rẹ emeranvwe na, Ovie Nẹbukadnẹza* ri Babilọn vẹ otuofovwin rọyen eje da rhe rhi nene Jerusalẹm họnre. Ayen wonphiyọ* etiyin rere ayen nene họnre, ayen da je bọn igbẹhẹ riariẹ phiyọ.
5 A da gba riariẹ orere na phiyọ rhirin re te ukpe rẹ 11 rẹ Ovie Zẹdikaya.
6 Vwẹ emeranvwe rẹne, vwẹ ẹdẹ rirhirin rẹ emeranvwe na, owẹnvwe na da rhe gan mamọ vwẹ orere na, emuọre vuọvo rha herọ vwọ kẹ ihwo rẹ otọ naa.
7 Vwẹ ukuotọ rọyen, e de kporon igbẹhẹ rẹ orere na, isodje na eje da djẹ nẹ orere na vwẹ ason, ayen da wan anurhoro rọhẹ uvwre rẹ igbẹhẹ ivẹ rọ kẹrẹ udju rẹ ovie na, jẹ ihwo ri Kaldia na gba riariẹ orere na phiyọ; ayen da wan idjerhe rẹ Araba na djẹ.
8 Ẹkẹvuọvo otuofovwin ri Kaldia na da vwọtua ovie na, ayen da djẹ Zẹdikaya mu vwẹ aton ri Jẹriko, isodje rọyen eje da hrabọ jovwo.
9 Etiyin ayen de mu ovie na, ayen da reyọ rhe ovie ri Babilọn vwẹ Ribla vwẹ otọ ri Hemat, o de brorhiẹn hwe.
10 Ovie ri Babilọn de hwe emọ ri Zẹdikaya vwẹ irharo rọyen, o de ji hwe isun ri Juda eje vwẹ etiyin vwẹ Ribla.
11 Ọyena vwọ wan nu, ovie ri Babilọn de rhuẹro ri Zẹdikaya je vwẹ igoni rẹ ẹrovwo vwọ kanrọ, o de muo kpo Babilọn ji muo phiyọ uwodi rhirin re te ọke rẹ ughwu rọyen.
12 Vwẹ emeranvwe riyorin, vwẹ ẹdẹ rihwe rẹ emeranvwe na, kọyen vwẹ ukpe rẹ 19 rẹ Ovie Nẹbukadnẹza* ovie ri Babilọn, Nẹbuzaradan onotu rẹ ihwo re rhẹrẹ na rọ dia odibo rẹ ovie ri Babilọn da ro evunrẹ Jerusalẹm.
13 Ọ da torhẹ uwevwin ri Jihova, uwevwin* rẹ ovie na, kugbe iwevwin ri Jerusalẹm eje; ọ je torhẹ kuwevwin kuwevwin rode.
14 Otuofovwin ri Kaldia eje re vẹ onotu rẹ ihwo re rhẹrẹ na gba herọ de kporon igbẹhẹ re riariẹ Jerusalẹm totọ.
15 Nẹbuzaradan rọ dia onotu rẹ ihwo re rhẹrẹ na de mu evo vwẹ usun rẹ igbere na kugbe ihwo ri chekọ ra yan jovwo vwẹ orere na kpo ighuvwu. O ji mu ihwo re djẹ bru ovie ri Babilọn ra ra vwomaba ẹbẹre rọyen ọtiọyen ji te ewena ri chekọ na.
16 Ẹkẹvuọvo Nẹbuzaradan onotu rẹ ihwo re rhẹrẹ na da yanjẹ evo vwo vwẹ usun rẹ ihwo re ma dia igbere vwẹ otọ na rere ayen dia ihwo re vwẹrote ivaini kugbe ihwo ra gba vwo ruiruo.
17 Ihwo ri Kaldia na da guọghọ ichivwo rẹ ẹrovwo rẹ uwevwin ri Jihova na chẹghẹchẹghẹ kugbe erọnvwọn re vwo muẹ eghwa na vẹ Abadi rẹ ẹrovwo rẹ uwevwin ri Jihova na, ayen de mu ẹrovwo na eje kpo Babilọn.
18 Ayen je kua igogono na, isaboro na, itijoro re vwo brẹ iwiki na, imize ikokodo na, iko na, kugbe ekuakua rẹ ẹrovwo eje ra reyọ vwo ruiruo vwẹ uwevwin rẹ ẹga na.
19 Onotu rẹ ihwo re rhẹrẹ na kua ize na, erọnvwọn ra vwọ wan erhanre na, imize ikokodo na, igogono na, igburhukpẹ na, iko na, kugbe imize ikokodo ra vwẹ uvi rẹ oro kugbe idọnọ efuanfon vwo ru na.
20 Vwọ kpahen ichivwo ivẹ na, Abadi na, erhuẹn rẹ ẹrovwo 12 rehẹ obotọ rẹ Abadi na, kugbe erọnvwọn re vwo muẹ eghwa rẹ Ovie Solomọn ru phiyọ uwevwin ri Jihova na, a sa vwanvwe ọnyẹ rẹ ẹrovwo re vwo ru ayen ejee kidie i bun nọ.
21 Vwọ kpahen ichivwo rẹ ẹrovwo ivẹ na, uchivwo ọvuọvo kpenu te kubit* 18, ufi rẹ ovwanvwọ ro gron te kubit 12 se kion riariẹ, ọkpan rọyen irhiabọ ẹne ra tan kugbe* vẹ uphrophro vwẹ evun rọyen.
22 Ẹrovwo yen e vwo ru uyovwin rọhẹ enu rọyen; ugrongron rẹ uyovwin ọvo kubit iyorin; ẹrovwo yen e vwo ru orọnvwọn rọ họhọ ariri na kugbe ipọmigranẹti re riariẹ uyovwin na phiyọ. Uchivwo rivẹ na vẹ ọyen oka vuọvo, ọtiọyen ji te ipọmigranẹti na.
23 Ipọmigranẹti 96 yehẹ ọkọkọ rayen; ipọmigranẹti eje re riariẹ orọnvwọn rọ họhọ ariri na phiyọ kẹ 100.
24 Onotu rẹ ihwo re rhẹrẹ na ji mu Sẹraya orherẹn rode na, Zẹfanaya orherẹn rọ vwẹ ukẹcha kẹ na, kugbe ihwo erha re rhẹrẹ anurhoro na.
25 Ọ da dia evunrẹ orere na de mu ọdiaguare* ọvo rọ dia onotu vwẹ enu rẹ isodje na, ihwo ighwrẹn re ma kẹrẹ ovie na ra mrẹre vwẹ orere na, ọtiọyen ji te osiọbe rẹ onotu rẹ otuofovwin na ro koko ihwo na kẹ ofovwin vwẹ otọ na, kugbe eshare 60 rẹ ihwo ghevweghe rẹ otọ na ra je mrẹ vwẹ orere na.
26 Nẹbuzaradan onotu rẹ ihwo re rhẹrẹ na de mu ayen bru ovie ri Babilọn ra vwẹ Ribla.
27 Ovie ri Babilọn da teyen ayen hwe vwẹ Ribla vwẹ otọ ri Hemat. Enẹ kọyen e mu Juda vwo nẹ otọ rọyen vwo kpo ighuvwu.
28 Enana yen ihwo rẹ Nẹbukadnẹza* mu kpo ighuvwu: vwẹ ukpe righwrẹn na, ihwo ri Ju 3,023.
29 Vwẹ ukpe rẹ 18 ri Nẹbukadnẹza,* ihwo* 832 yen e mu vwo nẹ Jerusalẹm.
30 Vwẹ ukpe rẹ 23 ri Nẹbukadnẹza,* Nẹbuzaradan onotu rẹ ihwo re rhẹrẹ na de mu ihwo* ri Ju 745 kpo ighuvwu.
Ihwo* eje re mu kpo ighuvwu da dia 4,600.
31 Vwẹ ukpe rẹ 37 rẹ Ovie Jehoyakin ri Juda vwọ hẹ ighuvwu, vwẹ emeranvwe rẹ 12, vwẹ ẹdẹ 25 rẹ emeranvwe na, Ovie Ivu-mẹrodak ri Babilọn de siobọnẹ Ovie Jehoyakin ri Juda* je reyọ ro otafe vwo nẹ uwodi vwẹ ukpe rọ vwọ dia ovie na.
32 O de nene ta ota vwẹ idjerhe rẹ ọghọ, ọ da nẹrhẹ ekete rọyen kpenu nọ ekete rẹ ivie ri chekọ re vẹ ọyen gba hẹ Babilọn.
33 Ọtiọyena Jehoyakin de ku iwun rẹ uwodi rọyen nu, ọ da riemu vwẹ imẹjẹ rẹ ovie na kẹdi kẹdẹ vwẹ ẹdẹ rẹ akpọ rọyen eje.
34 Kẹdi kẹdẹ kọyen a vwọ vwẹ uchunu rẹ emu rẹ ovie ri Babilọn tare nẹ a vwọ kẹ, vwọ kẹ, vwẹ ẹdẹ rẹ akpọ rọyen eje, rhirin re te ọke ro vwo ghwu.
Eta rehẹ obotọ na
^ Vwẹ Hibru, “Nẹbukadrẹza,” idjerhe ọfa re vwo sio.
^ Yẹrẹ “Ayen mu erhọn phiyọ.”
^ Vwẹ Hibru, “Nẹbukadrẹza,” idjerhe ọfa re vwo sio.
^ Yẹrẹ “ọguan.”
^ Kubit ọvo vẹ isẹntimita 44.5 (inshisi 17.5) abavo. Ni Apẹndis B14.
^ Ohẹhẹre rẹ urhiobọ ọvo vẹ isẹntimita 1.85 (inshisi 0.73) abavo. Ni Apẹndis B14.
^ Ọnana ohwo rode vwẹ usuon.
^ Vwẹ Hibru, “Nẹbukadrẹza,” idjerhe ọfa re vwo sio.
^ Vwẹ Hibru, “Nẹbukadrẹza,” idjerhe ọfa re vwo sio.
^ Yẹrẹ “erhi.”
^ Vwẹ Hibru, “Nẹbukadrẹza,” idjerhe ọfa re vwo sio.
^ Yẹrẹ “erhi.”
^ Yẹrẹ “erhi.”
^ Vwẹ Hibru, “Babilọn da kpare uyovwin rẹ Ovie Jehoyakin ri Juda kpenu.”
