Jerimaya 28:1-17
-
Jerimaya vẹ Hananaya ọmraro rẹ efian na (1-17)
28 Vwẹ ukpe yena vuọvo na, vwẹ ọtonphiyọ rẹ usuon rẹ Ovie Zẹdikaya ri Juda, vwẹ ukpe rẹne, vwẹ emeranvwe riyorin, ọmraro Hananaya ọmọ rẹ Azọ ro nẹ Gibiọn rhe da ta kẹ vwẹ vwẹ uwevwin ri Jihova vwẹ irharo rẹ irherẹn na kugbe ihwo na eje nẹ:
2 “Ọnana yen oborẹ Jihova rẹ otuofovwin, Ọghẹnẹ rẹ Izrẹl tare, ‘Mi che vwirhin urhekpe rẹ ovie ri Babilọn.
3 Vwẹ uvwre rẹ ẹgbukpe ivẹ, me cha ghwẹ ekuakua rẹ uwevwin ri Jihova eje rẹ Ovie Nẹbukadnẹza ri Babilọn kua nẹ etinẹ kpo Babilọn na rhivwin rhe etinẹ na.’”
4 “‘Me je cha reyọ Jẹkonaya ọmọ ri Jehoyakim, ovie ri Juda kugbe ihwo ri Juda eje re mu kpo ighuvwu vwẹ Babilọn rhivwin rhe etinẹ na,’ ọtiọyen Jihova tare, ‘kidie mi che vwirhin urhekpe rẹ ovie ri Babilọn.’”
5 Etiyin Jerimaya ọmraro na da ta ota kẹ Hananaya ọmraro na vwẹ irharo rẹ irherẹn na kugbe ihwo na eje ri mudia uwevwin ri Jihova na.
6 Jerimaya ọmraro na da ta: “Isẹ!* E jẹ Jihova ru ọnana! E jẹ Jihova ru eta ru wọ mraro rọyen na gba rere ọ ghwẹ ekuakua rẹ uwevwin ri Jihova je reyọ ihwo eje re mu kpo ighuvwu vwẹ Babilọn rhivwin rhe etinẹ na!
7 Ẹkẹvuọvo biko, kerhọ rẹ ota nana re me ta kẹ wẹ vẹ ihwo na eje na.
8 Vwẹ ọke grongron re wanre, emraro re kobaro kẹ vwẹ vẹ owẹ mraro kẹ etọ buebun kugbe uvie ride sansan vwọ kpahen ofovwin, okpetu, kugbe ọga.
9 Ọ da dianẹ ọmraro mraro kpahen ufuoma rẹ ota rẹ ọmraro yena de rugba, ka riẹn nẹ Jihova yen ghini ji ọmraro yena.”
10 Etiyin Hananaya ọmraro na da reyọ urhekpe na nẹ ohọre rẹ ọmraro Jerimaya, o de vwirhon.
11 Hananaya da ta vwẹ irharo rẹ ihwo na eje nẹ, “Ọnana yen oborẹ Jihova tare, ‘Enẹ yen mi che vwirhin urhekpe rẹ Ovie Nẹbukadnẹza ri Babilọn vwo nẹ ohọre rẹ ẹgborho na eje vwẹ uvwre rẹ ẹgbukpe ivẹ.’” Jerimaya ọmraro na da yanran.
12 Ọke rẹ Hananaya ọmraro na vwo vwirhin urhekpe na vwo nẹ ohọre ri Jerimaya ọmraro na nu, ovuẹ nana de nẹ obọ ri Jihova bru Jerimaya rhe:
13 “Yanran ra ta kẹ Hananaya nẹ, ‘Ọnana yen oborẹ Jihova tare: “Wo vwirhin urhekpe rẹ urhe ẹkẹvuọvo wọ cha vwẹ urhekpe rẹ utehru vwo wene ayen.”
14 Kidie ọnana yen oborẹ Jihova rẹ otuofovwin, Ọghẹnẹ rẹ Izrẹl tare: “Mi che phi urhekpe rẹ utehru phiyọ ohọre rẹ ẹgborho nana eje, rere ayen ga Ovie Nẹbukadnẹza ri Babilọn, ayen cha ga. Mi ji che phi eranvwe rẹ aghwa na dede phiyọ obọ rọyen.”’”
15 Etiyin Jerimaya ọmraro na da ta kẹ Hananaya ọmraro na nẹ, “Biko kerhọ, E Hananaya! Jihova ji wee, ẹkẹvuọvo wọ nẹrhẹ ihwo nana vwẹroso efian.
16 Ọtiọyena ọnana yen oborẹ Jihova tare, ‘Nighere! Mi si we vwo nẹ otọrakpọ na. Ukpe nana wo che ghwu kidie wo phiuduphiyọ ihwo awọ vwo gbe vwọso Jihova.’”
17 Ọtiọyena Hananaya ọmraro na de ghwu vwẹ emeranvwe righwrẹn rẹ ukpe yena.
Eta rehẹ obotọ na
^ Yẹrẹ “E jẹ ọ dia ọtiọyen!”
