Jerimaya 11:1-23
11 Ọnana yen ota ro nẹ obọ ri Jihova bru Jerimaya rhe, nẹ,
2 “Ovwan nyo eta rẹ ọphọ nana, ovwan ihwo!
“Ta* ayen kẹ ihwo ri Juda kugbe ihwo re dia Jerusalẹm
3 wọ me ta kẹ ayen nẹ, ‘Ọnana yen oborẹ Jihova Ọghẹnẹ rẹ Izrẹl tare: “Ekan kẹ ohwo ro muọghọ kẹ eta rẹ ọphọ nanaa,
4 ri mi ji iji rọyen kẹ esẹ rẹ ovwan ride vwẹ ẹdẹ me reyọ ayen nẹ otọ rẹ Ijipt, vwo nẹ ogidi erhanre ra vwọ wran utehru rhe, re me vwọ tanẹ, ‘Ovwan nyo urhuru mẹ, rere ovwan ru erọnvwọn eje ri mi ji iji rọyen kẹ ovwan; kẹ ovwan cha dia ihwo mẹ, ke me cha dia Ọghẹnẹ rẹ ovwan,
5 rere mi se vwo ru oborẹ mi duvwun iyorin rọyen kẹ esẹ rẹ ovwan ride, re me vwọ vwẹ otọ rọ djẹ ọkẹre rẹ ameivie vẹ ame ọnyọn vwọ kẹ ayen, kirobo rọ hepha nonẹna.’”’”
Me da kpahen: “Isẹ,* E Jihova.”
6 Etiyin Jihova da ta kẹ vwẹ: “Ghwoghwo eta nana eje vwẹ irere ri Juda kugbe irhuvwun ri Jerusalẹm: ‘Ovwan nyo eta rẹ ọphọ nana rere ovwan ru ayen.
7 Kidie me nabọ vwẹ uchebro vwọ kẹ esẹ rẹ ovwan ride vwẹ ẹdẹ re me reyọ ayen nẹ otọ rẹ Ijipt rhe rhi te ọke nana, ri mi vwo dje ayen ẹvuẹvuẹ nẹ,* “Ovwan nyo urhuru mẹ.”
8 Ẹkẹvuọvo ayen kerhọ yẹrẹ phi erhọ phiyotọọ; ukperẹ ọtiọyen, ayen ọvuọvo ru udu gangan vwo ru nene obo rehẹ ubiudu umwemwu rọyen. Ọtiọyena me da nẹrhẹ eta rẹ ọphọ nana eje ri mi ji iji rọyen kẹ ayen nẹ ayen ru rẹ ayen rhọnvwe ruu na phia kẹ ayen.’”
9 Jihova da ta kẹ vwẹ: “Ihwo ri Juda kugbe ihwo re dia Jerusalẹm jiroro rẹ ayen vwo gbe vwọso ovwẹ.
10 Ayen rhivwin re ru umwemwu rẹ esẹ rayen ride rẹ ọke awanre re rhọnvwe nyo eta mẹẹ ruru. Ayen ji nene eghẹnẹ efa je ga ayen. Uwevwin rẹ Izrẹl kugbe uwevwin ri Juda gbe ọphọ re me vẹ esẹ rayen ride rere ku.
11 Ọtiọyena ọnana yen oborẹ Jihova tare, ‘Nighere, me cha nẹrhẹ okpetu rẹ ayen cha sa vrabọ rọyeen phia kẹ ayen. Ọke rẹ ayen de kperi se vwe vwọ kẹ ukẹcha, me cha kerhọ rayeen.
12 Vwẹ ọke yena ihwo re dia irere ri Juda kugbe ihwo re dia Jerusalẹm ki che bru eghẹnẹ rẹ ayen ze izobo kẹ* na ra re kperi vwọ kẹ ukẹcha, ẹkẹvuọvo enana che se sivwin ayen vwẹ ọke rẹ okpetu rayen naa.
13 Kidie eghẹnẹ wẹn rhe dia buebun kerẹ irere wẹn re, E Juda, kirobo rẹ irhuvwun ri Jerusalẹm bun te, ọtiọyen egbada rẹ ovwan so vwọ kẹ erọnvwọn rẹ oma rọyen vua ohwo* na ji bun te, egbada re de che ze izobo vwọ kẹ Bel.’
14 “Vwọ kẹ wẹ,* wọ nẹrhovwo fikirẹ ihwo nanaa. Wo kperẹ se vwe yẹrẹ nẹrhovwo rhe vwe fiki rayeen, kidie me cha kerhọ ọke rẹ ayen de kperi se vwe fikirẹ okpetu rayeen.
15 Uturhi vọ yen ọ ri mi vwo ẹguọnọ rọyen vwori rọ vwọ dia uwevwin mẹRọ vwọ dianẹ ihwo buebun ruẹ umwemwu na?
Kẹ izobo rẹ eranvwe* rẹ ayen ze na se bi okpetu na nẹ uwe oma ọke rọ da rhe?
Ku wọ cha ghọghọ vwẹ ọke yena?
16 O vwo ọke ọvo rẹ Jihova vwo se we urhe rẹ oliv rọ nabọ ghwẹ ẹbe phiyọ,Yoyovwin vẹ emamọ iyoyovwin.
Vẹ edo rode, o de phi erhanre phiyọ,Ayen ji vwirhin eghọn rọyen.
17 “Jihova rẹ otuofovwin rọ dia Ohwo rọ kọn wẹ na, tarọ nure nẹ okpetu cha phia kẹ wẹ fikirẹ umiovwo rẹ uwevwin rẹ Izrẹl kugbe uwevwin ri Juda ruru, rẹ ayen vwo gbe vwe ku womarẹ izobo rẹ ayen ze kẹ Bel.”
18 Jihova vuẹ vwẹ kpahọn rere me vwọ riẹn;Vwẹ ọke yena, wọ nẹrhẹ me mrẹ oborẹ ayen ruẹ.
19 Me pha dẹndẹn kerẹ omogodẹ re suẹn yanran re hwe.
Me rha riẹn nẹ ayen jiroro rẹ umwemwu kpahan ovwẹẹ, nẹ,
“E jẹ avwanre ghwọrọ urhe na vẹ emamọ rọyen,E jẹ avwanre nyavwọ vwo nẹ otọ rẹ ihwo ri yerẹn,Rere e vwo jẹ odẹ rọyen ẹkarophiyọ ọfa.”
20 Ẹkẹvuọvo Jihova rẹ otuofovwin guẹdjọ rẹ ọsoso;Ọ fuẹrẹn iroro rẹ obevun* rẹ ohwo kugbe ubiudu na.
Juvwe mrẹ ihriẹriọ wẹn vwẹ enu rayen,Kidie owẹ yen mi mu ẹdjọ mẹ rhe.
21 Ọtiọyena ọnana yen oborẹ Jihova ta kpahen ihwo rẹ Anatọt re guọnọ reyọ arhọ* wẹn, re tanẹ, “Wọ gbe mraro vwẹ odẹ ri Jihovaa, ọ rha dia ọtiọyeen avwanre cha teyen owẹ hwe”;
22 ọtiọyena ọnana yen oborẹ Jihova rẹ otuofovwin tare: “Nighere, me cha nọ ayen orhiẹn. A cha vwẹ ọlọkọ teyen ighene eshare na hwe, owẹnvwe mi rhe hwe emeshare kugbe emetẹ rayen ghwu.
23 A cha yanjẹ uchekotọ vwoo, kidie me cha ghwa okpetu rhe ihwo rẹ Anatọt vwẹ ukpe rẹ me cha vwọ nọ ayen orhiẹn na.”
Eta rehẹ obotọ na
^ Ọ họhọre nẹ Jerimaya yen a ta ota na kẹ.
^ Yẹrẹ “E jẹ ọ dia ọtiọyen!”
^ Vwẹ Hibru, “ri mi vwo vrẹn vwẹ edegburhiọke je vuẹ ayen nẹ.”
^ Yẹrẹ “ayen nẹrhẹ ivwirhi rẹ izobo brẹ kpenu kẹ.”
^ Yẹrẹ “kẹ ọghẹnẹ rẹ oma rọyen vua ohwo.”
^ Kọyen, Jerimaya.
^ Kọyen, izobo re ze vwẹ uwewin rẹ ẹga na.
^ Vwẹ Hibru, “Ọ fuẹrẹn ibiehun.”
^ Yẹrẹ “erhi.”
