Jerimaya 14:1-22
14 Ọnana yen ota ri Jihova ro bru Jerimaya rhe kpahen ọkanrovwẹ rẹ osio na:
2 Juda vwerẹ, ẹchẹ rẹ anurhoro rọyen guọghọ totọ.
I kporon ro otọ je hra totọ,E ji nyo edo rẹ ihwo re viẹ vwẹ Jerusalẹm.
3 Inini rayen de ji idibo* rayen re vo ame.
Ayen da yan kpo erhare na,* jẹ ayen mrẹ amee.
Ayen de rhivwin rhe vẹ echẹ ifefe.
Oma vo ayen, oma je vwerhen ayeen,Ayen de rhurhu uyovwin rayen.
4 Otọ na vare,Kidie osio rhọ kuoo,O de gbe eghwẹrẹ na unu, ayen de rhurhu uyovwin rayen.
5 Orhua rẹ aye rọhẹ evunrẹ aghwa na dede kpairoro vrẹ ọmọboba rọyenKidie odin herọọ.
6 Ekẹkẹtẹ rẹ aghwa na mudia enu rẹ igbenu itete rẹ odin vuọvo hephaa na.
Ayen wẹn fẹkpẹ fẹkpẹ guọnọ odju kerẹ eranko rẹ aghwa;Ẹro rayen she divwin kidie odin vuọvo herọọ.
7 Dede nẹ oruchọ rẹ avwanre soseri hwe avwanre,E Jihova, jowọ fikirẹ odẹ wẹn.
Kidie uruemu ri jẹ evun ẹfuọn rẹ avwanre pha buebun,Wẹwẹ yen avwanre ru umwemwu vwọso.
8 E iphiẹrophiyọ rẹ Izrẹl, Osivwin rọyen vwẹ ọke rẹ ukpokpogho,Diesorọ wọ vwọ dia kerẹ ọrhorha vwẹ otọ na,Kerẹ ohwo ro kpo oyan rọ de domaji rọ vwọ vwerhẹn hrọke?
9 Diesorọ wọ vwọ dia kerẹ ohwo rẹ emu gberi unu,Kerẹ ọgba ro che se sivwiin?
Kidie wẹ hẹ ohri rẹ avwanre, E Jihova,A je vwẹ odẹ wẹn vwo se avwanre.
Wọ kpairoro vrẹ avwanree.
10 Ọnana yen oborẹ Jihova ta kpahen ihwo nana: “Oma vwerhen ayen rẹ ayen vwo ghoro; ayen sun awọ rayeen. Ọtiọyena oma rayen vwerhen Jihovaa. Asaọkiephana ọ cha karophiyọ oruchọ rayen, ọ me je nọ ayen orhiẹn kpahen imwemwu rayen.”
11 Etiyin Jihova da ta kẹ vwẹ nẹ: “Wọ nẹrhovwo rẹ emu esiri nẹ ọ phia kẹ ihwo nanaa.
12 Ọke rẹ ayen de chiri owẹnvwe me kerhọ rẹ oyare rayeen, ọke rẹ ayen de ze izobo rẹ ẹtorhẹ kugbe izobo rẹ eka oma rayen vwerhan ovwẹẹ, kidie me cha vwẹ ọlọkọ, owẹnvwe, kugbe ọga vwọ ghwọrọ ayen.”
13 Etiyin me da ta: “E, Ọrovwori ro Me Kpenu Jihova! Nighere, emraro na ta kẹ ayen nẹ, ‘Ovwan cha mrẹ ọlọkọ naa, owẹnvwe ji che hwe ovwaan, ẹkẹvuọvo me cha kẹ ovwan uvi rẹ ufuoma vwẹ etinẹ na.’”
14 Ọyena vwọ wan nu, Jihova da ta kẹ vwẹ: “Emraro na vwẹ odẹ mẹ vwọ mraro rẹ efian. Mi ji ayeen yẹrẹ ji iji kẹ ayen yẹrẹ ta ota kẹ ayeen. Emramrẹ rẹ efian vẹ aroẹmrẹ ifefe kugbe ophiẹnvwe rẹ ubiudu rayen yen ayen mrẹ vwọ kẹ ovwan.
15 Ọtiọyena ọnana yen oborẹ Jihova ta kpahen emraro re vwẹ odẹ mẹ vwọ mraro dede nẹ mi ji ayeen, re tanẹ ọlọkọ yẹrẹ owẹnvwe cha rhe otọ nanaa: ‘A cha vwẹ ọlọkọ vẹ owẹnvwe vwọ ghwọrọ emraro yena.
16 E che do irivwin rẹ ihwo rẹ ayen mraro kẹ na phiyọ irhuvwun ri Jerusalẹm fikirẹ owẹnvwe kugbe ọlọkọ, ohwo vuọvo che shi ayeen—ayen, eya rayen, emeshare rayen, yẹrẹ emetẹ rayen—kidie me cha nẹrhẹ ayen mrẹ okpetu ro fo ayen.’
17 “Ku wọ ta ota nana kẹ ayen nẹ,‘E jẹ ẹro mẹ djẹ ọkẹre rẹ ameoviẹ te ason te uvo, e jẹ ọ kaa,Kidie e vwirhin emetobẹ rẹ ihwo mẹ je guọghọ ayen chẹghẹchẹghẹ,Omaẹwan rayen na ganre mamọ.
18 Mi de kpo aghwa na re ni,Me mrẹ ihwo ra vwẹ ọlọkọ teyen hwe!
Me da rha rhe evunrẹ orere na,Me mrẹ ihwo re muọga fikirẹ owẹnvwe na!
Kidie emraro na kugbe irherẹn na yanran kpo otọ rẹ ayen riẹnree.’”
19 Kọyen wọ sen Juda karekare re, gbanẹ Zayọn tun we* oma?
Diesorọ wọ vwọ ghwiẹ avwanre te ẹdia e rhe se sivwin avwanree?
Avwanre rhẹro rẹ ufuoma, ẹkẹvuọvo emu esiri vuọvo rheree,Avwanre rhẹro rẹ ọke rẹ esivwon, ẹkẹvuọvo obo ri muẹ ohwo oshọ kọyen avwanre mrẹre!
20 Avwanre rhọnvwe umwemwu rẹ avwanre, E Jihova,Kugbe oruchọ rẹ esẹ rẹ avwanre ride,Kidie avwanre ru umwemwu vwọso owẹ.
21 Wọ sian avwanree, fikirẹ odẹ wẹn;Wọ jẹ ekete rẹ urinrin wẹn na fiaa.
Karophiyọ ọphọ rẹ owẹ vẹ avwanre rere, wo gbe kuẹẹ.
22 Kẹ ọvo vwẹ usun rẹ edjọ ri fiemuu rẹ ẹgborho na sa nẹrhẹ osio rhọ,Yẹrẹ idjuvwu na komobọ se siobọnu eghwẹghwẹ rẹ osio?
Ọ dia owẹ ọvo yen Ohwo ro se ruo, E Jihova Ọghẹnẹ rẹ avwanre?
Avwanre phiẹrophiyọ owẹ,Kidie owẹ ọvo yen ruẹ erọnvwọn nana eje.
