Jerimaya 39:1-18
39 Vwẹ ukpe rirhirin rẹ Ovie Zẹdikaya ri Juda, vwẹ emeranvwe rihwe, Ovie Nẹbukadnẹza* ri Babilọn vẹ otuofovwin rọyen eje da kpare rhe Jerusalẹm, ayen da gba riariẹ.
2 Vwẹ ukpe rẹ 11 ri Zẹdikaya, vwẹ emeranvwe rẹne, vwẹ ẹdẹ rirhirin rẹ emeranvwe na, ayen de kporon igbẹhẹ rẹ orere na totọ.
3 Isun rẹ ovie ri Babilọn eje da ruọ, ayen de chidia Anurhoro rẹ Uherevie na, kọyen, Nẹgal-shariza rọ dia Samga na, Nibo-sasẹkim rọ dia Rabsaris* na, Nẹgal-shariza rọ dia Rabmag* na, kugbe isun rẹ ovie ri Babilọn ri chekọ eje.
4 Ọke rẹ Ovie Zẹdikaya ri Juda kugbe isodje na eje vwọ mrẹ ayen, ayen da djẹ nẹ orere na vwẹ ason wan idjerhe rẹ udju rẹ ovie na, wan anurhoro rọhẹ uvwre rẹ igbẹhẹ ivẹ na, ayen da wan idjerhe rẹ Araba na djẹ.
5 Ẹkẹvuọvo otuofovwin ri Kaldia da vwọtua ayen, ayen da djẹ Zẹdikaya mu vwẹ aton ri Jẹriko. Ayen de muo, je reyọ rhe Ovie Nẹbukadnẹza* ri Babilọn vwẹ Ribla vwẹ otọ ri Hemat, rọ dia asan ro de brorhiẹn hwe.
6 Ovie ri Babilọn da tanẹ a teyen emọ ri Zẹdikaya hwe vwẹ irharo rọyen vwẹ etiyin vwẹ Ribla, ovie ri Babilọn je tanẹ e hwe ihwo ride ri Juda eje.
7 Ọyena vwọ wan nu, o de rhuẹro ri Zẹdikaya, ọ da vwẹ igoni rẹ ẹrovwo vwọ kanrọ ro vwo muo kpo Babilọn.
8 Etiyin ihwo ri Kaldia na da torhẹ uwevwin* rẹ ovie na totọ kugbe iwevwin rẹ ihwo na, ayen de ji kporon igbẹhẹ ri Jerusalẹm totọ.
9 Nẹbuzaradan rọ dia onotu rẹ ihwo re rhẹrẹ na de mu ihwo ri chekọ ra yan jovwo vwẹ orere na, ihwo re djẹ bro rhe rhe vwomaba ẹbẹre rọyen jovwo na, kugbe kohwo kohwo ro chekọ kpo ighuvwu vwẹ Babilọn.
10 Ẹkẹvuọvo Nẹbuzaradan rọ dia onotu rẹ ihwo re rhẹrẹ na da yanjẹ evo vwẹ usun rẹ ihwo re ma dia igbere ri vwo emu vuọvo kakakaa vwo vwẹ otọ ri Juda. Vwẹ ẹdẹ yena, ọ je kẹ ayen egba rẹ ivaini kugbe idju rẹ ayen da cha wiowian.*
11 Asaọkiephana Ovie Nẹbukadnẹza* ri Babilọn da vwẹ iji nana kẹ Nẹbuzaradan onotu rẹ ihwo re rhẹrẹ na kpahen Jerimaya:
12 “Reyọ rere wọ vwẹrote; wọ wan omaa, ru kemu kemu rọ nokpẹn rọyen mie we vwọ kẹ.”
13 Ọtiọyena Nẹbuzaradan onotu rẹ ihwo re rhẹrẹ na, Nẹbushazban rọ dia Rabsaris* na, Nẹgal-shariza rọ dia Rabmag* na, kugbe ihwo ride rẹ ovie ri Babilọn eje de ji ihwo
14 nẹ ayen ra reyọ Jerimaya vwo nẹ Otegodo rẹ Ihwo re Rhẹrẹ na rhe, ayen da vwọ kẹ Gẹdalaya ọmọ rẹ Ahaikam ọmọ ri Shefan nẹ ọ reyọ kpo uwevwin rọyen. Ọtiọyena ọ da dia ohri rẹ ihwo na.
15 Vwẹ ọke ra vwọ kanre Jerimaya dje Otegodo rẹ Ihwo ri Rhẹrẹ na, ota ri Jihova de bro rhe:
16 “Yanran rere wọ ta kẹ Ibẹd-mẹlẹk ohwo rẹ Itiopia na nẹ, ‘Ọnana yen oborẹ Jihova rẹ otuofovwin, Ọghẹnẹ rẹ Izrẹl tare: “Nighere, mi ruẹ eta re me ta kpahen orere na gba nẹ okpetu yen me cha ghwa rhe enu rọyen, ọ dia erhuvwuu, wọ cha mrẹ nẹ ọ cha phia vwẹ ẹdẹ yena.”’
17 “‘Ẹkẹvuọvo mi che sivwin uwe vwẹ ẹdẹ yena,’ ọtiọyen Jihova tare, ‘e che phi we phiyọ obọ rẹ ihwo ru wọ djoshọ rayen naa.’
18 “‘Kidie vwọrẹ imuẹro, me cha nẹrhẹ wọ djẹ vabọ, a cha vwẹ ọlọkọ vwọ teyen owẹ hwee. A cha vwẹ arhọ* wẹn vwọ hwosa kẹ wẹ, kidie wọ vwẹroso ovwẹ,’ ọtiọyen Jihova tare.”
Eta rehẹ obotọ na
^ Vwẹ Hibru, “Nẹbukadrẹza,” idjerhe ọfa re vwo sio.
^ Yẹrẹ vwo nene ona ọfa re vwo brẹ eta ri Hibru, “Nẹgal-shariza, Samga-nibo, Sasẹkim, Rabsaris.”
^ Yẹrẹ “onotu rẹ ihwo ri ruẹ imajiki (ihwo ri nẹ isio).”
^ Vwẹ Hibru, “Nẹbukadrẹza,” idjerhe ọfa re vwo sio.
^ Yẹrẹ “ọguan.”
^ Yẹrẹ ọ sa dia, “wiowian ra gba ohwo vwo ruẹ.”
^ Vwẹ Hibru, “Nẹbukadrẹza,” idjerhe ọfa re vwo sio.
^ Yẹrẹ “onotu rẹ ediaguare.”
^ Yẹrẹ “onotu rẹ ihwo ri ruẹ imajiki (ihwo ri nẹ isio).”
^ Yẹrẹ “erhi.”
