Jerimaya 38:1-28
38 Asaọkiephana Shẹfataya ọmọ ri Mattan, Gẹdalaya ọmọ ri Pashọ, Jukal ọmọ ri Shẹlẹmaya, kugbe Pashọ ọmọ ri Malkaijah nyo eta rẹ Jerimaya ta kẹ ihwo na eje nẹ:
2 “Ọnana yen oborẹ Jihova tare, ‘Ohwo rọ daji evunrẹ orere nana che ghwu womarẹ ọlọkọ, owẹnvwe, kugbe ọga. Ẹkẹvuọvo ohwo rọ vwẹ oma rọyen kpahotọ kẹ ihwo ri Kaldia na* cha rhọ, ka vwẹ arhọ* rọyen hwosa kẹ,* kọ je dia.’
3 Ọnana yen oborẹ Jihova tare, ‘Vwọrẹ imuẹro, e che phi orere nana phiyọ obọ rẹ otuofovwin rẹ ovie ri Babilọn, kọ cha reyọ.’”
4 Isun na da ta kẹ ovie na nẹ: “Biko, je hwe ọshare nana, kidie o phiẹ ovwiẹrẹ phiyọ oma rẹ isodje ri chekọ vwẹ orere nana kugbe ihwo na eje, womarẹ eka rẹ eta nana rọ ta kẹ ayen na. Kidie ọ dia ufuoma rẹ ihwo nana yen ọshare nana guọnọọ, ẹkẹvuọvo okpetu.”
5 Ovie Zẹdikaya da kpahen: “Nighere! Ọ hẹ abọ rẹ ovwan, kidie ovie che se ru emu vuọvo vwọ dobọ rẹ ovwan jii.”
6 Ọtiọyena ayen de mu Jerimaya ji do phiyọ evunrẹ ọgọdọ ri Malkaijah ọmọ rẹ ovie na, rọhẹ Otegodo rẹ Ihwo rẹ Rhẹrẹ na. Ifi yen ayen vwọ lọrọ Jerimaya kpotọ. Asaọkiephana ame hẹ evunrẹ ọgọdọ naa, ibehre ọvo, Jerimaya ko she rua ibehre na.
7 Ibẹd-mẹlẹk ohwo rẹ Itiopia, ochibẹ* vwẹ uwevwin* rẹ ovie na, de nyo nẹ ayen mu Jerimaya phiyọ ọgọdọ. Asaọkiephana ovie na chidia Anurhoro ri Bẹnjamin,
8 ọtiọyena Ibẹd-mẹlẹk da ro otafe nẹ uwevwin* rẹ ovie na ra ta ota kẹ ovie na nẹ:
9 “E ọrovwovwe ovie, oborẹ eshare nana ru Jerimaya ọmraro na brare mamọ! Ayen doro phiyọ evunrẹ ọgọdọ na, o che ghwu phiyọ etiyin fikirẹ owẹnvwe na, kidie ibrẹdi vuọvo rhe chekọ vwẹ orere naa.”
10 Etiyin ovie na da vwẹ iji kẹ Ibẹd-mẹlẹk ohwo rẹ Itiopia na: “Reyọ eshare 30 nene oma nẹ etinẹ yanran, ovwan mu Jerimaya ọmraro na nẹ evunrẹ ọgọdọ na rere o vwo jeghwo.”
11 Ọtiọyena Ibẹd-mẹlẹk da reyọ eshare na nene oma, ayen da ro evunrẹ uwevwin* rẹ ovie na kpo obotọ rẹ asan ra ghwẹ efe phiyọ na, ayen da reyọ ẹbẹre rẹ emwa evo kugbe iwun re bẹre, ayen da vwẹ ifi vwọ lọrọ ayen kpotọ bru Jerimaya ra vwevunrẹ ọgọdọ na.
12 Etiyin Ibẹd-mẹlẹk ohwo rẹ Itiopia na da ta kẹ Jerimaya: “Biko phi ẹbẹre rẹ emwa na vẹ iwun re bẹre na phiyọ uvwre rẹ aviavwe wẹn vẹ ifi na.” Jerimaya de ru ọtiọyen,
13 ayen da vwẹ ifi na vwo si Jerimaya nẹ evunrẹ ọgọdọ na rhe. Jerimaya da daji Otegodo rẹ Ihwo re Rhẹrẹ na.
14 Ovie Zẹdikaya da tanẹ e se Jerimaya ọmraro na bru ọyen rhe vwẹ asan anurhoro rerha na, rọhẹ uwevwin ri Jihova, ovie na da ta kẹ Jerimaya: “O vwo emuọvo me guọnọ nọ wẹ. Wo siẹ orọnvwọn vuọvo nẹ kẹ vwẹẹ.”
15 Jerimaya da ta kẹ Zẹdikaya: “Me da vuẹ wẹ, wo che juvwe ẹteyọn hwee. Me da rha vwẹ uchebro kẹ wẹ, wọ je cha kerhọ mẹẹ.”
16 Ọtiọyena Ovie Zẹdikaya da bẹbẹ duvwun iyorin kẹ Jerimaya: “Rẹ Jihova rọ kẹ avwanre arhọ vwọ herọ na, me cha teyen owẹ hwee, mi ji che phi we phiyọ obọ rẹ ihwo re guọnọ arhọ* wẹn reyọ naa.”
17 Etiyin Jerimaya da ta kẹ Zẹdikaya: “Ọnana yen oborẹ Jihova Ọghẹnẹ rẹ otuofovwin na, Ọghẹnẹ rẹ Izrẹl tare, ‘Wọ da vwẹ oma wẹn kpahotọ kẹ isun rẹ ovie ri Babilọn, ku wọ cha rhọ, a rha cha vwẹ erhanre vwọ torhẹ orere nanaa, wẹ vẹ evwruwevwin wẹn ke rhọ.
18 Ẹkẹvuọvo wọ rha vwẹ oma wẹn kpahotọ kẹ isun rẹ ovie ri Babilọn naa, ke che phi orere nana phiyọ obọ rẹ ihwo ri Kaldia, kẹ ayen cha vwẹ erhanre torhẹ, wọ cha sa djẹ va ayen abọọ.’”
19 Etiyin Ovie Zẹdikaya da ta kẹ Jerimaya: “Oshọ rẹ ihwo ri Ju re djẹ bru ihwo ri Kaldia ra na mu vwe, kidie e de phi vwe phiyọ obọ rayen, ayen se ru vwe djadja.”
20 Ẹkẹvuọvo Jerimaya da ta: “E che phi we phiyọ obọ rayeen. Biko nyupho ri Jihova vwẹ oborẹ me vuẹ wẹ na, ko che yovwin kẹ wẹ, ku wọ je cha rhọ.
21 Ẹkẹvuọvo wọ rha rhọnvwe vwẹ oma wẹ kpahotọọ, ọnana yen oborẹ Jihova vwọ phia kẹ vwẹ:
22 Nighere! A reyọ eya eje ri chekọ vwẹ uwevwin* rẹ ovie ri Juda rua otafe brẹ isun rẹ ovie ri Babilọn ra, jẹ eya na rha tanẹ,‘Eshare rẹ wọ vwẹroso* phiẹn wẹ ji phi we kparobọ.
Ayen nẹrhẹ awọ wẹn ro ibehre.
Asaọkiephana ayen kuomarhẹriẹ rẹ ayen vwọ djẹ.’
23 A reyọ eya wẹn eje vẹ emọ wẹn rua otafe brẹ ihwo ri Kaldia na ra, wọ cha sa djẹ va ayen abọọ, ẹkẹvuọvo ovie ri Babilọn che mu we, a je cha vwẹ erhanre torhẹ orere nana fiki wẹn.”
24 Zẹdikaya da ta kẹ Jerimaya nẹ: “Wo jẹ ohwo vuọvo riẹn kpahan erọnvwọn nanaa, rere wo vwo jeghwo.
25 Ọ da dianẹ isun na nyori nẹ mi nene uwe ta ota, rẹ ayen de bru we rhe je ta kẹ wẹ nẹ, ‘Biko vuẹ avwanre oborẹ wọ vuẹ ovie na. Wo siẹ orọnvwọn vuọvo nẹ kẹ avwanree, avwanre che hwe wee. Die yen ovie na ta kẹ wẹ?’
26 wọ me kpahen kẹ ayen nẹ, ‘Me rẹ ovie na nẹ o ji vwe rhivwin kpo uwevwin ri Jehonatanii, mi de ghwu vwẹ oboyin.’”
27 Ọke vwọ yanran na, isun na eje de bru Jerimaya rhe je nọ enọ. Ọ da vuẹ ayen erọnvwọn eje rẹ ovie na vuẹrẹ nẹ ọ ta kẹ ayen. Ọtiọyena ayen rha ta ota ọfa kẹẹ, kidie ohwo vuọvo nyo oborẹ ayen taree.
28 Jerimaya da daji Otegodo rẹ Ihwo re Rhẹrẹ na rhirin re te ọke re vwo phi Jerusalẹm kparobọ; ọ jehẹ etiyin ọke re vwo phi Jerusalẹm kparobọ.
