Jerimaya 8:1-22
8 “Vwẹ ọke yena,” ọtiọyen Jihova tare, “a cha reyọ ibeku rẹ ivie ri Juda, ibeku rẹ isun rọyen, ibeku rẹ irherẹn na, ibeku rẹ emraro na, kugbe ibeku rẹ ihwo re dia Jerusalẹm vwo nẹ ishi rayen.
2 A cha hra ayen phiyotọ vwọ kẹ ọnre na, emeranvwe na, kugbe isio rẹ idjuvwu na eje rẹ ayen vwo ẹguọnọ kpahen, rẹ ayen gare, rẹ ayen neneri, rẹ ayen guọnọ odjekẹ mie, je vwẹ uyovwin kpotọ kẹ. A cha ghwẹ ayen koko yẹrẹ shi ayeen. Ayen cha dia kerẹ imaniọ vwẹ otọ na.”
3 “Uchekotọ rẹ orua rẹ umwemwu nana ri sivwin rhọ cha jẹ ughwu ukperẹ arhọ vwẹ asan na eje re me djẹ ayen ra,” ọtiọyen Jihova rẹ otuofovwin tare.
4 “Ku wọ ta kẹ ayen, ‘Ọnana yen oborẹ Jihova tare:
“Ihwo de she, ọ dia kẹ ayen rhoma vrẹn?
Ohwo ọvo de kuomarhẹriẹ, ọ dia i ri chekọ ki kuomarhẹriẹ?
5 Diesorọ ihwo nana re dia Jerusalẹm na rhọnvwe fuevun kẹ vwẹẹ?
Ayen tinka mu ophiẹnvwe;Ayen rhọnvwe kurhẹriẹẹ.
6 Mi phi erhọ phiyotọ je kerhọ, ẹkẹvuọvo oborẹ ayen ta ota wan shephiyọọ.
O vwo ohwo vuọvo ro kurhẹriẹ nẹ umwemwu rọyen yẹrẹ nọ nẹ, ‘Die ọyen mi ruruu?’
Ohwo ọvuọvo rhivwin re ru oborẹ ihwo buebun ruẹ, kerẹ iyesi rọ họrhọ rua ofovwin.
7 Ọphran re se istọku rọhẹ ophephe na dede riẹn ọke rọyen;*Erurẹ otete, ọphran re se iswifti, kugbe ọmọkan* yanmuẹ ọke rẹ ayen vwo rhivwin.*
Ẹkẹvuọvo ihwo mẹ vwo ẹruọ rẹ ẹdjọeguo ri Jihovaa.”’
8 ‘Mavọ yen ovwan sa vwọ tanẹ, “Avwanre vwo aghwanre, avwanre ji vwo urhi* ri Jihova”?
Kidie vwọrẹ uyota, ugbẹn rẹ efian rẹ isiẹbe na, efian ọvo yen a reyerọ vwo si re.
9 A nẹrhẹ oma vo egbaghwanre na.
Oshọ muẹ ayen, e ji che mu ayen.
Nighere! Ayen sen ota ri Jihova,Kẹ oka rẹ aghwanre vọ yen ayen vwori?
10 Ọtiọyena me cha vwẹ eya rayen vwọ kẹ eshare efa,Idju rayen vwọ kẹ ihwo efa;Kidie vwo nẹ ọ rọ ma hanvwe re te ọ rọ ma rho, ayen ọvuọvo vwo erere rẹ ọghware;Vwo nẹ ọmraro re te orherẹn, ayen ọvuọvo ghwa ihwo ria.
11 Ayen jomaotọ sivwin omaẹwan rẹ ọmọtẹ rẹ ihwo mẹẹ, rẹ ayen vwọ tanẹ,“Ufuoma herọ! Ufuoma herọ!”
Jẹ ufuoma vuọvo herọọ.
12 Kẹ oma vo ayen kpahen emu rẹ ẹgua rẹ ayen ruru na?
Oma vo ayen kakakaa!
Ayen tobọ riẹn obo re se ophọphọvwee!
Ọtiọyena ayen che she vwẹ ohri rẹ ihwo ri sheri.
Ọke ri mi de gboja vwọ kẹ ayen, ayen cha kprowọ,’ ọtiọyen Jihova tare.
13 ‘Ọke me da ghwẹ ayen koko, me cha ghwọrọ ayen,’ ọtiọyen Jihova tare.
‘Emamọ che chekọ vwẹ ivainii, ifigi che chekọ vwẹ urhe rẹ ifigii, ẹbe na che vwioro.
Oborẹ me vwọ kẹ ayen che ghwru va ayen abọ.’”
14 “Diesorọ avwanre vwo chidia etinẹ?
E jẹ avwanre ghwomakoko rere a ro irere ra gbogba riariẹ phiyọ na je ghwọrọ kufia vwẹ etiyin.
Kidie Jihova Ọghẹnẹ rẹ avwanre cha ghwọrọ avwanre,Ọ kẹ avwanre ame ra ruanre nẹ a da,Kidie avwanre ru umwemwu vwọso Jihova.
15 Avwanre rhẹro rẹ ufuoma, ẹkẹvuọvo emu esiri vuọvo rheree,Avwanre rhẹro rẹ ọke rẹ esivwon, ẹkẹvuọvo obo ri muẹ ohwo oshọ kọyen avwanre mrẹre!
16 E nyo iwen ẹfiọn rẹ iyesi rọyen vwẹ Dan.
Iyesi rọyen eshare vwo kperi,Otọ na eje de kpogho.
Ayen rhere, ayen da ghwọrọ otọ na kugbe erọnvwọn eje rehẹ evun rọyen,Orere na kugbe ihwo re dia evun rọyen.”
17 “Kidie mi jẹ eredekọ rua ohri rẹ ovwan,Eredekọ ri vwo obi re che se fueen,Ayen che jẹ ovwan ẹrhovwọọn,” ọtiọyen Jihova tare.
18 E che se sivwin uvweri mẹẹ;Ubiudu mẹ muọga.
19 Ọmọtẹ rẹ ihwo mẹKperẹ ukperi rẹ ukẹcha vwo nẹ otọ oshesheri cha nẹ:
“Jihova hẹ evunrẹ Zayọn?
Yẹrẹ ovie rọyen hẹ evun rọyen?”
“Diesorọ ayen vwọ reyọ ema rayen ra kare,Kugbe eghẹnẹ erhorha rayen ri fiemuu vwo gbe vwe ku?”
20 “Ọke rẹ orhọ na wanre, ọke uvo na vwoba re,Ẹkẹvuọvo e ji rhi sivwin avwanree!”
21 Ẹwẹn mẹ hra totọ fikirẹ omaẹwan rẹ ọmọtẹ rẹ ihwo mẹ;Mi muomaphiyọ.
Oshọ mu vwe.
22 Balsam* vuọvo rha hẹ Giliẹd?
Yẹrẹ ohwo* ro sivwin ohwo rha hẹ etiyin?
Diesorọ e ji rhi sivwin oma rẹ ọmọtẹ rẹ ihwo mẹ kpoo?
