Jerimaya 6:1-30
6 Ovwan emọ ri Bẹnjamin, ovwan djẹ nẹ Jerusalẹm kpo asan ro fuoma.
Ovwan hworo ọgban na vwẹ Tẹkoa;Ovwan kpare oka rẹ erhanre kpenu vwẹ Bẹt-hakirẹm!
Kidie okpetu nẹ obohwẹre ọnre na cha, okpetu rode.
2 Ọmọtẹ ri Zayọn họhọ aye ro vwo erhuvwu ra vwẹ obọ pẹpẹ.
3 Isuigodẹ na vẹ igodẹ rayen cha rhe.
Ayen cha vwẹ itughẹ rayen vwo vi riariẹ phiyọ,Ohwo ọvuọvo cha reyọ igodẹ rọ vwẹrote vwọ re odin.
4 “Ovwan muegbe rẹ ofovwin vwọsuọ!
Ovwan vrẹn rere avwanre nene họnre vwẹ aruphẹn na!”
“Okpetu rode kẹ avwanre kidie ọke na she re,Ebri rhe muẹ ememerha!”
5 “Ovwan vrẹn rere avwanre nene họnre vwẹ ason naJe guọghọ iwevwin rọyen ri kpenu ra gbogba riariẹ.”
6 Kidie ọnana yen oborẹ Jihova rẹ otuofovwin na tare:
“Ovwan gbọ irhe she rere ovwan gbogba vwo ke Jerusalẹm dje.
Ọyen orere re che jẹ oja egbe kẹẹ;O vwo emu ọfa re ruẹ vwọọ jokparẹ oshenyẹ.
7 Kirobo rẹ orhare dia esiri rẹ ame odjidjiro ye,Ọtiọyen orere nana je dia esiri rẹ umiovwo.
E nyo kpahan ozighi vẹ oghwọrọ vwẹ evun rọyen;Ọga vẹ ọtiekọ hẹ obaro mẹ ọkieje.
8 Jomaotọ, E Jerusalẹm, ọ rha dia ọtiọyeen mi* che muophu yanjẹ uwe vwo;Me cha nẹrhẹ wọ dia ofefe, otọ rẹ ohwo vuọvo diaa.”
9 Ọnana yen oborẹ Jihova rẹ otuofovwin na tare:
“Ayen cha nabọ gbugbon rẹ uchekotọ rẹ Izrẹl kerẹ emamọ ri chekọ vwẹ ivaini.
Rhoma riẹn obọ wẹn kerẹ ohwo rọ kọrọ emamọ vwo nẹ ivaini.”
10 “Amono yen me cha ta ota kẹ je vwẹ orhọesio kẹ?
Ono yen cha kerhọ?
Nighere! Ayen din erhọ rayen rere ayen vwo jẹ erhọ ẹka.
Nighere! Ota ri Jihova rhi hirhephiyọ emu rẹ ọjẹfia vwọ kẹ ayen;Ayen rhe vwo omavwerhovwẹn kpahọọn.
11 Ọtiọyena me rhe vọn vẹ ophu ri Jihova,Oma bru vwe ku, me rha sa yọnrọọn.”
“Kuo ku ọmọ rọhẹ evunrẹ urhuvwun na,Kuo ku ẹko rẹ ighene eshare re ghwomakoko.
E che mu ayen eje reyọ, te ọshare te aye rọyen,Te eshare re kpakore te emare.
12 A cha reyọ iwevwin rayen vwọ kẹ ihwo efa,Ọtiọyen ji te idju kugbe eya rayen.
Kidie me cha riẹn obọ mẹ phia vwọso ihwo re dia otọ na,” ọtiọyen Jihova tare.
13 “Kidie vwo nẹ ọ rọ ma hanvwe re te ọ rọ ma rho, ayen ọvuọvo vwo erere rẹ ọghware;Vwo nẹ ọmraro re te orherẹn, ayen ọvuọvo ghwa ihwo ria.
14 Ayen jomaotọ sivwin omaẹwan rẹ ihwo mẹẹ, rẹ ayen vwọ tanẹ,‘Ufuoma herọ! Ufuoma herọ!’
Jẹ ufuoma vuọvo herọọ.
15 Kẹ oma vo ayen kpahen emu rẹ ẹgua rẹ ayen ruru na?
Oma vo ayen kakakaa!
Ayen tobọ riẹn obo re se ophọphọvwee!
Ọtiọyena ayen che she vwẹ ohri rẹ ihwo ri sheri.
Ọke ri mi de gboja vwọ kẹ ayen, ayen cha kprowọ,” ọtiọyen Jihova tare.
16 Ọnana yen oborẹ Jihova tare:
“Ovwan mudia aderha rere ovwan ni.
Ovwan nọ kpahen idjerhe rẹ awanre na,Ovwan nọ asan rẹ omamọ idjerhe na hepha, ovwan yan vwẹ evun rọyen,Rere ovwan mrẹ urovwoma kẹ oma rẹ ovwan.”*
Ẹkẹvuọvo ayen ke ta: “Avwanre cha yan vwẹ evun rọyeen.”
17 “Me da vwẹ erhẹrotọ vwo mu re tanẹ,‘Ovwan kerhọ kẹ edo rẹ ọgban na!’”
Ẹkẹvuọvo ayen tare nẹ: “Avwanre cha kerhọọ.”
18 “Ọtiọyena ovwan nyo, E ẹgborho!
Ovwan riẹn, E ihwo re ghwomakoko,Obo re cha phia kẹ ayen.
19 Kerhọ, E akpọ!
Me ghwa okpetu cha enu rẹ ihwo nanaFikirẹ erharhe rẹ iroro rayen,Kidie ayen kerhọ vwọ kẹ ota mẹẹAyen je sen urhi* mẹ.”
20 “Die yen ifrankisẹnsi rẹ ovwan mu nẹ Shiba rheKugbe kalamọs* rẹ ovwan mu nẹ otọ oshesheri rhe fi kẹ vwẹ?
Mi che rhiabọreyọ izobo rẹ ẹtorhẹ rẹ ovwaan,Izobo rẹ ovwan je nẹrhẹ oma vwerhen ovwẹẹ.”
21 Ọtiọyena ọnana yen oborẹ Jihova tare:
“Mi phiẹ obo re cha kprọ ihwo nana owọ phiyọ idjerhe hẹrhẹ ayen,E cha kprọ ayen owọ,Te esẹ te emọ,Kohwo kohwo vẹ ọrivẹ rọyen,Ayen eje cha ghwọrọ kufia.”
22 Ọnana yen oborẹ Jihova tare:
“Nighere! Ihwo nẹ otọ rẹ obohwẹre ọnre na cha.A cha rhọvwọn ẹgborho rode vwo nẹ ẹbẹre ri me sheri vwẹ otọrakpọ na rhe.
23 Ayen cha yọnrọn umurhabọ kugbe javilin.
Ayen djoma, ayen che gbe arodọnvwẹẹ.
Ayen che do kerẹ abadi,Jẹ ayen gua vwẹ enu rẹ iyesi.
Ayen tẹnrẹn urhiẹ rẹ ofovwin kerẹ ihwo ri phiẹ ofovwin vwọsua owẹ, E ọmọtẹ ri Zayọn.”
24 Avwanre nyo iyẹnrẹn kpahọn.
Abọ rẹ avwanre sheri ghwrọghọ;Okpetu she vwa avwanre,Avwanre rhiẹromrẹ omiamiavwe ọgangan kerẹ aye rọ chuvwiẹ.
25 Wo kpo evunrẹ aghwaa,Wọ je yan vwẹ idjerhee,Kidie ọlọkọ rhe ọvweghrẹn na obọ;Oshọ vọn asan eje.
26 E ọmọtẹ rẹ ihwo mẹ,Ku ewun rẹ esiso phiyọ rere wo gbune vwevunrẹ iwurhie.
Vweri kerẹ ohwo ro vwere ọmọshare rọyen vuọvo, vwerhe oma gangan,Kidie siẹvuọvo na, ọ rọ ghwọrọ na cha rhe vwọso avwanre.
27 “Me vwẹ owẹ* vwo ru ohwo rọ davwan utehru nẹ vwẹ ohri rẹ ihwo mẹ,Ọ rọ nabọ hiẹ fiotọ;Ku wo vwo oniso je fuẹrẹn idjerhe rayen.
28 Ayen eje na yen ihwo ri me ru uyovwin gangan,Ayen yancha yankpo miovwo ihwo efa.
Ayen pha kerẹ ẹrovwo vẹ utehru;Ayen eje miovwin re.
29 Erọnvwọn re vwo djuẹ erhanre na torhẹre.
Ilẹdi yen nẹ evunrẹ erhanre rayen rhe.
Ohwo ọvo davwẹngba gangan ro vwo ru ayen fon, ẹkẹvuọvo ẹgbaẹdavwọn rọyen na shefia,A je rhe hẹriẹ i ri miovwirin na vwo nẹ ayeen.
30 Vwọrẹ uyota, ihwo che se ayen idọnọ efuanfon ra senre,Kidie Jihova sen ayen nure.”
