Jerimaya 49:1-39
49 Vwọ kpahen ihwo rẹ Amọn, ọnana yen oborẹ Jihova tare:
“Izrẹl vwo ọmọ?
O vwo ọriuku?
Kẹ diesorọ Malkam vwọ reyọ ughwẹ ri Gad?
Diesorọ ihwo rọyen vwọ dia irere rẹ Izrẹl?”
2 “‘Ọtiọyena nighere! ọke cha,’ ọtiọyen Jihova tare,‘Rẹ me cha vwọ nẹrhẹ e nyo edo rẹ ofovwin* vwọso Raba rẹ ihwo rẹ Amọn.
O che hirhephiyọ ugbenu otete ra ghwọrọre,E che phi erhanre phiyọ irho rehẹ otọ rọyen.’*
‘Izrẹl kọ cha reyọ ughwẹ rẹ ihwo re reyọ ughwẹ rọyen jovwo na,’ ọtiọyen Jihova tare.
3 ‘Vwerhe oma, E Hẹshbọn, kidie a ghwọrọ Ai nure!
Kperi, E irho rehẹ otọ ri Raba.
Ovwan ku ewun rẹ esiso phiyọ.
Ovwan vwerhe oma rere ovwan je yanrhe yankpo vwẹ ohri rẹ urhuẹn rẹ eranvwe* ra vwẹ ikuta bọn na,Kidie e che mu Malkam vẹ irherẹn rọyenKugbe isun rọyen kpo ighuvwu.
4 Diesorọ wọ vwọ vwẹ iyara* na vwọ yonma?Wọ vwọ vwẹ otọ wẹn ro yovwon emu na vwọ yonma, E ọmọtẹ ro jẹ evun ẹfuọn na,Rọ vwẹroso efe rọyenRọ je tanẹ: “Ono yen cha kpare rhe rhe vwọso ovwẹ?”’”
5 “‘Nighere, me cha reyọ emu rẹ imuoshọVwo nẹ obọ rẹ ihwo eje re riariẹ owẹ phiyọ vwọ rhe enu wẹn,’ ọtiọyen Ọrovwori ro Me Kpenu na, Jihova rẹ otuofovwin tare,
‘A cha hra wẹ vwo kpo kẹbẹre kẹbẹre,O vwo ohwo vuọvo ro che koko ihwo re djẹ naa.’”
6 “‘Ẹkẹvuọvo ọyena da wan nu, ki mi che koko ihwo rẹ Amọn re mu reyọ na,’ ọtiọyen Jihova tare.”
7 Vwọ kpahen Idọm, ọnana yen oborẹ Jihova rẹ otuofovwin tare:
“Aghwanre rha hẹ Timan?
Kẹ ihwo ri vwo ẹruọ rha vwẹ omamọ uchebro vwọ phia?
Aghwanre rayen hirhephiyọ emu diodi re?
8 Ovwan djẹ, ovwan kuomarhẹriẹ!
Ovwan yanran ra dia asan ikokodo na, E ihwo re dia Didan!
Kidie me cha reyọ okpetu rhe enu rẹ IsọSiẹrẹ ọke me cha vwọ davwerhọ rọyen de te.
9 Ihwo ri koko igrepu de bru we rhe,Ayen rha yanjẹ evo vwo re che gbugbon rọyen?
Iji da rhe vwẹ ason,Uche erọnvwọn rẹ ayen guọnọre ọvo yen ayen che cho.
10 Ẹkẹvuọvo me cha ban Isọ phiyọ.
Mi che rhie asan odjahọn rọyen phiyọ,Ọtiọyena o rhe che se siomanuu.
A cha ghwọrọ emọ rọyen vẹ iniọvo rọyen kugbe irivẹ rọyen,Ọ rha cha dia ọfaa.
11 Yanjẹ emọ wẹn ri jẹ esẹ evwo na vwo,Ke me cha sẹro rẹ arhọ rayen,Eyauku wẹn cha vwẹroso ovwẹ.”
12 Kidie ọnana yen oborẹ Jihova tare: “Nighere! Ọ da dianẹ ihwo re brorhiẹn hwee nẹ e da vwo nẹ uko na cha da vwọ, kẹ owẹ yen e che jẹ oja egbe kẹ? E che jẹ oja egbe kẹ wẹẹ, kidie wo che jẹ daa.”
13 “Kidie me vwẹ oma mẹ duvwun iyorin nure,” ọtiọyen Jihova tare, “nẹ Bọzra che hirhephiyọ obo ri muẹ ohwo oshọ, ehwẹjẹ, oghwọrọ, kugbe ekan; irere rọyen eje cha dia obo ra ghwọrọre rhirin bẹdẹ.”
14 Mi nyo iyẹnrẹn ro nẹ obọ ri Jihova rhe,E ji ikọn ro ohri rẹ ẹgborho na nẹ,
“Ovwan ghwomakoko rere ovwan reyọ vwọsuọ;Ovwan muegbe vwọ kẹ ofovwin.”
15 “Kidie nighere! Mi ru we phiyọ ohwo ro fiemuu vwẹ ohri rẹ ẹgborho na nure,Ohwo rẹ ihwo jẹfia.
16 Uguegue ru wọ so kẹ ihwoKugbe omaẹkparọ rẹ ubiudu wẹn phiẹn wẹ,E wẹ rọ dia asan ri siomanu rẹ oragha na,Wẹ rọ dia enu rẹ ugbenu ro me kpenu na.
Dede nẹ wọ bọn ẹho wẹn phiyọ enu kerẹ ugo,Me cha reyọ owẹ nẹ etiyin rhe otọ,” ọtiọyen Jihova tare.
17 “Idọm che hirhephiyọ obo ri muẹ ohwo oshọ. Kohwo kohwo rọ wanvrẹ che no vẹ oshọ ji gbe ophiọrọ fikirẹ ọtiekọ rọyen eje.
18 Kirobo rọ hepha vwẹ ọke ra vwọ ghwọrọ Sọdọm vẹ Gomora kugbe irho re kẹrẹ ayen,” ọtiọyen Jihova tare, “ohwo vuọvo cha dia etiyiin, o vwo ọke vuọvo rẹ ohwo vuọvo cha vwọ diaa.
19 “Nighere! Ohwo ọvo cha rhe rhe vwọso asan ro fuoma rẹ eranvwe da sa re odin kerẹ okpohrokpo ro nẹ egbo djigbri vwẹ orhoma ri Jọdan rhe, ẹkẹvuọvo vwẹ ọmọke, me cha nẹrhẹ ọ djẹ jovwo. Me cha vwẹ ọ ra jẹreyọ na vwo mu vwẹ enu rọyen. Kidie ono yen họhọ ovwẹ? Ono yen sa nọ vwẹ orhiẹn? Osuigodẹ vọ yen se mudia obaro mẹ?
20 Ọtiọyena ovwan nyo, E ihwo, orhiẹn rẹ Jihova bruru vwọ kpahen Idọm vẹ iroro rọ jẹre vwọ kpahen ihwo re dia Timan:
Vwọrẹ imuẹro e che kpono imigodẹ na yanran.
Ọ cha nẹrhẹ asan rẹ ayen dia hirhephiyọ ofefe fiki rayen.
21 Otọ na kpoghori fikirẹ edo rẹ eshe rayen.
E nyo ukperi ọvo!
Ọ mrare re te Abadi Ọvwavware na.
22 Nighere! Kerẹ ugo ọ cha rhan kpenu je rhan rhe otọ,Ọ cha riẹn ibekpe rọyen vwọso Bọzra.
Vwẹ ẹdẹ yena ubiudu rẹ egba ofovwin rẹ IdọmCha dia kerẹ ubiudu rẹ aye rọ chuvwiẹ.”
23 Vwọ kpahen Damaskọs:
“A nẹrhẹ oma vo Hemat vẹ Apad,Kidie ayen nyo orharhe rẹ iyẹnrẹn.
Ubiudu rayen wranre fikirẹ oshọ.
Ihwo na pha kerẹ abadi rọ họnra ra cha sa nẹrhẹ ọ fọọ.
24 Udu nẹ Damaskọs awọ.
O kuomarhẹriẹ rọ vwọ djẹ, ẹkẹvuọvo uguegue rorọ oma.
Okpetu vẹ ọmiaovwẹ tere oma,Kerẹ aye rọ chuvwiẹ.
25 Diesorọ a je rhe kpairoro vrẹ orere rẹ ujiri naa,Orho rẹ aghọghọ na?
26 Kidie ighene eshare rọyen che she vwẹ ọsuorere rọyen,Isodje na eje je cha ghwọrọ vwẹ ẹdẹ yena,” ọtiọyen Jihova rẹ otuofovwin na tare.
27 “Mi che phi erhanre phiyọ igbẹhẹ ri Damaskọs,Kọ cha torhẹ iwevwin ri kpenu ri Bẹn-hedad ra gbogba riariẹ.”
28 Vwọ kpahen Kida kugbe uvie sansan ri Hezọ, rẹ Ovie Nẹbukadnẹza* ri Babilọn phikparobọ, ọnana yen oborẹ Jihova tare:
“Vrẹn, yanran kpo Kida,Rere wọ ghwọrọ ihwo rehẹ Ẹbẹre Ọnre Va Nẹcha na.
29 A cha reyọ itughẹ rayen kugbe ichuru rayen,Emwa rẹ itughẹ rayen vẹ erọnvwọn rayen eje.
E che mu ikamẹl rayen yanran,Kẹ ayen cha viẹ kẹ ayen nẹ, ‘Oshọ hẹ asan eje!’”
30 “Ovwan djẹ, ovwan djẹ kpo asan oshesheri!
Ovwan yanran ra dia asan ikokodo na, E ihwo re dia Hezọ,” ọtiọyen Jihova tare.
“Kidie Ovie Nẹbukadnẹza* ri Babilọn jiroro rẹ umiovwo vwọ kpahen ovwan,Ọ jiroro rẹ okpetu vwọso ovwan.”
31 “Ovwan vrẹn, ovwan yanran ra vwọso ẹgborho rẹ oma furu na,Rọ dia vwẹ ofuvwegbe!” ọtiọyen Jihova tare.
“O vwo ẹchẹ vuọvo yẹrẹ irhe ra vwọ kanra ẹchẹẹ; ayen dia vwẹ ọrobọ rayen.
32 E che mu ikamẹl rayen reyọ,Ọtiọyen ji te ichuru rayen buebun.
Me cha hra ihwo ri brẹ ẹton rẹ ọkọkọ rẹ arhare rayenVwọ kẹ kodju kodju,*Me cha reyọ okpetu vwọ rhe enu rayen vwo nẹ kẹbẹre kẹbẹre rhe,” ọtiọyen Jihova tare.
33 “Hezọ kọ cha dia urhuẹn rẹ eranko rẹ aghwa,Asan ra ghwọrọre rhirin bẹdẹ.
O vwo ohwo vuọvo rọ cha dia etiyiin,O vwo ọke vuọvo rẹ ohwo vuọvo cha vwọ dia etiyiin.”
34 Ọnana yen ota ri Jihova ro bru Jerimaya ọmraro na rhe vwọ kpahen Ilam vwẹ ọtonphiyọ rẹ usuon rẹ Ovie Zẹdikaya ri Juda:
35 “Ọnana yen oborẹ Jihova rẹ otuofovwin tare, ‘Nighere, mi vwirhẹn umurhabọ rẹ Ilam, esiri* rẹ ogangan rayen.
36 Me cha reyọ odju ẹne vwo nẹ igogo ẹne rẹ idjuvwu na vwọ rhe enu rẹ Ilam, me cha hra ayen vwọ kẹ odju nana eje. O rhe vwo ẹgborho vuọvo rẹ ihwo rẹ Ilam ra hrare che jẹ raa.’”
37 “Me cha nẹrhẹ oshọ mu ihwo rẹ Ilam vwẹ obaro rẹ ivwighrẹn rayen vẹ obaro rẹ ihwo re guọnọ arhọ rayen reyọ; me cha reyọ okpetu rhe enu rayen, ophu ọgangan mẹ,” ọtiọyen Jihova tare. “Mi che ji ọlọkọ nene ayen bẹsiẹ me vwọ ghwọrọ ayen re karekare.”
38 “Ke me cha vwẹ ekete mẹ vwo vi vwẹ Ilam je ghwọrọ ovie vẹ isun rehẹ etiyin no,” ọtiọyen Jihova tare.
39 “Ẹkẹvuọvo vwẹ ẹbẹre rọ koba rẹ ẹdẹ na, mi che koko ihwo rẹ Ilam re mu reyọ,” ọtiọyen Jihova tare.
