Asawan Lalaki​—Bidbiren tan Aligen Yo so Inkaulo nen Kristo

“Say ulo na balang laki si Kristo.”​—1 CORINTO 11:3.

1, 2. (a) Panon a nibagan matalona so sakey ya asawan laki? (b) Akin ya importantin bidbiren a say Dios so angiletneg na panangasawa?

 PANON yon nibaga a matalona so sakey ya asawan laki? Kasin no sikatoy mautek tan mabisbiskeg? No sikatoy maabilidar a mananap na kuarta? Odino, no sikatoy maaro tan mapangasin midedeneng ed asawa to tan ananak to? No say unor so pangibasiyan, agtanto nagagawaan itan na dakel ya asawan lalaki, ta sikaray naiimpluensyaan na espiritu na mundo tan saray estandarte na too. Anto so manunan rason? Lapud agda bibidbiren tan iyaaplika so panangiwanwan na samay Angiletneg na panangasawa, samay ‘anguyos na taglang na laki tan ginawa to a sakey a bii insan inyakar to ed laki.’​—Genesis 2:21-24.

² Pinekderan nen Jesu-Kristo so salaysay na Biblia nipaakar ed impangiletneg na Dios ed panangasawa, ya inkuan to ed saray manusuppiat ed sikato: “Agyo ta abasa, a say amalsa ed sikara nanlapu ed gapo ginawa to ra a laki tan bii? Tan inkuan to, Lapud saya say laki taynan to naani so ama tan ina to, tan ontipon naani ed asawa to; et sikaran dua saksakey ira naani a laman? Kanian aliwa la ran duara, noag saksakey a laman. Say impantipon na Dios sirin [bilang sanasawa], aleg a sianen na too.” (Mateo 19:4-6) Diad tua, say manunan makatulong ed sanasawa pian ontalona so panamaley da et say pamidbir da ya inletneg itan na Dios tan satan ya itatalona et akadepende ed pangiyaplika ra ed bilin na Salitay Dios, say Biblia.

Say Manunan Makatulong ed Italona na Asawan Laki

3, 4. (a) Akin a malaknab so pikakabat nen Jesus nipaakar ed panangasawa? (b) Siopa so piguratibon asawa nen Jesus, tan panon so nepeg a pantrato na asawan lalaki ed asawa ra?

³ Natulongan ya ontalona so asawan laki no aralen tan iyaplika to so imbaga tan ginawa nen Jesus. Malaknab so kakabatan nen Jesus nipaakar ed panangasawa lapud naimatonan to so impamalsa ed inmunan paris a too tan say impankasakey da. Oniay inkuan ed sikato nen Jehova a Dios: “Manggawa ta na too unong ed indengan ta, a singa kaulibay ta.” (Genesis 1:26, NW) On, mitotongtong so Dios ed samay Sankaunaan ed amin a pinalsa To, a ‘wala ed abay to bilang uloen a komikimey.’ (Uliran 8:22-30) Sikato so “panguloan ed amin a pinalsa.” Sikato so “sengeg na pinalsa na Dios,” a wala la sakbay a pinalsa so uniberso.​—Colosas 1:15; Apocalipsis 3:14.

⁴ Si Jesus et tinawag met a “Korderoy Dios,” tan sikatoy piguratibon deneskribe bilang asawan laki. Oniay inkuan na anghel: “Dago ka dia, siak ipanengneng ko ed sika so nobya, say asawa na Kordero.” (Juan 1:29; Apocalipsis 21:9) Balet siopa so nobya, odino asawa to? “Say asawa na Kordero” et tugyopen na saray matoor a papatumbok nen Kristo a nilanaan na espiritu, a miuley ed sikato bilang arari ed tawen. (Apocalipsis 14:1, 3) Kanian, say paraan na impantrato nen Jesus ed saray babangatan to sanen kaiba to ra diad dalin so napanuliranan na asawan lalaki no panon dan tratoen so asawa ra.

5. Siopara so nepeg a mangalig ed ehemplo nen Jesus?

⁵ On, si Jesus so imparungtal na Biblia bilang ehemplo na amin a papatumbok to, unong a nabasa tayo: “Si Kristo nairapan met lapu ed sikayo, dia ed impangitilak to na panuliranan, pian tumboken yo so baka’to.” (1 Pedro 2:21) Ingen, sikato so nagkalautlan napanuliranan na lalaki. Oniay inkuan na Biblia: “Say ulo na balang laki si Kristo; tan say ulo na balang bii say laki; tan say ulo nen Kristo say Dios.” (1 Corinto 11:3) Lapud say ulo na laki et si Kristo, kaukolan ya aligen na asawan lalaki so ehemplo to. Kanian, nepeg dan iyaplika so prinsipyo na inkaulo ta pian ontalona tan  manliket so pamilya ra. Pian nagawa itan, kaukolan a maaron pidenengan na asawan lalaki so asawa ra a singa ed impideneng nen Jesus ed piguratibon asawa to, salanti, saray alanaan a babangatan to.

No Panon ya Arapen Iray Problema ed Panamaley

6. Panon so nepeg a piamong na asawan lalaki ed asawa ra?

⁶ Diad sayan magulon mundo, mas kakkaukolan ya aligen na asawan lalaki so alimbawa nen Jesus nipaakar ed inkaanos, panangaro, tan inkapekder ed panangitandoro na matunong iran prinsipyo. (2 Timoteo 3:1-5) Oniay ibabaga na Biblia nipaakar ed ehemplon intilak nen Jesus: “Sikayo lalaki ya asawa, miamong kayo ed asawa yo unong na igaganggan na kakabatan.” (1 Pedro 3:7) On, nepeg ya arapen na asawan lalaki iray problema ed panamaley diad makabat a paraan, a singa ed impangarap nen Jesus ed saray kairapan. Mas mairap a subok so sinagmak to nen say siopaman nin too, balet amta to a say sengegan na saratan et si Satanas, saray demonyo to, tan sayan mauges a mundo. (Juan 14:30; Efeso 6:12) Iilaloan la nen Jesus a sikatoy nasubok, kanian nepeg ya agmet la nasurprisa so sanasawa sano naeksperiensya ra so “irap da ed laman.” Impasakbay na Biblia a saramay mangasawa et talagan managmak na ontan a kairapan.​—1 Corinto 7:28.

7, 8. (a) Anto so nalalanor ed piamong ed asawan bii unong ed kakabatan? (b) Akin a makanepegan na galang so asawan bibii?

⁷ Inkuan na Biblia a nepeg a piamongan na asawan lalaki so asawa ra ‘unong ed igaganggan na kakabatan, ya igalang tan alwaran da ra a singa mayumis a baso.’ (1 Pedro 3:7) Imbes a maruksan uleyan na asawan laki so asawa to, unong ya impasakbay na Biblia a kaslakan a gawaen na lalaki, nepeg ton igalang so asawa to ta pian nagamoran to so panangabobon na Dios. (Genesis 3:16) Nepeg ton tratoen so asawa to a singa mabmablin kayarian, ya agton balot ipakana so inkabiskeg to pian sakitan so asawa to. Imbes, ikonsidera to so liknaan na asawa to tan lawas ton tratoen tekep na respeto tan dignidad.

⁸ Akin a manepeg ya igalang na asawan lalaki so asawa ra? Oniay ebat na Biblia: “[Lapud] tomatawir met ira na grasya na bilay: pian saray pikakasi [na asawan lalaki] agnasebelan.” (1 Pedro 3:7) Nepeg a talosan na asawan lalaki ya ag-ipapasen nen Jehova a mas importante ni so pandadayew ed Sikato na laki nen say pandadayew na bii. Saray bibii ya ipapasen a makanepegan na panangabobon na Dios so kaiba na saray lalaki a makaawat na parehon tumang a bilay ya andi-anggaan, a dakel met ed sikara so nawalaan na bilay ed tawen, a diman et “anggapo so laki, o bii.” (Galacia 3:28) Kanian kaukolan a nodnonoten na asawan lalaki a say inkamatoor na sakey a too so manggawa ed sikaton mabmabli ed Dios, balanglan sikatoy laki o bii, asawan laki o asawan bii, odino anggan ugaw.​—1 Corinto 4:2.

9. (a) Unong ed si Pedro, anto so rason a nepeg ya igalang na asawan lalaki so asawa ra? (b) Panon a pinagalangan nen Jesus iray bibii?

⁹ Nidanet so kaimportantian na magalang a pantrato na asawan laki ed asawa to diad unor iran salita nen apostol Pedro, salanti, “pian saray pikakasi [to] agnasebelan.” Agaylan mapeligro so ontan a kipapasen! Nasebelan la ingen iray pikakasi na asawan laki lapud satan, a singa agawa ed saray agmananginenen a lingkor na Dios nensaman. (Tagleey 3:43, 44) Makabat iray Kristianon lalaki, a walaan na asawa odino mannononot ni labat a  mangasawa, no aralen da so magalang a paraan na impantrato nen Jesus ed bibii. Inabuloyan ira nen Jesus a milimog ed grupon akiulop ed sikato diad ministeryo to, tan sikatoy mapangasi tan marespeton akideneng ed sikara. Diad sakey ya inkagawa, saray bibii ni ingen so unonan angiparungtalan nen Jesus na say makapakelkelaw a katuaan, tan ingganggan to ra ya ipakabat da itan ed saray lalaki!​—Mateo 28:1, 8-10; Lucas 8:1-3.

Ehemplo a Nagkalalo lan Aligen na Asawan Lalaki

10, 11. (a) Akin ya importantin aralen na asawan lalaki so ehemplo nen Jesus? (b) Panon so nepeg a pangaro na asawan lalaki ed asawa ra?

¹⁰ Unong a nipaimano la, inkompara na Biblia so relasyon na asawan laki tan bii dia ed relasyon nen Kristo tan say “nobya” to, salanti, say kongregasyon na alanaan a papatumbok to. Inkuan na Biblia: “Say asawan laki sikato so ulo na asawan bii, a singa si Kristo met sikato so ulo na iglesia.” (Efeso 5:23) Sarayan salita so nepeg a mamaseseg ed asawan lalaki pian usisaen da so paraan na impangidaulo nen Jesus ed papatumbok to. No ontan so gawaen da, seguradon naalig da so ehemplo nen Jesus tan niwanwan, naaro, tan naasikaso ra so asawa ra ed suston paraan, a singa ed ginawa nen Jesus ed kongregasyon to.

¹¹ Oniay impaseseg na Biblia ed saray Kristiano: “Asawan lalaki, aroen yo so saray kaasawaan yo, a singa met si Kristo ya inaro to so iglesia, tan insaklang to so inkasikato nisengeg ed sikato.” (Efeso 5:25) Diad akaunan kapitulo na Efeso, “say iglesia,” odino kongregasyon, so tinawag a “laman nen Kristo.” Dakel so kabiangan na sayan simbolikon laman, a parehon lalaki tan bibii, tan amin da et ontutulong ed epektibon kikukurang na satan. Siempre, si Jesus so ‘ulo na laman, say iglesia.’​—Efeso 4:12; Colosas 1:18; 1 Corinto 12:12, 13, 27.

12. Panon ya impanengneng nen Jesus so panangaro ed piguratibon laman to?

¹² Impanengneng nen Jesus so panangaro ed piguratibon laman to, say kongregasyon, nagkalautla diad impangasikaso ton maong ed sikara, ya intarya to so pankaabiganan na saray magmaliw a kabiangan na satan. Alimbawa, sanen naksawan iray babangatan to, oniay inkuan to: “Gali’dia ed arawi ed sakey a pasen a lawak, tan manpainawa kayon magano.” (Marcos 6:31) Oniay insulat met na sakey ed saray apostol to a manideskribe ed ginawa nen Jesus pigay oras labat la antis a sikatoy pateyen: “Inaro [nen Jesus] so saray totoo to [salanti, saray kabiangan na piguratibon laman to] . . . , inaro to ra angga ed kasampotan.” (Juan 13:1) Agaylan abig ya alimbawa so impatnag nen Jesus ed no panon so nepeg a pantrato na asawan lalaki ed asawa ra!

13. Panon a binilin so kaasawaan a lalaki ya aroen da so asawa ra?

¹³ Diad impangusar met nen apostol Pablo ed alimbawan intarya nen Jesus parad asawan lalaki, sikaray binilin to: “Nepeg na saray asawan lalaki [ya aroen so] kaasawaan dan dili a singa panangaro ra ed laman dan dili. Say mangaro ed asawa ton dili aroen toy dilin laman to: Ta anggapo ni toon amusol ed laman ton dili; noag ingen sikato so taganoen to tan pablien to a singa met si Kristo a pinabli to so iglesia.” Inkuan ni nen Pablo: “Gawaen yo met, balang sakey aroen to so dilin asawa to a  bii a singa dilin laman to.”​—Efeso 5:28, 29, 33.

14. Panon a tratratoen na asawan laki so ag-ayadyarin laman to, tan anto so ipapabitar na saya no panon so nepeg a pantrato to ed asawa to?

¹⁴ Isipen pa iray imbaga nen Pablo. Kasin gagalaen na makalakal a too a sakitan so dilin laman to? Sano sikatoy nipatakba lapud nitiror toy tangan na sali to, kasin lalo ton sakitan so tangan to? Siempre andi! Kasin iyabeba na asawan laki so inkasikato ed arap na kakaaro to odino italabutob toy dilin kakulangan to? Andi! Sirin, akin a pansalitaan toy asawa to na makapasakit, odino kabilen to ni ingen, no sikatoy nalingo? Nepeg ya ikonsidera na asawan lalaki so pankaabiganan na asawa ra, ya aliwa labat a say dilin pankaabigan da.​—1 Corinto 10:24; 13:5.

15. (a) Anton so ginawa nen Jesus sanen impanengneng na saray babangatan to so kakapuyan da? (b) Antoray naaralan tayo manlapud alimbawa to?

¹⁵ Imanoen pa no panon ya impatnag nen Jesus so panagpaga to ed saray babangatan to diad samay labi antis na ipatey to, sanen impanengneng da so kakapuyan da. Anggaman aminpiga ton kinerew ed sikaran manpikasi ra, sikaray amitlon akateglep diad hardin na Getsemani. Kabebekta et pinaliberan ira na armadon lalaki. Sarayan lalaki so tinepetan nen Jesus: “Siopa so anapen yo?” Sanen inkuan dan, “si Jesus a taga-Nazaret,” oniay inkuan to: “Siak itan.” Lapud amta nen Jesus a “say oras [na ipatey to] asabi la,” oniay inkuan to: “No siak so anapen yo sirin, paulyan yo so saraya ya onla.” On, ninonot lawas nen Jesus so pankaabigan na saray babangatan to, a kabiangan na piguratibon nobya to, tan nanggaway paraan pian ag-ira napilanor. Kanian no aralen na asawan lalaki so paraan na impantrato nen Jesus ed saray babangatan to, dakel a prinsipyo so niyaplika ra no panon so nepeg dan pantrato ed asawa ra.​—Juan 18:1-9; Marcos 14:34-37, 41.

Aglabat Nibase ed Emosyon so Panangaro nen Jesus

16. Panon so impantrato nen Jesus ed si Marta, ingen panon a sikatoy impetek to?

¹⁶ Ibabaga na Biblia a “si Jesus inaro to si Marta, tan say agi to, tan si Lazaro,” a mabetbet a manpaparawes ed sikato diad abung da. (Juan 11:5) Balet, siansia ni a sinimbawa nen Jesus si Marta sanen manpapagan maong ed pangipaparaan toy naakan, a satan so nanlimita ed panaon to a makaawat na espiritual a panangibangat manlapud si Jesus. Oniay inkuan nen Jesus: “Sika, Marta, amayamay a bengatla so pampapagaan tan pansasakitan moy ulo. Saksakey so talagan nakaukolan!” (Lucas 10:41, 42, Maung a Balita) Andi-duaruwan mainomay ya inawat nen Marta itan a simbawa lapu ed mapatnag a panamabli ed sikato nen Jesus. Mipadpara, nepeg a tratoen na asawan lalaki so asawa ra diad mapangasi tan maaron paraan, ya alwaran dan maong so panagsalita ra. Balet, sano nakaukolan dan ipetek so asawa ra, manepeg labat a bulos iran mansalita a singa ed si Jesus.

17, 18. (a) Panon a binano nen Pedro si Jesus, tan akin a kinaukolan ya ipetek si Pedro? (b) Anto so responsabilidad na asawan laki?

¹⁷ Diad sananey nin inkagawa, impaliwawa nen Jesus ed saray apostol to a kaukolan toy onla ed Jerusalem, tan sikatoy pasegsegangen diman na ‘saray mamasiken tan manunaan a saserdote tan saray eskriba, tan sikatoy pateyen da tan diad komatlon agew et onoli ed bilay.’ Balet si Pedro et binano toy Jesus, a kuan to: “Sikato so niarawi komon  ed sika, Katawan: saya agkomon nagawa anggan kapigan ed sika.” Malinew, say alablabas ya emosyon nen Pedro so amuragas ed panmoria to. Kinaukolan a sikatoy ipetek. Kanian inkuan nen Jesus ed sikato: “Ekal ka’d arap ko, Satanas: sikay sakey a makapagapol ed siak: ta agmo nononoten iray bengatlan nipaakar ed Dios, noag saray bengatlan nipaakar ed saray totoo.”​—Mateo 16:21-23.

¹⁸ Imbaga lambengat nen Jesus no anto so linawa na Dios, salanti, sikatoy managmak na dakel ya irap tan napapatey. (Salmo 16:10; Isaias 53:12) Kanian alingo si Pedro sanen binano toy Jesus. On, kinaukolan nen Pedro so mapekder a pametek ed sikato, a singa met ed sikatayon amin no maminsan. Say asawan laki, ya ulo na pamilya, so walaan na autoridad tan responsabilidad a mangipetek odino mangorehi ed saray membro na pamilya to, a pati asawa to. Anggaman nakaukolan toy magmaliw a mapekder sano mangokorehi, nepeg ton gawaen itan diad mapangasi tan maaron paraan. Kanian no panon a tinulongan nen Jesus si Pedro a nipetek so panmoria to, ontan met so nepeg a gawaen no maminsan na asawan lalaki ed asawa ra. Alimbawa, no say panangawes, panagsulong na alahas, odino panag-ates na asawa ra et agla mitunosan ed kasimpitan ya irerekomenda na Kasulatan, nayarin kaukolan a mapangasin ipaliwawa na asawan laki ed asawa to a nepeg ton umanen itan.​—1 Pedro 3:3-5.

Makagunggona so Pananos na Asawan Lalaki

19, 20. (a) Anton problema so linmesa ed limog na saray apostol nen Jesus, tan panon itan ya inarap nen Jesus? (b) Panon kaepektibo iray impansagpot nen Jesus?

¹⁹ No wala so lingo a nakaukolan ya ipetek, agnepeg ya ilaloan na asawan lalaki a say masimoon a pansasagpot dan ipetek itan et manresulta a tampol ed maabig. Kinaukolan nen Jesus so tuloytuloy a pansagpot pian nipetek iray awawey na apostol to. Alimbawa, diad limog na saray apostol et linmesay panlalaslasan tan pinmatnag lamet itan sanen magano lan manampot so ministeryo nen Jesus. Sikaray nansasangsangan no siopa so ompatnag a sankatageyan ed sikara. (Marcos 9:33-37; 10:35-45) Ag-abayag kayari na mikaduan impansasangsangan da, inyarunsa nen Jesus so pangiselebra ra ed unor lan Paskua diad pribadon pasen. Diad saman et anggapo ed sikara so namboluntaryon manggawa ed ipapasen ya abeban kimey a panguras ed marabok a sali na arum unong a niyugali la nensaman. Balet, si Jesus so nanggawa ed satan. Insan inkuan to: “Inikdan ta kayo na sakey a pangaligan.”​—Juan 13:2-15.

²⁰ Saray asawan lalaki a mapaabeba a singa si Jesus so maseguron pikooperaan tan suportaan na asawa ra. Balet nakaukolan so inkaanos. Sanen aralem lay labi ed saman a Paskua, nansasangsangan lamet na saray apostol no siopa ed sikara so ompatnag a sankatageyan. (Lucas 22:24) On, mabetbet a mankaukolan na panaon so panguman na saray awawey tan kondukta, tan aliwan biglaan itan. Ingen, agaylan makapatumang sano positibo iray resulta na satan, a singa ed agawa ed limog na saray apostol!

21. Sano nipapaarap ed saray subok natan, anto so impaseseg ed saray asawan lalaki a nodnonoten tan gawaen da?

²¹ Natan et mas mairap iran subok so aarapen na saray sanasawa nen say kapiganman. Dakel la so mangibabaliwala ed impansipanan da bilang sanasawa. Kanian, sikayoran asawan lalaki, nodnonoten yo so letnegan na panangasawa. Agyo lilingwanan a say panangasawa et inggapo, inyuksoy tan inletneg na maaron Dios tayo, si Jehova. Imbaki to so Anak ton si Jesus, ya aliwa labat a Mananondon odino Manangiliktar tayo, noagta sakey met ya ehemplo a nepeg ya aligen na saray asawan lalaki.​—Mateo 20:28; Juan 3:29; 1 Pedro 2:21.

Panon Yon Ebatan?

• Akin ya importante a bidbiren tayo so angiletneg na panangasawa?

• Antoray nipaseseg a gawaen na asawan lalaki pian nipatnag day panangaro ed asawa ra?

• Diad impantrato nen Jesus ed saray babangatan to, anto iray alimbawa to a mangiyiilustra ed no panon so nepeg a pangagamil na asawan laki ed singa-Kriston inkaulo?

[Tepetepet Parad Panagaral]

[Litrato ed pahina 14]

Akin a nepeg ya aralen na asawan lalaki so paraan na impantrato nen Jesus ed bibii?

[Litrato ed pahina 15]

Sanen naksawan iray babangatan nen Jesus, impatnag to so konsiderasyon

[Litrato ed pahina 16]

Nepeg a simbawaen na asawan lalaki so asawa ra diad mapangasi tan maalwar a panagsalita