Ecclesiastes 2:1-26
2 Unya miingon ko sa akong kasingkasing: “Akong sulayan nga maglipay* ug tan-awon nako kon kini duna bay kaayohan.” Apan tan-awa! kana usab kawang.
2 Miingon ko bahin sa katawa, “Binuang kini!”
Ug bahin sa kalipayan, “Unsay pulos niini?”
3 Gisusi nako ang akong kasingkasing pinaagi sa pag-inom ug bino,+ samtang gigiyahan gihapon ko sa akong kaalam; naghimo pa gani kog kabuangan aron akong mahibaloan kon unsay labing maayong himoon sa mga tawo panahon sa ilang mubong kinabuhi ilalom sa kalangitan.
4 Naghimo kog dagkong mga buhat.+ Nagtukod kog mga balay alang sa akong kaugalingon;+ nagtanom kog mga ubasan alang sa akong kaugalingon.+
5 Naghimo kog mga tanaman ug parke alang sa akong kaugalingon, ug gitamnan nako kini sa tanang matang sa kahoy nga mamunga.
6 Naghimo kog mga linaw sa tubig alang sa akong kaugalingon, aron matubigan ang malamboong kakahoyan.*
7 Nagkuha kog mga sulugoong lalaki ug babaye,+ ug diha koy mga sulugoon nga natawo sa akong* panimalay. Nagbuhi usab kog daghang kahayopan—mga baka ug karnero+—nga mas daghan kay kang bisan kinsa nga nauna kanako sa Jerusalem.
8 Nakatigom kog plata* ug bulawan alang sa akong kaugalingon,+ ang mga bahandi sa* mga hari ug sa mga probinsiya.+ Nakabaton kog mga mag-aawit nga lalaki ug babaye, ingon man nianang makahatag ug dakong kalipay sa mga anak sa mga tawo—usa ka babaye, oo, daghang babaye.
9 Busa nahimo kong bantogan ug nalabwan nako si bisan kinsa nga nauna kanako sa Jerusalem.+ Ug nagpabilin kong maalamon.
10 Wala nako hikawi ang akong kaugalingon sa bisan unsa nga akong gitinguha.*+ Wala nako pugngi ang akong kasingkasing sa bisan unsang matang sa paglipaylipay,* kay ang akong kasingkasing nagmalipayon tungod sa tanan nakong paghago, ug ganti* kini sa tanan nakong paghago.+
11 Apan dihang gipamalandong nako ang tanang buhat sa akong mga kamot ug ang tanang paghago nga akong gihimo,+ nakita nako nga ang tanan kawang, samag paggukod sa hangin;+ wala gyoy bili* ang bisan unsa ilalom sa adlaw.+
12 Unya akong giliso ang akong pagtagad sa kaalam ug sa tinonto ug sa kabuangan.+ (Kay unsay mahimo sa tawo nga magsunod sa hari? Kadto lang mga butang nga nahimo na.)
13 Ug nakita nako nga mapuslanon ang kaalam kay sa kabuangan,+ sama nga mapuslanon ang kahayag kay sa kangitngit.
14 Ang usa nga maalamon tin-awng makakita sa iyang dalan;*+ apan ang hungog naglakaw sa kangitngit.+ Naamgohan usab nako nga usa ra ang dangatan nilang tanan.+
15 Unya miingon ko sa akong kasingkasing: “Ang mahitabo sa hungog mahitabo usab kanako.”+ Busa unsay akong nakuha sa pagkahimong hilabihan ka maalamon? Mao nga miingon ko sa akong kasingkasing: “Kini usab kawang.”
16 Kay ang handomanan sa maalamon o sa hungog dili molungtad.+ Sa umaabot nga mga adlaw, ang tanan malimtan. Ug sa unsang paagi ang maalamon mamatay? Sama ra sa hungog.+
17 Busa gidumtan nako ang kinabuhi,+ kay ang tanang gibuhat ilalom sa adlaw daw makapaguol kanako, kay ang tanan kawang,+ samag paggukod sa hangin.+
18 Akong gidumtan ang tanan nakong gihagoan ilalom sa adlaw,+ kay ibilin ra nako kini sa tawo nga magsunod kanako.+
19 Ug kinsay nasayod kon siya ba maalamon o buangbuang?+ Bisan pa niana, siya ang magdumala sa tanang butang nga akong nabatonan ilalom sa adlaw pinaagi sa akong paghago ug kaalam. Kini usab kawang.
20 Busa ang akong kasingkasing nawad-ag paglaom labot sa tanan nakong paghago ilalom sa adlaw.
21 Kay ang usa mahimong maghago, nga gigiyahan sa kaalam ug kahibalo ug kahanas, apan itugyan niya ang iyang bahin* ngadto sa tawo nga wala maghago niana.+ Kini usab kawang ug usa ka dakong kapakyasan.*
22 Unsa man gyoy makuha sa tawo gikan sa tanan niyang paghago ug sa tinguha nga magpalihok kaniya sa pagpaningkamot ilalom sa adlaw?+
23 Kay sa tanan niyang adlaw, ang iyang buluhaton nagdalag kasakit ug kagul-anan,+ ug bisan sa gabii, ang iyang kasingkasing dili makapahulay.+ Kini usab kawang.
24 Wala nay mas maayo pa alang sa tawo kay sa mokaon ug moinom ug malipay sa* iyang paghago.+ Naamgohan usab nako nga gikan kini sa kamot sa matuod nga Diyos,+
25 kay walay tawo nga mas maayo ang ginakaon ug ginainom kay kanako.+
26 Siya naghatag ug kaalam ug kahibalo ug kalipay ngadto sa tawo nga nakapalipay kaniya,+ apan siya naghatag sa mga makasasala ug buluhaton sa pagtigom ug pagkolekta aron lang ihatag ngadto sa usa nga nakapalipay sa matuod nga Diyos.+ Kini usab kawang, samag paggukod sa hangin.
Mga Footnote
^ O “ang kalipayan.”
^ O “lasang.”
^ Literal, “mga anak nga lalaki sa.”
^ Iningles, silver.
^ O “katigayonan nga alang lang sa.”
^ Literal, “nga gipangayo sa akong mga mata.”
^ O “kalipayan.”
^ O “bahin.”
^ O “kaayohan.”
^ Literal, “Ang mga mata sa maalamon anaa sa iyang ulo.”
^ O “ang tanan.”
^ O “katalagman.”
^ O “malipay sa bunga sa.”
