Seken Samuel 6:1-23

  • Bokis blong God i kam long Jerusalem (1-23)

    • Usaha i holemtaet Bokis nao God i kilim hem i ded (6-8)

    • Mikal i no moa tinghevi long Deved (16, 20-23)

6  Biaen Deved i hivimap olgeta nambawan soldia blong Isrel blong oli kam wanples, mo i gat 30,000 man evriwan.  Nao Deved wetem olgeta man we oli stap wetem hem, oli go long Bahalajuda blong karem Bokis blong tru God i kam.+ Bokis ya, ol man oli stap go long fored blong hem blong singaot long nem blong Jehova komanda blong ol ami,+ we i sidaon long jea blong king, antap long* ol jerubim.+  Be blong karem Bokis ya blong tru God, oli putum Bokis ya long wan niufala kat+ we buluk i pulum, nao oli aot long haos blong Abinadab+ we i stap antap long hil. Usaha wetem Ahio we tufala i boe blong Abinadab, tufala nao i stap lidim niufala kat ya.  Nao oli tekem Bokis blong tru God mo oli aot long haos blong Abinadab antap long hil, mo Ahio i wokbaot i go fastaem long Bokis ya.  Nao long fes blong Jehova, Deved wetem ful haos blong Isrel oli stap singsing, oli stap danis, mo oli stap plei long ol instramen we oli wokem long wud blong junipa, ol hap, ol narafala instramen we oli gat string,+ ol tamborin,+ ol seka, mo ol simbol.+  Be taem oli kam long ples blong klinim wit blong Nakon, buluk we i stap pulum kat i mekem se klosap Bokis blong tru God i foldaon, nao Usaha i pusum han blong hem mo i holemtaet Bokis ya.+  Ale Jehova i kros tumas long Usaha, nao tru God i kilim hem i ded+ long ples ya, from we aksen blong hem i no soem respek.+ Nao Usaha i ded long ples ya long saed blong Bokis blong tru God.  Be Deved i harem nogud* from we Jehova i kros nao i panisim Usaha. Mo stat long taem ya kam kasem tede, oli singaot ples ya se Peresusaha.*  Ale long dei ya Deved i fraet long Jehova,+ mo i talem se: “?Olsem wanem bambae Bokis blong Jehova i kam long mi?”+ 10  Nao Deved i no moa wantem tekem Bokis blong Jehova i go long ples we hem i stap long hem, hemia long Taon Blong Deved.+ Be Deved i mekem se Bokis ya i go long haos blong Obededom+ we i blong Gat. 11  Nao Bokis blong Jehova i stap tri manis long haos blong Obededom we i blong Gat, mo Jehova i gohed blong blesem Obededom wetem olgeta we oli stap long haos blong hem.+ 12  Nao King Deved i kasem ripot se: “Bokis blong tru God i mekem se Jehova i stap blesem Obededom wetem ol famle blong hem, mo olgeta samting we hem i gat.” Ale Deved i go long haos blong Obededom, blong i tekem Bokis blong tru God i go long Taon Blong Deved, mo hem wetem ol man blong hem oli glad tumas.+ 13  Taem ol man blong karem+ Bokis blong Jehova oli leftemap Bokis ya mo oli wokbaot sikis step i go, Deved i kilim wan bul mo wan animol we i fatfat blong mekem sakrefaes. 14  Nao Deved i danis wetem ful paoa blong hem long fes blong Jehova. Long taem ya Deved i werem wan efod we oli wokem long linen.+ 15  Taem Deved mo ful haos blong Isrel oli tekem Bokis+ blong Jehova i kam antap, oli glad tumas nao oli stap singsingaot+ mo oli blo long hon.+ 16  Be taem oli tekem Bokis blong Jehova i kam insaed long Taon Blong Deved, Mikal+ we i gel blong Sol i lukluk i godaon tru long windo mo i luk we King Deved i stap jamjam mo i stap danis long fes blong Jehova, nao long hat blong hem, hem i no moa tinghevi long Deved.+ 17  Ale oli tekem Bokis blong Jehova i kam, mo oli go putum long ples blong hem insaed long tent we Deved i stanemap finis.+ Biaen Deved i givim ol ofring we oli bonem fulwan+ mo ol sakrefaes blong pis+ long fes blong Jehova.+ 18  Afta we Deved i givim ol ofring we oli bon fulwan mo ol sakrefaes blong pis, hem i blesem ol man long nem blong Jehova komanda blong ol ami. 19  Mo tu, hem i serem kakae long olgeta man, long olgeta man Isrel, mo long evri man mo woman. Hem i givim wan raon bred,* wan kek we oli wokem long frut ya det, mo wan kek we oli wokem long grep we oli draemap. Nao biaen evriwan oli gobak long haos blong olgeta. 20  Taem Deved i kambak blong blesem olgeta we oli stap long haos blong hem, Mikal+ we i gel blong Sol i kamaot blong mitim hem mo i talem se: “Tede king blong Isrel i daonem hem wan taem hem i no werem klos long fes blong ol slef gel blong ol man blong wok blong hem. Hem i mekem olsem wan man we hed blong hem i emti i stap soem bodi blong hem.”+ 21  Nao Deved i talem long Mikal se: “Samting we mi mekem i blong Jehova, we hem nao i jusumaot mi blong mi lidim ol man Isrel we oli ol man blong Jehova, be i no jusum papa blong yu wetem ol famle blong hem.+ Taswe bambae mi gohed blong danis olsem long fes blong Jehova, 22  mo bambae mi gohed blong mekem se mi daon gogo mi tu mi luk se mi daon olgeta. Be ol slef gel ya we yu tokbaot, bambae oli leftemap nem blong mi.” 23  Nao Mikal+ we i gel blong Sol i no gat pikinini gogo kasem we hem i ded.

Ol futnot

MNT: “bitwin.”
NT: “kros.”
Hemia i minim “Kros Blong Hem i Kasem Usaha.”
Bred ya i gat hol long medel.