Seken Samuel 1:1-27
1 Afta long ded blong Sol, mo afta we Deved i winim* ol laen blong Amalek, hem i kambak long Jiklag+ mo i stap tu dei long ples ya.
2 Nao long namba 3 dei, wan man i kamtru long Deved. Man ya i aot long kamp blong Sol, mo ol klos blong hem oli brok, mo graon i stap long hed blong hem. Taem hem i kam klosap long Deved, hem i foldaon long graon blong ona long hem.
3 Nao Deved i askem long hem se: “?Yu yu kam wea?” Man ya i ansa se: “Mi mi ronwe long kamp blong Isrel.”
4 Nao Deved i askem se: “Plis yu talem long mi, ?faet i olsem wanem?” Nao man ya i se: “Ol man oli ronwe long faet mo plante oli ded. Sol mo boe blong hem Jonatan, tufala tu i ded.”+
5 Ale Deved i askem long yang man ya we i kam talemaot nius, i se: “?Yu yu save olsem wanem se Sol wetem boe blong hem Jonatan tufala i ded?”
6 Yang man ya i ansa se: “Mi mi go long Hil Ya Gilboa+ mo mi luk we Sol i stap lei long spia blong hem blong i no foldaon, be ol jariot mo ol soldia we oli ron long hos oli stap kam klosap long hem.+
7 Taem hem i tanemraon mo i luk mi, hem i singaot mi, nao mi ansa se: ‘!Mi hemia!’
8 Nao hem i askem se: ‘?Yu yu hu?’ Mo mi se: ‘Mi mi wan laen blong Amalek.’+
9 Ale hem i se: ‘Plis, yu kam stanap klosap long mi mo yu kilim mi mi ded, from we mi safa bigwan be mi laef yet.’*
10 Mi save se bambae hem i no save laef afta long bigfala kil we hem i kasem, taswe mi go stanap klosap long hem mo mi kilim hem i ded.+ Biaen mi tekemaot hat blong king long hed blong hem mo braslet* we i stap long elbo blong hem antap, mo mi tekem i kam long ples ya long masta blong mi.”
11 Taem Deved i harem nius ya, hem i holemtaet klos blong hem mo i terem, mo olgeta man we oli stap wetem hem oli mekem sem mak.
12 Nao oli krae mo oli singsingaot bigwan, mo oli fasting+ go kasem sapa, from we Sol, wetem boe blong hem Jonatan, mo plante man blong Jehova, hemia plante man Isrel+ oli bin ded long naef blong faet.
13 Nao Deved i askem long yang man we i karem nius i kam, i se: “?Yu yu blong wea?” Man ya i se: “Mi mi boe blong wan man blong narafala kantri we i stap long ples ya, wan man long laen blong Amalek.”
14 Ale Deved i askem long hem se: “?From wanem yu yu no fraet blong kilim i ded man we Jehova i makemaot hem?”+
15 Nao Deved i singaot wan yang man mo i talem long hem se: “Yu kam kilim man ya i ded.” Ale hem i kilim man ya i ded long naef blong faet.+
16 Nao Deved i talem long hem se: “I fol blong yu nomo we blad blong yu i ron, from we yu wan yu talemaot se: ‘Mi mi kilim i ded man we Jehova i makemaot hem.’”+
17 Biaen Deved i singsing sore* from Sol mo boe blong hem Jonatan.+ Singsing ya,
18 nem blong hem “Bonara,” mo oli raetem long buk blong Jasara. Deved i talem long ol man Juda se oli mas lanem singsing sore ya we i talem se:+
19 “O Isrel, ol gudfala man oli ded olbaot long ol hil blong yu.+
!Ol strong man oli foldaon finis!
20 Yufala i no mas talemaot samting ya long Gat,+Yufala i no mas talemaot long ol rod blong Askelon,I nogud ol gel blong ol man Filistia oli glad,No ol gel blong ol man ya we oli no sakomsaes oli hapi.
21 Yufala ol bigfala hil blong Gilboa,+I gud sipos wota blong naet mo ren i no foldaon long yufala,Mo i gud sipos ol garen blong yufala oli no givim ol tabu kontribusen we i blong givim long God,+From we sil blong ol strong man i kam doti,Mo sil blong Sol, oel i no moa makemaot.
22 Bonara blong Jonatan+ mo naef blong faet blong SolI wetwet long blad blong ol enemi mo i stap gotru long gris blong ol strong man blong faet,Tufala i stap win oltaem.+
23 Sol mo Jonatan,+ taem tufala i laef, tufala i gud tumas mo ol man oli lavem tufala,Mo taem tufala i ded, tufala i no seraot.+
Tufala i kwik moa i bitim ol igel,+Tufala i strong moa i bitim ol laeon.+
24 Ol gel Isrel, yufala i krae from Sol,Hem i mekem yufala i werem ol klos we i laet red mo we oli flasem gud,Hem i putum gol long ol klos blong yufala.
25 !Ol strong man oli foldaon finis long faet!
!Jonatan i ded finis mo i stap slip long ol hil blong yufala!+
26 Brata blong mi Jonatan, mi mi harem nogud tumas from yu,Mi mi laekem yu tumas.+
Lav we yu gat long mi i naes moa i bitim lav blong ol woman.+
27 !Ol strong man oli foldaon finisMo ol tul blong faet oli lus!”
Ol futnot
^ NT: “kilim i ded.”
^ NT: “olgeta sol blong mi i stap yet long mi.”
^ NT: “bigfala ring.”
