Surat ha mga Taga-Galacia 1:1-24

  • Pangumusta (1-5)

  • Waray iba nga maopay nga sumat (6-9)

  • Maopay nga sumat nga iginsangyaw ni Pablo tikang ha Dios (10-12)

  • Kakombirte ni Pablo ngan tinikangan han iya buruhaton (13-24)

1  Tikang kan Pablo, usa nga apostol nga ginpili diri han mga tawo ngan diri liwat pinaagi ha usa nga tawo, kondi pinaagi kan Jesu-Kristo+ ngan ha Dios nga Amay,+ nga nagbuhi ha iya tikang ha mga patay,  ngan ha ngatanan nga kabugtoan nga kaupod ko, para ha mga kongregasyon ha Galacia:  Makarawat unta niyo an diri matupngan nga pagkabuotan ngan kamurayawan tikang ha Dios nga aton Amay ngan tikang ha Ginoo nga hi Jesu-Kristo.  Iginhatag niya an iya kalugaringon tungod han aton mga sala+ basi matalwas kita niya tikang ha presente nga maraot nga sistema han mga butang*+ uyon ha kaburut-on han aton Dios ngan Amay,+  nga ha iya an himaya ha kadayonan, oo ha kadayonan. Amen.  Nahipausa gud ako nga kadagmit niyo tumalikod* ha Iya nga nagtawag ha iyo pinaagi han diri matupngan nga pagkabuotan han Kristo ngan nagpinamati kamo ha iba nga klase hin maopay nga sumat.+  Diri kay may-ada iba nga maopay nga sumat; pero may mga tawo nga nagsasamok ha iyo+ ngan naruruyag pagbaliko han maopay nga sumat mahitungod han Kristo.  Pero bisan kon kami o usa nga anghel tikang ha langit an magpasamwak ha iyo hin maopay nga sumat nga iba han amon iginpasamwak ha iyo nga maopay nga sumat, maghikaraot hiya.  Sugad han amon ginsiring na, uutruhon ko pagsiring yana, An bisan hin-o nga nagpapasamwak ha iyo hin maopay nga sumat nga iba han iyo ginkarawat, maghikaraot hiya. 10  An mga tawo gud ba an akon ginpapangalimbasogan yana nga kombinsihon o an Dios? O an mga tawo ba an ginpapangalimbasogan ko lipayon? Kon an mga tawo pa gihapon an akon ginlilipay, diri ako magigin uripon han Kristo. 11  Kay karuyag ko hibaroan niyo, mga kabugtoan, nga an maopay nga sumat nga akon iginpasamwak ha iyo diri tikang ha mga tawo;+ 12  kay waray ko ito makarawat tikang ha tawo, ngan waray liwat ito igtutdo ha akon, kondi iginpahayag ito ha akon ni Jesu-Kristo. 13  Sigurado nga nakabati kamo mahitungod han akon panggawi hadto han membro pa ako han Judaismo,+ nga padayon an akon duro* nga pagtimaraot ha kongregasyon han Dios ngan pagbungkag hito;+ 14  ngan mas nag-uswag ako ha Judaismo kay ha damu han akon kaedad ha akon nasud, kay mas madasigon gud ako ha mga tradisyon han akon mga amay.+ 15  Kondi han nalipay an Dios, nga nagpagawas ha akon tikang ha tiyan han akon nanay ngan nagtawag ha akon pinaagi han iya diri matupngan nga pagkabuotan,+ 16  nga igpahayag an iya Anak pinaagi ha akon basi maipasamwak ko an maopay nga sumat mahitungod ha iya ngadto ha mga nasud,+ waray dayon ako kumonsulta ha bisan hin-o nga tawo;* 17  waray liwat ako sumagka ngadto ha Jerusalem ha mga apostol nga nahiuna ha akon, lugod kinadto ako ha Arabia, ngan katapos, binalik ako ha Damasco.+ 18  Katapos, paglabay hin tulo ka tuig sinagka ako ngadto ha Jerusalem+ basi bisitahon hi Cefas,*+ ngan inukoy* ako kaupod niya hin 15 ka adlaw. 19  Pero waray ko makita an bisan hin-o han iba nga mga apostol, hi Santiago+ la nga bugto han Ginoo. 20  Yana mahitungod han mga butang nga akon iginsusurat ha iyo, ginsisiguro ko ha iyo ha atubangan han Dios nga diri ako nagbubuwa. 21  Katapos hito, kinadto ako ha mga rehiyon han Sirya ngan Cilicia.+ 22  Pero diri ako personal nga kilala han mga kongregasyon ha Judea nga kahiusa han Kristo. 23  Hinbatian la nira ha iba: “An lalaki nga nagtimaraot hadto ha aton+ nagpapasamwak na yana han maopay nga sumat mahitungod han pagtoo nga iya hadto ginbubungkag.”+ 24  Salit ginhihimaya nira an Dios tungod ha akon.

Mga footnote

O “maraot nga panahon.” Kitaa an Glossary.
O “kadagmit niyo magpahirayo.”
Lit., “nga nagsobra an akon padayon.”
Lit., “ha unod ngan dugo.”
Gintatawag liwat nga Pedro.
Ha iba nga lugar, “inistar.”