An Siyahan nga Surat kan Timoteo 4:1-16

  • Pahamangno kontra ha katutdoan han demonyo (1-5)

  • Pagin maopay nga ministro han Kristo (6-10)

    • Pagbansay ha lawas igintanding ha debosyon ha Dios (8)

  • Tagi hin atensyon an pagtutdo (11-16)

4  Pero an giniyahan nga pulong* matin-aw nga nasiring nga ha urhi nga mga panahon an iba mabaya ha pagtoo, kay magpipinamati ha nakakalimbong nga giniyahan nga mga kapahayagan*+ ngan mga katutdoan han mga demonyo,  pinaagi han pagkahipokrito han mga tawo nga nagyayakan hin mga buwa,+ nga an konsensya nagbanhod na sugad hin ulat nga nahimo han nagbabaga nga puthaw nga panmarka.  Igindidiri nira an pag-asawa+ ngan ginsusugo an mga tawo nga maglikay ha mga pagkaon+ nga ginlarang han Dios basi kaunon+ nga may pagpasalamat han mga may pagtoo+ ngan nakakasabot hin husto han kamatuoran.  Kay an tagsa nga linarang han Dios maopay,+ ngan waray sadang isalikway+ kon ginkakarawat ito nga may pagpasalamat,  kay nababaraan ito pinaagi han pulong han Dios ngan han pag-ampo para hito.  Pinaagi han paghatag hini nga sagdon ha kabugtoan, magigin maopay ka nga ministro ni Kristo Jesus, usa nga gintutdoan han mga pulong han pagtoo ngan han maopay nga katutdoan nga ginsusunod mo hin maopay.+  Pero isalikway an buwa nga mga istorya nga diri nagpapasidungog ha Dios,+ pariho han mga gin-iistorya han lagas nga kababayin-an. Lugod, bansaya an imo kalugaringon nga an imo tumong amo an pagpakita hin debosyon ha Dios.  Kay an pagbansay ha lawas* may gutiay nga kapulsanan, pero an debosyon ha Dios mapulsanon ha ngatanan nga butang, kay nag-uupod ito han saad nga kinabuhi yana ngan kinabuhi ha tiarabot.+  Ito nga mga pulong masasarigan ngan angay karawaton hin bug-os. 10  Ini an hinungdan nga maduruto kita nga nagbubuhat ngan nangangalimbasog,+ kay naglalaom kita ha buhi nga Dios, nga amo an Paratalwas+ han ngatanan nga klase hin tawo,+ labi na ha mga matinumanon. 11  Padayon nga ihatag ini nga mga sugo ngan itutdo ini. 12  Ayaw gud pabay-i nga minuson han bisan hin-o an imo pagin batan-on. Lugod, magin susbaranan ka ha mga matinumanon, ha pagyakan, ha panggawi, ha gugma, ha pagtoo, ha kaputli.* 13  Tubtob nga umabot ako, padayon nga buhata an imo gimaopayi ha pagbasa ha publiko,+ ha sinsero nga pagsagdon,* ha pagtutdo. 14  Ayaw pabay-i an regalo nga iginhatag ha imo pinaagi hin tagna han igintungbaw ha imo han grupo han mga tigurang an ira mga kamot.+ 15  Pamurubuota* ini nga mga butang; tagi ini hin bug-os nga atensyon, basi klaro nga makita han ngatanan nga tawo an imo pag-uswag. 16  Pirme tagi hin atensyon an imo kalugaringon ngan an imo pagtutdo.+ Ipadayon ini nga mga butang, kay ha pagbuhat hini, matatalwas mo an imo kalugaringon ngan an mga namamati ha imo.+

Mga footnote

Lit., “an espiritu.”
Lit., “maglimbong nga mga espiritu.”
O “pag-ehersisyo.”
O “kalimpyo.”
O “pagdasig.”
O “Pamalandonga.”