Diane 6:1-35

  • Ikele tlhoko ka ditumalano tsa go duela melato (1-5)

  • “Ya kwa tshoswaneng, wena setshwakga” (6-11)

  • Motho yo o se nang mosola le yo o bosula (12-15)

  • Dilo tse supa tse Jehofa a di tlhoileng (16-19)

  • Ikele tlhoko mo mosading yo o bosula (20-35)

6  Morwaaka, fa e le gore o dirile tumalano ya gore o tla duela molato wa moagelani wa gago,+Fa o dirile tumalano le motswakwa,+   Fa o golegilwe ke tsholofetso e o e dirileng,O tshwerwe ke mafoko a molomo wa gago,+   Dira seno morwaaka, mme o ikgolole,Ka gonne o wetse mo seatleng sa moagelani wa gago: Tsamaya, o ikokobetse mme o itlhaganele o kope moagelani wa gago gore a go golole mo tumalanong eo.+   O se ka wa robala,Kgotsa wa tswala matlho a gago o ise o dire seno.   Ikgolole jaaka tshepe mo seatleng sa motsomi,Jaaka nonyane mo seatleng sa motshwaradinonyane.   Ya kwa tshoswaneng, wena setshwakga;+Ithute ditsela tsa yone mme o tlhalefe.   Le fa gone e se na molaodi, mookamedi kgotsa mmusi,   E phutha dijo tsa yone selemo,+E bile e kgobokanya dijo tsa yone ka nako ya thobo.   O tla robala foo ka lobaka lo lo kae, wena setshwakga? O tla tsoga leng? 10  Fa o robala go le gonnye, o otsela go le gonnye,O phutha diatla go le gonnye gore o ikhutse,+ 11  Khumanego e tla go tlela fela jaaka senokwane,Le tshotlego e tla go tlela jaaka legodu le le tshotseng sebetsa.+ 12  Motho yo o se nang mosola le yo o bosula o tsamayatsamaya a bua puo e e sokameng;+ 13  O tsipa leitlho,+ o dira matshwao ka lonao, e bile o supasupa ka menwana. 14  E re ka pelo ya gagwe e sokame,O nna a loga maano a a bosula+ e bile a baka dikganetsano.+ 15  Ka jalo, o tla tlelwa ke masetlapelo ka tshoganyetso;Go ise go ye kae, o tla robaganngwa mo a ka se kang a fola.+ 16  Go na le dilo di le thataro tse Jehofa a di tlhoileng;Tota dilo tse a di ilang di supa: 17  Matlho a a ikgodisang,+ loleme lo lo buang maaka,+ le diatla tse di tshololang madi a a se nang molato,+ 18  Pelo e e logang maano a a bosula,+ le dinao tse di tabogelang kwa go direng bosula, 19  Mosupi wa maaka yo o sa bueng boammaaruri,+Le ope fela yo o losang bana* ba motho.+ 20  Morwaaka, ikobele taelo ya ga rrago,Mme o se ka wa latlha kaelo* ya ga mmago.+ 21  Di bofelele mo pelong ya gago ka metlha;Di gokelele mo molaleng wa gago. 22  Fa o tsamaya, di tla go etelela pele;Fa o robala, di tla go disa;Mme fa o tsogile, di tla bua le wena.* 23  Gonne taelo ke lobone,+Mme molao ke lesedi,+Mme kgalemelo le kotlhao ke tsela e e isang kwa botshelong.+ 24  Di tla go sireletsa mo mosading yo o bosula,+Le mo lolemeng lo lo tsietsang lwa mosadi yo o dirang boitsholo jo bo sa siamang.*+ 25  O se ka wa eletsa bontle jwa gagwe mo pelong ya gago+Kgotsa wa mo letla gore a go gogele ka matlho a gagwe a mantle, 26  Gonne ka ntlha ya mogwebakammele, monna o sala fela ka senkgwe,+Mme mosadi wa monna yo mongwe ene o tsoma botshelo* jwa gago jo bo tlhwatlhwakgolo. 27  A motho a ka baya molelo mo sehubeng sa gagwe mme diaparo tsa gagwe di bo di sa she?+ 28  Kgotsa a motho a ka tsamaya mo magaleng a a molelo mme dinao tsa gagwe di bo di sa she? 29  Go ntse fela jalo ka mongwe le mongwe yo o tlhakanelang dikobo le mosadi wa moagelani wa gagwe;Ga go na ope yo o tshwarang mosadi yoo yo o ka se kang a otlhaiwa.+ 30  Batho ga ba kgale legoduFa le utswa ka gonne le tshwerwe ke tlala. 31  Le fa go ntse jalo, fa le tshwarwa, le tla duela go menagane ga supa;Le tla latlhegelwa ke dilo tsotlhe tse di tlhwatlhwakgolo tsa ntlo ya lone.+ 32  Ope fela yo o dirang boaka* ga a botlhale;Yo o dirang jalo o ipakela tshenyego.+ 33  O tla amogela dintho le tlontlologo fela,+Mme ditlhong tsa gagwe ga di kitla di phimoga.+ 34  Gonne lefufa le dira gore monna wa gagwe a tlale bogale,Ga a kitla a mo tlhomogela pelo fa a ipusolosetsa.+ 35  Ga a kitla a amogela tuelo* epe;Ga a kitla a busa pelo, go sa kgathalesege gore o newa mpho e kgolo go le kana kang.

Dintlha Tse di Kwa Tlase

Seheb., “barwa.”
Kgotsa “molao.”
Kgotsa “di tla go kaela.”
Seheb., “mosadi wa motswakwa.” Bona Dia 2:16.
Seheb., “ne′phesh.Bona Ditlhaloso Tsa Mafoko.
Seheb., “yo o dirang boaka le mosadi.”
Kgotsa “thekololo.”