Diane 15:1-33
15 Karabo e e bonolo e faposa bogale,+Mme lefoko le le kgopisang* le tsosa bogale.+
2 Yo o botlhale o dirisa kitso ka tsela e e molemo,+Mme sematla se phatloga fela se bua bomatla.
3 Matlho a ga Jehofa a gongwe le gongwe,A lebeletse ba ba bosula le ba ba molemo.+
4 Loleme lo lo ritibetseng* ke setlhare sa botshelo,+Mme puo e e sokameng e baka matshwenyego.*
5 Seeleele ga se tlotle kotlhao ya ga rraasone,+Mme motho yo o botlhale o amogela kgakololo.*+
6 Mo ntlong ya mosiami go na le letlotlo le legolo,Mme maungo* a modirabosula a mmakela mathata.+
7 Melomo ya ba ba botlhale e anamisa kitso,+Mme pelo ya sematla ga e a nna jalo.+
8 Setlhabelo sa badirabosula se makgapha mo go Jehofa,+Mme thapelo ya basiami e a mo itumedisa.+
9 Jehofa o tlhoile tsela ya motho yo o bosula,+Mme o rata motho yo o dirang se se siameng.+
10 Kotlhao e lebega e sa siama* mo mothong yo o fapogang mo tseleng,+Mme ope fela yo o tlhoileng kgalemelo o tla swa.+
11 Fa e le gore Jehofa o kgona go bona ba ba mo Lebitleng* le ba ba mo lefelong la tshenyego,*+Ruri o kgona go bona se se mo dipelong tsa batho!+
12 Mosotli ga a rate yo o mo gakololang.*+
Ga a kitla a botsa ba ba botlhale.+
13 Pelo e e itumetseng e dira gore sefatlhego se itumele,Mme pelo e e utlwileng botlhoko, e dira gore motho a kgobege marapo.*+
14 Pelo e e tlhaloganyang e batla kitso,+Mme molomo wa dimatla o itumelela go bua bomatla.+
15 Malatsi otlhe a motho yo o bogisiwang a bosula,+Mme yo o nang le pelo e e itumetseng* o nna a itumetse letsatsi le letsatsi.*+
16 Go botoka go nna le mo gonnye o boifa Jehofa+Go na le go nna le dikhumo tse dintsi tse di bakang tlhobaelo.*+
17 Go botoka dijo tsa merogo kwa go nang le lorato teng+Go na le poo e e nontshitsweng* kwa go nang le letlhoo teng.+
18 Motho yo o galefang motlhofo o tsosa dikgogakgogano,+Mme yo o sa galefeng ka bonako o kokobetsa komano.+
19 Tsela ya setshwakga e tshwana le legora la mmitlwa,+Mme tselana ya batho ba ba ikanyegang e tshwana le tsela e kgolo e e dirilweng sentle.+
20 Morwa yo o botlhale o itumedisa rraagwe,+Mme motho yo o sematla o nyatsa mmaagwe.+
21 Motho yo o seng botlhale o rata go dira dilo tsa boeleele,+Mme motho yo o nang le temogo o tsamaya a tlhamaletse.+
22 Dithulaganyo di a kgoreletsega fa go se na puisano,*Mme go na le se se fitlhelelwang fa go na le bagakolodi ba bantsi.+
23 Motho o a itumela fa a araba ka karabo e e siameng,*+E bile lefoko le le builweng ka nako e e tshwanetseng, ruri le molemo.+
24 Motho yo o nang le temogo o mo tselaneng ya botshelo, e leng tselana e e tlhatlogelang kwa godimo,+O tila tsela e e fologelang kwa Lebitleng* kwa tlase.+
25 Jehofa o tla rutlolola ntlo ya ba ba mabela,+Mme o tla sireletsa molelwane wa motlholagadi.+
26 Jehofa o tlhoile maano a a bosula a modirabosula,+Mme mafoko a a monate a itshekile mo go ene.+
27 Yo o dirisang ditsela tse di sa siamang go huma o tlisetsa ba lelapa la gagwe mathata,*+Mme yo o tlhoileng pipamolomo o tla tswelela a tshela.+
28 Mosiami o akanyetsa kwa teng pele ga a araba,*+Mme modirabosula o phatloga fela a bua dilo tse di bosula.
29 Jehofa o kgakala thata le badirabosula,Mme o utlwa thapelo ya basiami.+
30 Matlho a a phatsimang a* itumedisa pelo;Pego e e molemo e a kgothatsa.*+
31 Motho yo o reetsang kgalemelo e e nayang botsheloO itumelela go nna mo bathong ba ba botlhale.+
32 Ope fela yo o ganang kotlhao o nyatsa botshelo* jwa gagwe,+Mme ope fela yo o reetsang kgalemelo o tla nna le tlhaloganyo.*+
33 Go boifa Jehofa go ruta motho gore a nne botlhale,+E bile boikokobetso bo tla pele ga kgalalelo.+
Dintlha Tse di Kwa Tlase
^ Kgotsa “le le utlwisang botlhoko.”
^ Kgotsa “fodisang.”
^ Seheb., “e utlwisa moya botlhoko.”
^ Kgotsa “kgalemelo.”
^ Kgotsa “lotseno.”
^ Kgotsa “e le setlhogo.”
^ Kgotsa “Sheole.” Bona Ditlhaloso Tsa Mafoko.
^ Kgotsa “mo Abadona.”
^ Kgotsa “kgalemelang.”
^ Kgotsa “moya wa gagwe o utlwe botlhoko.”
^ Kgotsa “molemo.”
^ Seheb., “o na le moletlo ka metlha.”
^ Kgotsa “tlhakatlhakano.”
^ Seheb., “e e fepetsweng mo bojelong jwa diruiwa.”
^ Kgotsa “puo ya sephiri.”
^ Seheb., “ka karabo ya molomo wa gagwe.”
^ Kgotsa “Sheole.” Bona Ditlhaloso Tsa Mafoko.
^ Kgotsa “tlontlologo.”
^ Kgotsa “Pelo ya mosiami e akanya ka kelotlhoko gore e ka araba jang; e a akanya pele ga e bua.”
^ Kgotsa “Go leba ka tsela e e itumedisang go.”
^ Seheb., “e nontsha marapo.”
^ Seheb., “ne′phesh.” Bona Ditlhaloso Tsa Mafoko.
^ Seheb., “pelo.”
