Diane 4:1-27
4 Bomorwaaka, reetsang kotlhao ya ga rraalona;+Tlhwayang tsebe gore lo tle lo kgone go tlhaloganya,
2 Gonne ke tla lo gakolola ka tsela e e siameng;Lo se ka lwa tlogela molao* wa me.+
3 Ke ne ke le morwa yo o ikanyegang wa ga rre+E bile ke le morwa yo o rategang thata wa ga mmê.+
4 Rre o ne a nthuta a bo a nthaya a re: “E kete pelo ya gago e ka ngangatlela mafoko a me.+
Boloka ditaelo tsa me mme o tswelele o tshela.+
5 Batla botlhale, lwela go tlhaloganya.+
O se ka wa lebala se ke se buang, e bile o se ka wa se fapoga.
6 O se ka wa tlogela botlhale, mme bo tla go sireletsa.
Bo rate, mme bo tla go disa.
7 Botlhale ke selo sa botlhokwa* thata,+ ka jalo senka botlhale,Mo godimo ga tsotlhe tse o di batlang, batla kitso.+
8 Tseela botlhale kwa godimo, mme bo tla go tlotlomatsa.+
Bo tla go tlotla ka gonne o bo tlamparela.+
9 Bo tla go rwesa kgare e ntle ya malômô* mo tlhogong;Bo tla go kgabisa ka serwalo se sentle.”
10 Morwaaka reetsa, mme o amogele mafoko a me,Mme o tla tshela lobaka lo loleele.+
11 Ke tla go kaela tsela ya botlhale;+Ke tla go gogela mo ditselaneng tse di siameng.+
12 Fa o tsamaya, dikgato tsa gago ga di kitla di kgoreletsega;Le fa o siana, ga o kitla o kgopiwa.
13 Ngangatlela kotlhao; o se ka wa e tlogela.+
E sireletse, ka gonne e tla go naya botshelo.+
14 O se ka wa etsa batho ba ba bosula,E bile o se ka wa dira dilo tse ba di dirang.+
15 Tila ditiro tsa bone tse di bosula;+ O se ka wa di dira.+
16 Gonne ga ba kgone go robala go fitlha ba dira se se bosula.
Ba tlhorega boroko go fitlha ba diga mongwe.
17 Ba iphepa ka senkgwe sa bosula,E bile ba nwa beine ya thubakanyo.
18 Le fa go ntse jalo, tselana ya basiami e tshwana le lesedi la moso le le phatsimangLe le nnang le phatsima go ya pele go fitlha go nna motshegare.+
19 Tsela ya batho ba ba bosula e tshwana le lefifi;Ga ba itse gore ke eng se se ba kgopang.
20 Morwaaka, tlhwaela mafoko a me tsebe;Reetsa ka kelotlhoko* se ke se buang.
21 O se ka wa lebala mafoko a me;A boloke mo teng ga pelo ya gago,+
22 Gonne ba ba a bonang ba tla tshela+E bile ba tla itekanela mo mmeleng.*
23 Go feta dilo tsotlhe tse di tshwanetseng go sirelediwa, sireletsa pelo ya gago,+Ka gonne botshelo bo tswa mo go yone.
24 Tlosa puo e e sokameng mo go wena,+O bo o beele puo e e tsietsang kgakala thata le wena.
25 Matlho a gago a tshwanetse go leba kwa pele,Tlhoma matlho* a gago mo go se se kwa pele.+
26 Rethefatsa* tsela ya dinao tsa gago,+Mme ditsela tsotlhe tsa gago di tla tlhomama.
27 O se ka wa fapogela ka fa mojeng kgotsa ka fa molemeng.+
Tlosa dinao tsa gago mo go se se bosula.
Dintlha Tse di Kwa Tlase
^ Seheb., “thuto.”
^ Kgotsa “se segolo.”
^ Kgotsa “dithunya.”
^ Seheb., “Sekegela tsebe.”
^ Seheb., “mo nameng yotlhe.”
^ Kgotsa “matlho a a phatsimang.”
^ Kgotsa gongwe “Sekaseka ka kelotlhoko.”
