Nehemias 5:1-19
5 Balet, inreklamo na saray lalaki tan saray kaasawaan da iray agagi ran Judio.+
2 Wala ray mangibabaga: “Dakdakel kami, a kaiba ray anak min lalaki tan bibii. Kaukolan a makala kami naakan* pian makapangan tan manbilay kami.”
3 Ibabaga na arum: “Saray uma mi tan kaubasan mi tan kaabungan mi et iiter mi bilang garantiya pian makala kami naakan* no panaoy eras.”
4 Wala ni ray mangibabaga: “Imprenda mi ray uma tan kaubasan mi pian makala kami kuartan pambayar na buis ed ari.+
5 Sikami tan saray agagi mi et saksakey kamin laman tan dala,* ontan met iray ananak mi tan saray ananak da; ingen ta kaukolan min ipaaripen iray anak min lalaki tan bibii, tan arum ed saray anak min bibii et aripen la ra.+ Balet anggapoy pakayari min patundaen iya, lapud saray uma tan kaubasan mi et kayarian lay arum.”
6 Sinmanok ak a maong sanen nadngel koy reklamo ra tan sarayan imbabaga ra.
7 Kanian ninonot ko yan maong ed pusok, tan kinomprontak iray gagalangen a totoo tan saray kasandin manuley tan inkuan kod sikara: “Kada sakey ed sikayo et kekerewan yoy interes* so dilin agi yo.”+
Ontan met, angiyuksoy ak na baleg a pantitipon lapud sikara.
8 Tan inkuan kod sikara: “Anggad nayarian mi et dinondon mi ray Judion agagi tayo ya inlakod saray nasyon; balet natan et ilako yo kasi iray mismon agagi yo,+ tan kaukolan mi ran saliwen lamet?” Diad saya et ag-ira akasel, tan anggapoy nibaga ra.
9 Inkuan ko ni: “Aliwa tay gagawaen yo. Agta nepeg kayon manakar a walaay takot ed Dios tayo+ pian ag-itayo nabalaw na saray nasyon a kakabusol tayo?
10 Sakey ni, siak, saray agagik, tan saray lingkor ko et papautangen mi ra na kuarta tan ilik. Komon ta itunda tayo la yan panagpautang a walay interes.+
11 Komon ta diad sayan agew et ipawil yod sikara iray uma ra,+ kaubasan da, taneman day kiew ya olibo, tan kaabungan da, pati say kakalasus* na kuarta, ilik, balon alak, tan larak ya inala yod sikara bilang interes.”
12 Diad saya et inkuan da: “Ipawil mid sikara so inala mi tan anggapoy kerewen min kasalat. Gawaen mi so amin ya imbagam.” Kanian tinawag ko ray saserdote tan impansambak iramay lalaki a tooren da yan sipan.
13 Ontan met, impayag koy kawes ko* tan inkuan ko: “Diad onian paraan komon ipayag na tuan Dios so balang toon agmanumpal ed sayan sipan manlapud abung to tan manlapud kaykayarian to, tan diad onian paraan komon a sikatoy ipayag tan naupotan.” Et inmebat so interon kongregasyon: “Amen!”* Tan indayew day Jehova, tan tinoor na saray totoo so insipan da.
14 Sakey ni, manlapud agew a tinuro ak na ari bilang gobernador da+ diad dalin na Juda, manlapud koma-20 taon+ anggad koma-32 taon+ na uley nen Arin Artaxerxes,+ salanti, 12 taon, siak tan saray agagik et agkami angan ed suplay a naakan parad gobernador.+
15 Balet saramay datin gobernador ya akauna ed siak et pinabelatan da ray totoo tan aalaan da ra na 40 siklo* a pilak kada agew parad naakan tan alak. Ontan met, papairapen na saray lingkor da iray totoo. Balet agko itan ginawa+ lapud takot kod Dios.+
16 Niarum ni, angiba ak a nankimey ed sayan padir, tan agkami angala na anggan sakey ya uma;+ amin a lingkor ko et nantitipon ditan parad kimey.
17 Walay 150 Judio tan kasandin manuley ya ondurungod lamisaan ko, pati saramay oonlad sikami manlapud saray nasyon.
18 Kada agew, sakey a kalakian a baka, anemiran sankaabigan a karnero, tan saray manok so ipaparaan parad siak,* tan maminsan ed samploran agew et dakdakel tan nanduruman klase na alak so iseserbi. Anggaman ontan, agak kinmerew na suplay a naakan parad gobernador, lapud ambelat lay kimey na saray totoo.
19 O Dios ko, maabig* komon so nanonotan mod siak lapud amin a ginawak parad sarayan totoo.+
Paimanod leksab
^ Odino “ilik.”
^ Odino “ilik.”
^ Literal, “Singa laman na saray agagi min lalaki so laman mi.”
^ Odino “alablabas ya interes.”
^ Odino “1 porsiento,” salanti, binulan.
^ Literal, “impayag koy pagew ko,” salanti, say bandad pagew a parti na kawes a pinagkabulsa nensaman.
^ Odino “Ontan pa komon!”
^ Say sakey a siklo et 11.4 gramo. Nengnengen so Apendise B14.
^ Odino “diad gastos ko.”
^ Odino “parad kamaongan.”
