Gawa 4:1-37

4  Natan, legan a mansasalitay Pedro tan Juan ed saray totoo, sinmabi iray manunan saserdote tan say kapitan ed templo tan saray Saduceo*  ya asanokan iraya lapud ibabangat da iray totoo tan ipapakabat da so kioli manlapud inaatey a singa agawa ed si Jesus;  et inerel day Pedro tan Juan tan impriso da ra anggad tinmumbok ya agew, ta labi la ed saman.  Balet, anisia so dakel ed saramay dinmengel ed paliwawa ra, tan say bilang na lalaki et asabi toy limanlibo.  Diad tinmumbok ya agew, nantitipon ed Jerusalem iray manuley tan saray mamasiken tan saray eskriba* ra  (kaiba met si Anas a manunan saserdote tan si Caifas tan si Juan tan si Alejandro tan dakel nin kakanayon na manunan saserdote),  tan pinaalagey da ra ed pegley tan tinepetan da ra: “Diad anton pakayari odino diad siopan ngaran a ginawa yo iya?”  Et inkuan ed sikara nen Pedro, a napno na masanton espiritu: “Sikayoran manuley na totoo tan mamasiken,  no uusisaen yo kami natan makasengeg ed maong a ginawa mi ed sakey a toon mansasakit, tan no siopan ngaran ya apaabig iyan too, 10  naamtaan yon amin komon tan sikayon amin a totoo na Israel, a sayan laki ya akaalagey ed arapan yo et inmabig diad ngaran nen Jesu-Kristo a Nazareno, ya impasak yo balet pinaoli na Dios manlapud inaatey. 11  Saya so ‘bato ya impasen yon anggapoy kakanaan, sikayoran managpaalagey, balet nagmaliw a manunan bato ed suyok.’* 12  Sakey ni, anggapo lay arum nin kilabanan, ta anggapoy sananey a ngaran diad silong na tawen a niiter ed saray totoo pian nilaban itayo.” 13  Natan sanen anengneng day inkakpel nen Pedro tan si Juan, tan atebek da ya abebay-aral* tan ordinaryo iran totoo, mankelkelaw ira. Tan abidbir da ra a kakaiba ira nen Jesus nensaman, 14  tan anggapo lay nisuppiat da legan a sankanengneng da imay apaabig a laki a kaiba ran akaalagey. 15  Kanian pinapaway da ra ed Sanhedrin, tan nantetepetan ira, 16  ya inkuan da: “Antoy gawaen tayo ed sarayan totoo? Lapud nanggawa ray sakey a nikadkaduman tanda, a saya so anengneng na amin a manaayam ed Jerusalem; tan agtayo itan niburi. 17  Balet ta pian agla iya onkayat ed totoo diad arum iran pasen, pagyawen tayo ra ya ibaga tayon agla ran balot mansasalita ed siopaman a too diad sayan ngaran.”* 18  Diad saman et tinawag da ra tan binilin da ra ya agla ran balot mansasalita odino manbabangat diad ngaran nen Jesus ed inerman a pasen. 19  Balet inmebat si Pedro tan Juan ed sikara: “Sikayo so mangukom no kasin matunong ed imaton na Dios so idengel ed sikayo nen say diad Dios. 20  Balet parad sikami, agkami nayarin ontundan mansalita nipaakar ed saray anengneng tan nadngel mi.” 21  Kanian, kayari da ran pinagyaw lamet, imbulos da la ra lapud anggapon balot so aromog dan sengegan pian dusaen da ra tan natatakot ira ed saray totoo ta idadayew na sarayan amin so Dios lapud agawa; 22  ta samay laki a mamilagron apaabig et mantaon lay masulok ya apataplo. 23  Sanen nibulos la ra, linma ra ed saray kapananisiaan da tan imbalita da iray imbaga ed sikara na saray manunan saserdote tan mamasiken. 24  Sanen nadngel da iya, nankakasakey iran nampikasi ed Dios tan inkuan da: “Soberanon Katawan, sika so nanggawa na tawen tan say dalin tan say dayat tan amin a bengatlan walad saratan, 25  tan diad masanton espiritu et sinalitam ed panamegley na ama min David, a lingkor mo, ‘Akin a magulogulo iray nasyon tan dadalepdepen na saray totoo iray andiay kakanaan a bengatla? 26  Nankakasakey iray arari na dalin tan saray manuley sumpad si Jehova tan sumpad samay nilanaan to.’ 27  Peteg ya agawa iraya sanen nantitipon ed sayan syudad si Herodes tan si Poncio Pilato pati saray totoo na saray nasyon tan saray totoo na Israel sumpad masanton lingkor mo a si Jesus, a nilanaan mo, 28  ta pian gawaen da iray impasakbay mo. Agawa iraya lapud walay pakapanyarim tan mitunosan itan ed gagalam. 29  Tan natan, Jehova, imanom iray panamagyaw da, tan gawam a makmakpel iray ariripen mo a mangiyabawag ed salitam, 30  tan iyunat mo komon a naynay so limam pian nagawaan mi so panagpaabig tan saray tanda tan pakelaw diad panamegley na ngaran na masanton lingkor mo a Jesus.” 31  Tan sanen asumpal la ran nampikasi, yinmegyeg so pasen a nantitiponan da, tan napno ran amin na masanton espiritu tan makmakpel dan inyabawag so salita na Dios. 32  Sakey ni, dakel ed saramay anisia et nankakasakey ed puso tan kamarerwa, tan anggapon balot so mangibabaga a kayarian ton bukor so antokaman a walad sikato; balet innabang da ed balang sakey so amin a walad sikara. 33  Ontan met, diad mabisbiskeg a paraan et nantultuloy a nantasi iray apostol nipaakar ed inkioli na Katawan a Jesus; tan wala ed sikaran amin so daakan ya agnaparaan a kaabigan. 34  Diad tua, anggapoy anggan sakey ed sikara a mankaukolan; ta amin iramay walaan na kaumaan odino kaabungan et ilalako da iratan tan aawiten da iray nanlakoan da 35  tan iyaakar da iratan ed saray apostol. Insan, bubunogan da so kada sakey ed saramay mankaukolan. 36  Kanian si Jose a Levitan taga Ciprus, a tinawag na saray apostol a Bernabe, a mankabaliksay, “Anak na Ligliwa,” 37  tan walaan na dalin, so angilako ed satan tan inawit to so kuarta tan inyakar to itan ed saray apostol.

Paimanod leksab

Gaw 4:1 * Nengnengen so paimano ed leksab na Mat 3:7.
Gaw 4:5 * Nengnengen so paimano ed leksab na Mat 2:4.
Gaw 4:11 * Nengnengen so paimano ed leksab na Mat 21:42.
Gaw 4:13 * Mapatnag a tutukoyen na saya so ag-impakapanaral diad saray relihyoson eskuelaan na saray Hebreo.
Gaw 4:17 * Tutukoyen na saya so ngaran nen Jesus.