Gawa 27:1-44
27 Natan ta adesisyonan la ya onla kami ed Italya, si Pablo tan saray arum nin priso et inyawat da ed sakey ya opisyal na armada a manngaran na Julio a kabiangan ed tropa nen Augusto.
2 Kalugan mi ed sakey a barko a nanlapud Adramito a mamaarap la ed saray pasen ya asingger ed baybay na distrito na Asia, sinmipot kami, a kaibay Aristarco a taga Macedonia a nanlapud Tesalonica.
3 Tan diad tinmumbok ya agew, sinmakbit kami ed Sidon tan maomaong so impitoo nen Julio ed si Pablo tan inabuloyan ton onla ed saray kakaaro to pian naasikaso ra.
4 Tan sanen manbiahe kami la ed dayat manlapu diman, dinmalan kami ed Ciprus pian onsanib, lapud onsusuba so dagem;
5 tan binaliw mi so maawang a dayat, a dinmalan kami ed petek na Cilicia tan Pamfilia tan dinmaong kami diad Mira ed Licia.
6 Balet say opisyal na armada et akaromog diman na sakey a barkon nanlapud Alejandria a paonla ed Italya, tan linmugan kami ditan.
7 Insan, kayari na matantan ya impanbiahe mi ed dakel ya agew tan mair-irap ya insabi mi ed Cinido, ta agkami makatuloy lapud dagem, dinmalan kami ed Creta diad Salmone pian onsanib,
8 tan diad mair-irap ya indalan mi ed gilig na satan et akasabi kami ed sakey a pasen a tatawagey Mararakep a Daongan, ya asingger ditan so syudad na Lasea.
9 Lapud dakel lan panaon so linmabas tan mapeligro lay pambiahe ta linmabas met lay panag-ayunal ed agew na pananakbong, oniay inrekomenda nen Pablo ed sikara:
10 “Lalaki, iisipen ko a no manbiahe itayo ni et walay naderal tan dakel so naperdi, aliwa labat a saray kargamento tan say barko noagta pati saray bilay* tayo.”
11 Balet, say dinengel na opisyal na armada et say kapitan tan say makankayarian na barko imbes a saray imbaga nen Pablo.
12 Natan ta say daongan et aliwan maabig a pamalabasan na ambetel a panaon, imbaga na karaklan a kaukolan lay ombuat, pian salien da no kasin makasabi ra ed Fenix a diman so pamalabasan day ambetel a panaon, a sakey a daongan ed Creta ya akaarap diad amianen-bukig tan diad abalaten-bukig.
13 Niarum ni, sanen makalna so siplog na dagem a manlalapud abalaten, inisip da ya agawaan da la imay gagala ra, tan inagwat da so angkla tan sikaray dinmalan ed gilig na Creta.
14 Balet agnambayag et binmasig ed satan so makmaksil a dagem a tinawag ya Euroaquilo.
15 Sanen aglan balot makaalis so barko tan agla makasuba ed dagem, pinaulyan mi lan niyanor-anor kami.
16 Natan et niyakar kami ed sanib na sakey a melag ya isla a tatawagey Cauda, ingen ta ngalngali agmi naagwat so melag a baloto a walad beneg na barko.
17 Balet sanen naagwat da la itan, angusar ira na saray panagtaker pian paeleten so dalem na baloto; tan lapud natatakot ira ompano onsadsar ira ed Sirtis, inyabeba da lay kagawaan a panaglayag tan nampaanor la ra.
18 Balet lapud binmasig ed sikami so makmaksil a dagem, pinalemewan da so barko diad tinmumbok ya agew;
19 tan diad komatlon agew et imbabantak da so arum ed saray kagawaan ed barko.
20 Natan, sanen pigay agew la ya ag-anengneng so agew tan saray bitewen, tan ag-onkepa so maksil a dagem, naandian kami lay ilalo a makaliktar ni.
21 Tan sanen abayag la ya ag-ira mamangan, inmalagey si Pablo ed pegley da tan inkuan to: “Lalaki, dinengel yo komon so imbagak tan agtayo la nambiahe manlapud Creta ta pian agla agawa iyan impakaderal tan impakaperdi.
22 Anggaman ontan, ipaseseg ko ed sikayo natan a manliket kayo, ta anggapoy anggan sakey a kamarerwa ed sikayo a nabalang, noag say barko labat.
23 Ta nen kalabian et inmalagey ed abay ko so sakey ya anghel na Dios a dadayewen ko tan panlilingkoran ko,
24 ya inkuan to, ‘Agka natatakot, Pablo. Nepeg ya onarap ka ed Cesar, tan nisengeg ed sika et mapangasin iliktar na Dios so amin a kaibam a manbiabiahe ed dayat.’
25 Manliket kayo sirin, sikayoran lalaki; ta manisia ak ed Dios a peteg a nagawa imay nibaga ed siak.
26 Balet, nepeg a nisadsar itayo ed gilig na sakey ya isla.”
27 Natan, sanen komalabin-apat lan labi tan niyaanor-anor kami diad dayat na Adria, diad pegley-labi et inisip na saray marino ya asingger la ra ed dalin.
28 Tan tinukor da so kaaralem tan nalmoan da a duamplon depa itan, kanian inmabanti niray daiset tan tinukor da lamet tan nalmoan da a labinliman depa itan.
29 Tan lapud natatakot kami ya ompan nisadsar kami ed kabatoan, impelag day apatiran angkla ed beneg na barko tan pinirawat da ya onkabuasan la komon.
30 Balet sanen ginetma na saray marino ya ibatikan da lay barko tan inleksab da ed dayat so melag a baloto a kunkunwarin mangipelag ira na saray angkla ed arap na barko,
31 inkuan nen Pablo ed opisyal na armada tan saray sundalo: “No agmansiansia ed barko irayan lalaki, agkayo makaliktar.”
32 Diad saman et pinultot na saray sundalo iray lubir na melag a baloto tan impelag da la itan.
33 Sanen onkakabuasan la, kinerew nen Pablo ed balang sakey a mangan ira, a kuan to: “Komalabin-apat agew la natan a manaalagar kayo tan itetepel yoy eras, ya anggapo nin balot so kinan yo.
34 Mangan kayo la sirin, ta nakaukolan iya pian niliktar kayo; ta anggapoy anggan sakey ed sikayo a nabalangan na sakey a buek na ulo to.”
35 Kayari ton imbaga iya, sikatoy angala met na tinapay, akisalamat ed Dios diad arap dan amin tan pinisag to itan insan angan.
36 Kanian linmigsa ran amin tan angan la ra.
37 Et amin mi a walad barko et duanlasus tan pitomplo tan anem a kamarerwa.
38 Sanen napsel la ra, pinalemewan da so barko, ya imbabantak da ed dayat iray trigo.
39 Sanen sinmabin siansia so kabuasan, agda amta iman a lugar balet say nanenengneng da et sakey a baybay a kabueran, tan ninonot da ya isadsar ditan so barko, no nayarian da.
40 Kanian, kayari ran pinultot iray lubir na saray angkla, pinaulyanan da la iratan a napelag ed dayat, tan inukbar da met iray singer na saray begsay a pinagkatimon, tan kayari ran inyarap ed dagem so layag ed unaan, akaasingger ira ed baybay.
41 Sanen atapew lay kawalaan da ya onsisipwak so dayat ed biek tan biek, nisadsar da so barko tan nikutep so arap na satan tan agla makaalis, balet say beneg na satan et agaygay.
42 Diad saman et ninonot na saray sundalo a pateyen iray priso, ta pian anggapo so onlangoy ya ontakas.
43 Balet labay na opisyal na armada ya iliktar si Pablo kanian inamper to ra ed getma ra. Tan pinataboy to ed dayat iramay makalangoy tan unona la ran onsakbit,
44 tan ontan met so gawaen na saray atilak, a say arum et manpaletaw diad panamegley na saray tabla tan say arum et diad panamegley na saray bengatlan walad barko. Et ontan so agawa, ya amin so nisakbit a maligen diad dalin.
