Gawa 5:1-42

5  Balet, walay sakey a lakin manngaran na Ananias, a kaibay asawa ton si Safira, ya angilako na sakey a kayarian  tan masekreton imbiig to so arum a nanlakoan, ya amta met itan na asawa to, tan say kera et inawit to tan inyakar to ed saray apostol.  Balet inkuan nen Pedro: “Ananias, akin ya inabuloyan moy Satanas a pasebegen to kan mantila ed masanton espiritu tan masekreton mangibiig ed arum a nanlakoan na uma?  Agta kayarian mo itan sanen wala ni ed sika, tan sanen alako la itan, agta nayarian mon usaren so nanlakoan no labay mo? Akin et ginetmam ed pusom iyan gawa? Say Dios so tinilaan mo, aliwan saray totoo.”  Sanen nadngel nen Ananias irayan salita, sikatoy atumba tan inatey. Tan amin iramay akadngel ed satan et tinmakot a maong.  Balet inmalagey iray malangwer a lalaki, tan sikatoy binalkot day abel, tan impaway da tan imponpon da.  Natan kayari na ngalngali taloy oras et linmoob so asawa to, ya agto amta so agawa.  Inkuan nen Pedro ed sikato: “Ibagam ed siak, saya lan amin imay nanlakoan yon dua na uma?” Inkuan to: “On.”  Kanian inkuan nen Pedro ed sikato: “Akin et nampaknaan yon dua a suboken so espiritu nen Jehova? Nia! Wala la’d puerta iramay angiponpon ed asawam, tan ipaway da ka.” 10  Et tampol a sikatoy atumba diad salian nen Pedro tan inatey. Sanen linmoob iray malangwer a lalaki, sikatoy anengneng dan inatey la, tan impaway da tan imponpon da ed abay na asawa to. 11  Lapud saya et tinmakot a maong so interon kongregasyon pati saramay amin ya akadngel ed sarayan bengatla. 12  Niarum ni, saray apostol et nantultuloy a nanggawa na dakel a tanda tan pakelaw ed limog na saray totoo; tan nantitipon iran amin diman ed naatepan a dadalanan* nen Solomon. 13  Tua, anggapo lay arum ya akapampakpel a miulop ed sikara; balet, sikaray indaydayew na totoo. 14  Tan saray mananisia ed Katawan et nantultuloy nin naaruman, a dakerakel a lalaki tan bibii; 15  kanian impapaway da iray mansasakit diad saray malapar a dalan* tan impaparukol da ra ed angkekelag a dukolan, ta pian anggan panon et wala ed sikaray nasiroman na anino nen Pedro sano ondalan. 16  Ontan met, nantultuloy a dinmadago so dakel a totoo a manlalapud saray syudad ed kaliberliber na Jerusalem, ya inaawit da iray mansasakit tan saramay papairapen na marutak iran espiritu, tan inmabig iran amin. 17  Balet inmalagey so atagey a saserdote tan amin iramay kaiba to, say sekta na saray Saduceo ed saman a panaon, a nanimon iran maong, 18  tan inerel da iray apostol tan inyan da ra ed prisoan na baley. 19  Balet diad labi et nilukasan na anghel nen Jehova iray kapot na prisoan, a sikaray impaway to tan inkuan to: 20  “La kayo ed templo, tan no wadman kayo la, itultuloy yon ibaga ed totoo so amin a salita nipaakar ed sayan bilay.” 21  Kayari ran nadngel iya, sikaray angabkabuasan a linmoob ed templo tan nambangat ira. Natan sanen sinmabi so atagey a saserdote tan saramay kaiba to, tinipon da so Sanhedrin tan amin ya ulop na mamasiken na ananak na Israel, tan angibaki ra ed prisoan pian paawit da iray apostol. 22  Balet sanen sinmabi diman iray opisyal, agda ra aromog ed prisoan. Kanian pinmawil ira tan imbalita ra, 23  a kuan da: “Say prisoan et asabian min malmalet ya akatalak tan saray guardia et akaalagey diad arap na saray kapot, balet sanen nilukasan mi et anggapoy wadman.” 24  Sanen nadngel iya na kapitan na templo tan saray manunan saserdote, awetwet ira nipaakar ed sarayan bengatla no anto kasi pansumpalan na saya. 25  Balet walay toon sinmabi ya angibalita ed sikara: “Nia! Wadman ed templo iramay lalakin impriso yo, ya akaalagey tan babangatan da iray totoo.” 26  Diad saman et linma so kapitan a kaiba iray opisyal to tan inawit da ra, ya agda ra pinuersa, lapud tinmakot ira ompan tupaken ira na totoo. 27  Kanian inawit da ra tan pinaalagey da ra ed loob na Sanhedrin. Tan tinepetan ira na atagey a saserdote 28  tan inkuan to: “Binilibilin mi kayo ya agkayo la manbabangat diad sayan ngaran, balet nia! pinano yo na bangat yo so Jerusalem, tan labay yon ipakasalanan ed sikami so dala na sayan too.” 29  Et inmebat si Pedro tan say arum niran apostol, a kuan da: “Nepeg ya unoren mi so Dios bilang manuley nen saray totoo. 30  Say Dios na saray inmuunan atateng tayo so amaoli ed si Jesus, a pinatey yo, ya impasak* yo ed kiew. 31  Sikatoy intandoro na Dios diad nikawanan to bilang Manunan Manangitonton tan Manangilaban, ta pian say Israel et makapambabawi tan naperdona iray kasalanan da. 32  Tan atasian mi iraya, ontan met na masanton espiritu, ya inter na Dios ed saramay manguunor ed sikato bilang manuley.” 33  Sanen nadngel da iya, sinmanok iran maong tan labay da ran pateyen. 34  Balet walay sakey a lakin inmalagey ed Sanhedrin, sakey a Fariseo a manngaray Gamaliel, a gagalangen na amin a totoo bilang managbangat na Ganggan, tan ingganggan to ya ipaway dan magano iray lalaki. 35  Tan inkuan to ed sikara: “Lalaki na Israel, manalwar kayo ed getma yon gawaen ed sarayan lalaki. 36  Singa bilang, antis na sarayan agew et tinmalindeg si Teudas, ya ipapasirayew toy inkasikato, tan ngalngali apat a lasus a totoo so akiulop ed sikato. Balet sikatoy pinatey, tan amin iramay tinmumbok ed sikato et abuybuyak tan anggapoy nansumpalan da. 37  Kayari to et tinmalindeg met si Judas a taga Galilea diad saray agew na panagparehistro, tan atangguyor to iray totoo ya ontumbok ed sikato. Balet sikatoy inatey, tan nitaytayak ya amin iramay tinmumbok ed sikato. 38  Kanian natan, ibagak ed sikayo, Agyo pibabalian irayan totoo, noagta paulyan yo ra labat; (ta no sayan gagala odino sayan kimey et nanlapud totoo, naderal iya lanlamang; 39  balet no nanlapu iya ed Dios, agyo ra nayarian a deralen;) ta no andi, ompan magmaliw laingen a say Dios so lalabanan yo.” 40  Diad saman et sikatoy dinengel da, tan impatawag da iray apostol, a nilelewet da ra, tan binilin da ra ya ontunda la ran mansalita diad ngaran nen Jesus, insan imbulos da ra. 41  Kanian, tinmaynan iraya ed arap na Sanhedrin, a malikeliket ira lapud impasen iran makana a napabanday nisengeg ed ngaran to. 42  Tan kada agew diad templo tan diad kabkaabungan et ag-ira tinmundan nambabangat tan angiyabawag ed maong a balita nipaakar ed Kristo, si Jesus.

Paimanod leksab

Gaw 5:12 * Say atep na satan et susuportaan na dakel a lusek.
Gaw 5:15 * Nengnengen so paimano ed leksab na Mat 6:5.
Gaw 5:30 * Literal, “imbitin.”