Gawa 12:1-25

12  Diad satan a panaon et pinairap nen Herodes* ya ari so arum a membro na kongregasyon.  Pinatey toy Santiago ya agi nen Juan diad panamegley na espada.  Sanen anengneng to a makapaliket itan ed saray Judio, inerel to met si Pedro. (Diad saraman ya agew et piesta na saray agpinalebag a tinapay.)  Tan sanen sikatoy narel la, sikatoy impriso to, ya inyawat to ed apatiran grupo na saray sundalo a mansusublayan a manbantay ed sikato, a sanepat so kada grupo, lapud sikatoy labay ton iyarap ed saray totoo kayari na paskua.  Kanian si Pedro so binantayan a maong diad prisoan; balet say kongregasyon et masimsimoon ya angipikasi ed sikato diad Dios.  Diad saman a labi, sanen si Pedro so ngalngali la iyarap nen Herodes, sikatoy nanaugip ya abalor na duaran gulonggulong diad pegley na duaran sundalo, tan say prisoan et babantayan na saray guardia a walad arap na kapot.  Balet nia! inmalagey so anghel nen Jehova diad abay to, tan sinminag so liwawa diad selda na prisoan. Tinapik toy Pedro ed diking pian bangonen to, a kuan to: “Alagey kan tampol!” Tan nakal iray gulonggulong ed saray lima to.  Inkuan na anghel ed sikato: “Manparaan ka tan isulong mo iray sandalyas mo.” Et ontan so ginawa to. Insan inkuan to ed sikato: “Isulong moy ilalatop mon kawes tan tumbok ka ed siak.”  Tan sikatoy pinmaway tan tinmumbok ed sikato, balet agto amta a say nagagawa ed panamegley na anghel et tua. Say abaloan to et sikatoy makakanengneng na pasingawey. 10  Kayari ran nilabsanan iray unonan guardia tan saray komadua, akasabi ra ed balatyang a puerta a mamaarap ed syudad, tan linmukas iyan bukor ed sikara. Kapaway da et nanakar ira ed sakey a karsada, tan kabebekta et sinmian la imay anghel ed sikato. 11  Tan sanen amta la nen Pedro so nagagawa, inkuan to: “Natan et amtak la ya imbaki nen Jehova so anghel to tan inliktar to ak ed lima nen Herodes tan ed amin ya iilaloan na saray Judio.” 12  Tan kayari ton ninonot itan, sikatoy linma ed abung nen Maria ya ina nen Juan a manngaran met na Marcos, a diman et walay dakel a nantitipon tan manpipikasi. 13  Sanen sikatoy tinmoktok diad puerta, dinmago so sakey a biin aripen a manngaray Roda pian nengnengen to no siopay ontatawag, 14  tan sanen abosesan toy Pedro, agto nilukasan so puerta lapud liket to, noagta binmatik ed loob tan imbaga ton walad paway na puerta si Pedro. 15  Inkuan da ed sikato: “Natatapis ka la.” Balet impasoot to a tua so ibabaga to. Et inkuan da: “Anghel to iman.” 16  Balet wadman nin siansia si Pedro ya ontotoktok. Sanen nilukasan da, sikatoy anengneng da tan mankelkelaw ira. 17  Balet sininyasan to ra a mandeen ira tan insalaysay ton amin ed sikara no panon a sikatoy impaway nen Jehova ed prisoan, tan inkuan to: “Ipasabi yo iraya ed si Santiago tan ed saray agagi.” Diad saman et sikatoy tinmaynan tan linma ed sananey a pasen. 18  Et sanen agew la, agulo iramay sundalo no antoy peteg ya agawa ed si Pedro. 19  Sikatoy impaanap nen Herodes, tan sanen agda naromog, tinepetan ton maong iramay guardia tan impadusa to ra; tan manlapud Judea et sikatoy linma ed Cesarea tan nanayam diman ya agano. 20  Natan et sikatoy sinmanok ed saray totoo ed Tiro tan Sidon. Kanian nankakasakey iran linma ed sikato, tan kayari ran kinombinse si Blasto a mangaasikaso ed kuarton panuugipan na ari, akiareglo ra ed ari lapud say panlalapuan na naakan na nasyon da et say ari. 21  Balet diad niganan agew, nansulong si Herodes na kawes na ari tan yinmurong ed panangukoman tan nampaliwawa ed arap na totoo. 22  Kayari to et inyeyag na saray nantitipon a totoo: “Boses na sakey a dios, aliwan boses na too!” 23  Tampol a sikatoy kinabil na anghel nen Jehova, lapud agto inggloria so Dios, tan sikatoy kinan na saray bigis tan nauyosan na linawa. 24  Balet say salita nen Jehova et nantultuloy a binmulaslas tan linmaknab. 25  Nipaakar ed si Bernabe tan si Saulo, sanen niiter da lan amin iray nakaukolan a tulong ed Jerusalem, sikaray pinmawil tan impila ray Juan, a manngaran met na Marcos.

Paimanod leksab

Gaw 12:1 * Salanti, Herodes Agripa I.