Gawa 21:1-40

21  Natan sanen sinmian kami la ed sikara tan nambarko kami, dirediretso kamin nambiahe tan akasabi kami ed Cos, balet diad tinmumbok ya agew et diad Rodas, insan diad Patara.  Tan sanen walay aromog min barko a mamaarap ed Fenicia, linmugan kami insan kami la binmuat.  Sanen abantag mi so isla na Ciprus diad bandad kawigi, nilabsanan mi labat itan tan amaarap kami ed Sirya, tan sinmakbit kami diad Tiro, ta diman so pangiyepasan ed saray kargamento na barko.  Inanap mi ray disipulo tan aromog mi ra, tan nansiansia kami dia a pitoy agew. Balet diad panamegley na espiritu et aminpiga ran imbaga ed si Pablo ya ag-oonla ed Jerusalem.  Kanian kayari pigaran agew ya impansiansia mi diman, linma kami lan nambiahe; balet amin da, kaiba iray bibii tan ugugaw, so angipatnubang ed sikami anggad paway na syudad. Tan tinmalimukor kami ed gilig na dayat tan nampikasi  tan kayari min nampapataniran, linmugan kami la ed barko tan sinmempet la ra ed saray ayaman da.  Manlapud Tiro et akasabi kamin siansia diad Tolemaida, tan imbano mi iray agagi tan sakey agew kamin akiayam ed sikara.  Diad tinmumbok ya agew et binmuat kami tan akasabi kami ed Cesarea, tan linma kami ed abung nen Felipe ya ebanghelisador, a sakey ed saray pitoran lalaki, tan akiayam kami ditan.  Sikatoy walaan na apatiran anak a mamarikit, a manpropropesiya. 10  Balet legan kamin wadman a pigay agew, samay propetan manngaran na Agabo et linmasur manlapud Judea, 11  tan nila to kami tan inala toy balkes nen Pablo, tan binalor to iray sali tan saray lima ton dili tan inkuan to: “Onia so kuan na masanton espiritu, ‘Say laki a makankayarian ed sayan balkes et onia so pamalor ed sikato na saray Judio diad Jerusalem tan iyawat da ed saray totoo na saray nasyon.’” 12  Natan sanen nadngel mi iya, sikami tan saramay manaayam diman so akikasi ed sikato ya agla ontatatdang ed Jerusalem. 13  Et inmebat si Pablo: “Akin et onaakis kayo tan pakakapuyen yoy pusok? Agkayo mapaga ta akaparaan ak lan nabalor tan ompatey diad Jerusalem nisengeg ed ngaran na Katawan a Jesus.” 14  Sanen sikatoy agmi nakombinse, pinaulyanan mi la, a kuan mi: “Say linawa nen Jehova komon so nagawa.” 15  Natan, kayari na sarayan agew et namparaan kami parad pambiahe tan tinmatdang kami a mamaarap ed Jerusalem. 16  Balet akila met ed sikami so arum ed saray disipulo a nanlapud Cesarea, pian ibaan da kamin onla ed abung na samay lakin manangkaili ed sikami, samay manngaran na Minason a taga Ciprus, sakey ed saray inmunan disipulo. 17  Sanen akasabi kami ed Jerusalem, malikeliket iray agagi ya angawat ed sikami. 18  Balet diad tinmumbok ya agew, si Pablo so kaiba min linma ed si Santiago; tan wadman so amin a mamasiken. 19  Tan imbano to ra tan insalaysay ton amin iray bengatlan ginawa na Dios diad saray nasyon ed panamegley na ministeryo to. 20  Sanen nadngel da iya, inggloria ra so Dios, tan inkuan da ed sikato: “Nanenengneng mo, agi, a piganlibo lay mananisia ed limog na saray Judio, tan maseseg iran amin a manguunor ed Ganggan. 21  Balet nadngelan day labilabir nipaakar ed sika ya ibabangat mo so panag-apostasya ed si Moises diad amin a Judio a walad saray nasyon, ya ibabagam ya agda la segaten so ananak da tan agda met la tumboken iray abaybayag lan kustombre. 22  Anto sirin so nepeg a gawaen ed satan? Seguradon nabalitaan da a sinmabi ka la. 23  Gawam sirin iyan ibaga mi ed sika: Diad sikami et wala so apatiran lalaki a walay sinambaan da ed sikaran dili. 24  Itagar mo irayan lalaki tan linisan moy inkasika unong ed Ganggan a kaiba ira tan bayaran mo iray gastosen da, ta pian napakiskisan da iray ulo ra. Diad ontan et naamtaan na amin ya anggapoy katuaan na saray nadngelan dan labilabir nipaakar ed sika, noagta maong so gagawaen mo, ya uunoren mo met a mismo so Ganggan. 25  No nipaakar ed saray mananisia a walad saray nasyon, wala lay imbaki min mangipasabi ed desisyon mi a kaukolan iran manalwar ed antokaman ya imbagat ed saray idolo ontan met ed dala tan binikkel ya ayayep tan ed pilalawanan.” 26  Diad tinmumbok ya agew, intagar nen Pablo iraman a lalaki tan nilinisan toy inkasikato unong ed Ganggan a pati sikara tan linmoob ira ed templo, pian ipaamta ra no kapigan nasumpal iray agew na panaglinis da unong ed Ganggan, tan no kapigan iyapay so bagat parad kada sakey ed sikara. 27  Natan sanen manampot lay pitoran agew, ginulo na totoo iray Judio a nanlapud Asia sanen sikatoy anengneng da ed loob na templo, tan sikatoy inerel da, 28  ya iyeeyag da: “Lalaki na Israel, tulong kayo! Saya imay toon mangibabangat ed amin a totoo ed nanduruman pasen sumpad totoo tayo tan ed Ganggan tan ed sayan pasen, tan sakey ni et pinaloob to ed templo iray Griego tan dinutakan to iyan masanton pasen.” 29  Ta anengneng da nensaman a kaiba to ed syudad si Trofimo a taga Efeso, balet iisipen da a sikatoy pinaloob nen Pablo ed templo. 30  Tan agulo so interon syudad, tan nanuulop a binmatik iray totoo, tan inerel day Pablo tan inggayugoy da ed paway na templo. Et tampol ya inkapot da iray puerta. 31  Tan sanen labay da lan pateyen, akabatan na komandante na saray sundalo a magulo lay interon Jerusalem; 32  kanian intagar ton tampol iray sundalo tan saray opisyal na armada tan batik ira a linma ed sikara. Sanen anengneng day komandante na militar tan saray sundalo, intunda ray pankakabil da ed si Pablo. 33  Diad saman et inmasingger so komandante na militar tan sikatoy inala to tan impabalor to na duaran gulonggulong; tan tinepet to no siopa iyan too tan no antoy ginawa to. 34  Balet nandurumaan so iyeeyag na saray totoo. Kanian, lapud agto naseguro no dinan so tua lapud gulo, sikatoy impaiyakar to ed kuartel na saray sundalo. 35  Balet sanen akasegep la ed takayan, linmoor so kipapasen kanian sikatoy inalsa la na saray sundalo lapud magulogulo la iray totoo; 36  ta dakdakel so tinmutumbok, ya iyeeyag da: “Patey mo!” 37  Tan sanen iloob da la ed kuartel na saray sundalo, imbaga nen Pablo ed komandante na militar: “Wala pay ibagak ed sika, no nayari?” Inkuan to: “Makapansalita kay Griego? 38  Aliwan sika imay Ehipsio a diad agano ni et insugsog toy panrebelde ed gobierno tan impaway to ed kalawakan so apat a libon lalaki a managpatey?” 39  Kanian inkuan nen Pablo: “Diad tua et sakey ak a Judio, a taga Tarso ed Cilicia, a mibabaley ed kabkabat a syudad. Kanian ipangasim pan abuloyan mo ak a mansalita ed totoo.” 40  Sanen inmabuloy, sininyasan nen Pablo iray totoo legan ya akaalagey ed takayan. Sanen dinmeen la, sikatoy nansalita ed sikara diad lenguahen Hebreo, a kuan to:

Paimanod leksab